O Fea e Mafai Ona E Maua ai le Malosi e Feagai ai ma Suiga?

O se uiga faalenatura ia te a’u le matamuli i suiga. Ou te fiafia e fuafua mea uma. Ae ona o le galuega a lo’u tamā, ua tele ai taimi ua feoai ai lo’u aiga. O lenei ituaiga olaga, e te le iloa lava po o le a le mea o le a tupu.

Mo se faataitaiga, ina ua matou tuua Zimbabwe, o le fuafuaga mo lo’u tamā e alu i Afakanisitani mo se tausaga. O le vaega o totoe o lo’u aiga e nonofo faatasi ma matua o lo’u tina. Ae peitai, a o lei alu ese atu lo’u tama, sa matou iloa ai e le o auina atu se tasi i Afakanisitani mo sina taimi. O lona uiga o le a matou le siitia atu e nonofo faatasi ma aiga. E ui lava ina sa ou fiafia i le i ai o lo’u tamā, ae o lenei suiga faafuasei sa matuai faigata lava mo i matou uma.

Sa ou ita, ma paga lea, sa ou faailoa atu lo’u ita i le Tama Faalelagi mo sina taimi. Ou te manatua lo’u tatalo i se tasi po ma na o le ee atu lava i le mafuaaga na ou ita ai. Ae e ui lava i lo’u ita, sa Ia fesoasoani ia te au ma iu ina ou faalotomaualaloina au lava ma lagona le toafilemu. Sa pei o loo Ia fetalai mai, “Po o le a lava le mea e tupu, e mafai ona maua mai ai le lelei. Tau ina talitonu mai ia te a’u. Ou te iloa e faigata i le taimi nei, ae o le a lelei mea uma i le iuga.” Sa mafai ona ou to’a ma mafaufau i mea. Sa manaomia ona ou aoao e faatuatuaina le Tama Faalelagi ma ia lelei i mea e le o faia e tusa ai ma la’u fuafuaga, aua e sili atu i taimi uma Lana fuafuaga.

O o’u aafiaga i le siitia soo ua ou latalata atili ai i lo’u Faaola aua o Ia le mea e tasi e mafai ona ou faalagolago pea i ai. O uo o le a o mai, ma o O nofoaga o le a oo mai ma o . Ae o loo i ai pea le Faaola iina, ma e naunau lava o Ia e fesoasoani i soo se mea o loo ou oo i ai.