O le a le auaunaga a agelu? Ma aisea e fesootai ai i le pule o le Perisitua Arona?

Ina ua toefuatai mai e Ioane le Papatiso le Perisitua Arona, sa ia ta’ua o lenei pule o loo “umia ki o le auaunaga a agelu” (Mataupu Faavae ma Feagaiga 13:1). Na faamalamalama mai e Peresitene Dallin H. Oaks, Fesoasoani Muamua i le Au Peresitene Sili, se sootaga i le va o le Perisitua Arona ma le auaunaga a agelu i le ala lenei:

“I se tulaga lautele, o faamanuiaga o le mafutaga faaleagaga ma le fesootaiga e avanoa mo na o i latou lava e mama. … E ala i le sauniga o le Perisitua Arona o le papatisoga ma le faamanatuga, e faamamaina ai i tatou i a tatou agasala, ma ua folafola mai afai tatou te tausia a tatou feagaiga o le a tatou maua pea Lona Agaga e faatasi ma i tatou. Ou te talitonu o lena folafolaga e le gata e faatatau i le Agaga Paia, ae faapea foi i le auaunaga a agelu, aua ‘e tautatala agelu i le mana o le Agaga Paia; o le mea lea, latou te fetalai mai afioga a Keriso’ (2 Nifae 32:3). O lea la, o i latou o e umia le Perisitua Arona e tatalaina le faitotoa mo tagata uma o le Ekalesia o e e aai ma feinu ma le agavaa i le faamanatuga e olioli ai i le mafutaga a le Agaga o le Alii ma le auaunaga a agelu” (konafesi aoao Oke. 1998 [Ensign, Nov. 1998, 39]).