Na o Tusiga Faatekinolosi: Sau, Mulimuli Mai Ia Te A’u
Aua le Fefe e Fai Mea Lelei
Atonu e mimilo e leo o le lalolagi le upumoni, ae e mafai ona tatou faalagolago i le Alii mo le talitonuga mautinoa tatou te manaomia e faasoa atu ai Lona agalelei.
Mafaufau faapea o loo e uuina se ata o se fugalaau matagofie ma felanulanuai. E te faaali atu i lau uo aua e te manatu o le a latou talisapaia lona matagofie.
Ae peitai, o le mea e faateia ai, ua faauu lau uo ma fai mai, “E le o se ata lena o se fugalaau moni! O loo e mafaufauina ni mea.” Ua ia saeia ma togi i le ea ia fasipepa a o matele atu i fafo.
E mautinoa lava, ua e tiga. Ua e filifili e te le toe faaalia lava ni ata e te fiafia i ai i se tasi. E te le toe manao i se isi tali faapena.
E foliga mai e faavalevalea lenei mea, a ea? Aisea o le a taofia ai e lea aafiaga leaga e tasi oe mai le toe taumafai?
E tele leo i le lalolagi o le a ta’u atu ia te oe o se mea lelei ma le moni e sese pe leaga. Ona o lena mea, o nisi taimi tatou te lagona ai le faatuatuai, popole, pe atuatuvale foi e faia mea lelei e ala i le faasoa atu o upumoni o le talalelei, e tusa lava pe tatou te maua le naunautaiga. Tatou te mafaufau, “Ae faapefea pe a latou teena au?” po o le “Ou te le fia faalavelave.” Tatou te faatalitonuina i tatou lava o loo tatou fesoasoani atili i se tasi e ala i le le faasoaina atu o le lelei.
Ae o le mea moni lava o le lelei o le a lelei pea. E tusa lava pe na saeia e lau uo lau ata ma fai mai e le moni le fugalaau, e le suia ai le mea moni faapea o se ata o se fugalaau matagofie. E mafai lava ona e faamanatu ia te oe lava ua e iloa le upumoni.
Ua Silafia e le Alii o Tatou Popolega.
E tusa lava pe tali mai se tasi i le ita po o le faatausuai pe a e faasoa atu upumoni o le talalelei, e le suia ai le mea moni e faapea o mea sa e faasoa atu e moni pe lelei. E ui lava i lena mea, o le popole i agafesootai, popole lautele, po o isi luitau o le soifua maloloina faalemafaufau e mafai ona faigata ai ona lagona le mautinoa e tautala atu ma faia mea lelei. Ma e tusa lava pe e te le o maua na tauiviga, e ono faigata ona faatoilalo le fefe i le faamasinoga po o le maasiasi.
Ina ua toefuatai mai le talalelei a Iesu Keriso, o se tasi o mea muamua na poloaiina e le Alii le Perofeta o Iosefa Samita e fai o le faasalalau atu lea o le upu—ia auina atu faifeautalai. Talu ai sa tele lotu na fai mai ua i ai le upumoni, o lea na maua ai e tagata o le Ekalesia fou ua toefuataiina le tele o faamasinoga le talafeagai, ma le inosia ona o le talitonu eseese.
Na silafia e le Alii ituaiga o popolega na lagonaina e Ana faifeautalai fou ua valaauina (aemaise lava talu ai o i latou lava o ni tagata fou liliu mai!). Sa Ia faamafanafanaina i latou, ma fetalai atu, “Afai latou te teena a’u upu, ma le vaega lenei o la’u talalelei ma la’u galuega, amuia lava outou, aua e le mafai ona latou faia se mea e sili atu ia te outou nai lo a’u” (Mataupu Faavae ma Feagaiga 6:29).
O le a la le uiga o lena mea?
O Mea ua Ia Folafola Mai ia i Tatou
“E le mafai ona latou faia se mea e sili atu ia te outou nai lo a’u.” O Iesu Keriso e malosi. E sili atu lona malosi nai lo Satani, le fili. E ui lava ina sa mafatia i tiga uma o le lalolagi sa manaomia e faataunuu ai le Togiola, ae sa Ia faatoilaloina pea na tiga uma. E ui lava i tiga e mafai ona mafua mai i manatu, upu, ma amioga a isi ia i tatou, ae e mafai foi ona Ia fesoasoani ia i tatou e faatoilalo lena mea.
“Amuia outou.” E tusa lava po o a tala a isi pe a tatou faasoa atu le talalelei pe “faia mea lelei,” ua folafola mai e le Alii e faamanuia i tatou. Ma o faamanuiaga ua Ia ofoina mai e sili atu le taua nai lo manatu o isi.
O le mea moni, ua folafola mai e le Alii a tatou faasoa atu le lelei, o le a faamanuiaina i tatou, ma tatou te le popole i mea e ono faia pe fai mai ai isi, aua o loo i ai le Atua i lo tatou itu!
Na fetalai atu le Alii ia Iosefa Samita (ma i tatou), “Aua le fefe e fai mea lelei … ; … afai lua te lūlūina le lelei, o le a oulua seleseleina foi le lelei mo o oulua taui” (Mataupu Faavae ma Feagaiga 6:33). I se isi faaupuga, afai tatou te tuuina atu le lelei i le lalolagi—pe o le faasoaina atu o le talalelei, tuuina atu o auaunaga, po o le taumafai ia avea atili e faapei o Keriso—o le a tatou lagonaina ma mauaina le tele o le lelei i o tatou olaga. Pau lava le mea e tatau ona tatou faia o le taulai atu ia Iesu Keriso ma faalagolago ia te Ia mo le malosi. “Afai ua lua atiae i luga o la’u papa, e le mafai ona latou manumalo” (Mataupu Faavae ma Feagaiga 6:34).