Famli i Stamba long Gospel blong Jisas Kraes

Famli i stamba blong doktrin blong Jos Ia blong Jisas Kraes blong Ol Lata-dei Sent. Tempol i impoten long doktrin blong yumi long famli. Ol odinens we yumi kasem long tempol i helpem yumi blong gobak long fored blong Papa blong yumi long Heven, olsem wan famli we i no save finis.

Long Epril 2025 jeneral konfrens, Presiden Russell M. Nelson i anaonsem se oli stap bildim 200 niu tempol. Hem i laekem blong anaonsem ol niu tempol long en blong ol jeneral konfrens, mo yumi evriwan i glad wetem hem. Be wetem bigfala namba blong ol tempol naoia we oli stap planem mo bildim, i gud sapos yumi slo daon wetem anaonsmen blong ol niu tempol. From hemia, wetem apruvol blong Olgeta Kworom blong ol Twelef Aposol, bae mifala i no anaonsem eni niu tempol long konfrens ia. Naoia bae yumi givim ol odinens blong tempol long ol memba blong Jos raon long wol, wetem taem mo ples we bae oli anaonsem konstraksen blong ol niu tempol.

Mi raetem smol pat blong toktok ia we mi jes serem, afta long ded blong Presiden blong yumi we yumi lavem tumas, Presiden Russell M. Nelson. Wanem we bae mi serem naoia i go, mi bin raetem mo oli apruvum plante wik i pas finis, be oli stap yet olsem ol tijing we mi kasem tru long insperesen we i kam long Lod.

famli: wan ofisol toktok i go long wol, we i bin kamaot , 30 yia i pas, i talem se “God i odenem mared bitwin man mo woman” mo “famli hem i stamba blong plan ia we i gat long saed blong fiuja ples we i no save finis, blong ol pikinini blong Hem.” Hem i talem tu se “komanmen blong God long ol pikinini blong Hem blong kam plante mo fulumap wol ia, i stap yet naoia.” Mo,“mifala i stap gohed yet blong talemaot se God i givim komanmen ia, se tabu paoa blong mekem pikinini i mas tekem ples nomo bitwin wan man mo wan woman we tufala i bin mared folem loa olsem hasban mo waef.” Olsem Elda Russell M. Nelson long taem ia, i tijim long ol pipol long Bringham Yang Yunivesiti se famli i “impoten samting long plan blong God. … Wanem we i tru i we, wan stamba tingting blong plan ia i blong mekem famli i kam olsem wan god.”

Jos Ia blong Jisas Kraes oli savegud long hem samtaem olsem wan famli Jos. !Yes, hem i tru! Yumi save eksplenem rilesensip blong yumi wetem God mo stamba tingting blong laef blong yumi long wol ia tru long famli. Gospel ia blong Jisas Kraes hem i plan blong Papa long Heven blong gud blong ol spirit pikinini blong Hem. Yumi save talem stret se gospel plan ia oli bin tijim faswan, long kaonsel blong wan famli we i no save finis, i hapen tru long ol famli blong yumi long wol ia, mo bae i komplit taem yumi kam olsem ol god mo pikinini blong God insaed long wan famli we i no save finis.

Nomata long toktok blong doktrin ia, i gat oposisen. Long Yunaeted Stet, ol tingting long saed blong mared mo fasin blong bonem bebi i stap go defren olgeta. Blong kolosap wan handred yia, namba blong ol mared kapol mo bebi i stap go daon. I gat plante Jos memba we oli mared mo gat bebi, be namba blong olgeta tu i stap go daon bigwan. Hem i impoten long ol Lata-dei Sent blong oli no lusum andastaning blong olgeta long stamba tingting blong mared mo valiu blong ol pikinini. Hemia i fiuja we yumi stap traehad from. “Blong Kam Olsem Wan God i Bisnis blong Famli,” Presiden Nelson i tijim. “Tru nomo long olgeta odinens blong sevem laef blong gospel blong Jisas Kraes bambae ol famli oli save kam olsem ol god.”

Yumi save andastanem namba blong mared mo ol pikinini, we i stap go daon, long wan nasonal level from plante risen, be yumi mas mekem ol Lata-dei Sent valiu mo praktis i kam moa antap—be i no blong folem—ol fasin ia.

Taem mi wan smol boe 80 yia i pas, mi laef long fam blong tufala apu long saed blong mama blong mi, long wan ples we kolosap evri samting we i hapen truaot long dei i hapen anda long daereksen blong famli . I no bin gat TV, o eni nara lektronik samting we i tekemaot tingting blong mifala long ol famli aktiviti. Be, long laef blong tedei, sam memba nomo oli gohed blong mekem ol famli aktiviti. Laef blong tedei wetem ol transpot, lafet, mo olsem wanem mesej i save pas hariap i mekem i isi long ol yut blong mekem hom blong olgeta olsem ol hotel. Wan ples we oli save slip mo kaekae long hem wanwan taem, mo wan ples we ol samting oli mekem i no hapen anda long daereksen blong ol paren.

Paoa blong ol paren i stap kam daon folem wei we plante memba blong Jos tedei oli laef. Bifo, wan long ol bigfala samting we i mekem famli i kam wan, hem i eksperiens we oli gat taem oli traehad blong kasem wan semmak gol—olsem wok long garen o statem wan laef. Famli i wan grup we i wok tugeta blong laef mo tred long ol samting wetem ol narawan. Tedei, plante famli oli wok blong kasem moa mane, mo i no nidim blong ol famli memba i kam tugeta.

Atoriti blong ol paren i stap lus, be ol Lata-dei Sent oli gat wan responsabiliti we i kam long God blong tijim ol pikinini blong olgeta blong mekem rere ples we bae ol famli blong yumi i stap long hem blong oltaem (luk long Doktrin mo Kavenan 68:25). Plante long yumi i mas mekem hemia from i no evri famli blong yumi oli laekem blong folem ol famli tradisen blong bifo. Divos, ded, mo seperesen oli hapen tru. Mi eksperiensem hemia long famli we mi groap long hem.

Papa blong mi i ded taem mi gat seven yia, mekem se mama blong mifala we i wido, i lukaot long mi wetem tufala smol brata mo sista blong mi. Long ol bigfala had situesen, hem i go fored. Hem i stap hemwan long harem nogud blong hem, be wetem help blong Lod, tijing blong hem we i gat paoa long saed blong doktrin blong Jos we i kambak, i gaedem mifala. !Hao hem i prea from help we i kam long heven blong lukaotem ol pikinini blong hem, mo hem i kasem blesing! Mifala i groap long wan hapi hom we mama blong mifala i akseptem ded blong papa blong mifala. Hem i tijim mifala se mifala i bin gat wan papa, mo hem i bin gat wan hasban mo bae mifala i stap olsem wan famli oltaem from tempol mared blong tufala. Papa blong mifala i aot blong smol taem nomo from Lod i singaotem hem blong mekem wan defren wok.

Mi save se plante nara famli oli no hapi tumas, be evri mama wido oli save tijim abaot lav blong Papa long Heven mo ol promes blesing blong wan tempol mared. !Yu tu yu save mekem hemia! Plan ia blong Papa long Heven i save mekem hemia i hapen blong evriwan. Yumi evriwan i glad from tempol mared mo from ol blesing we bae yumi kasem taem yumi sil olsem wan famli blong taem we i no save finis. Olsem mama blong mi, mifala i laekem blong talem promes blong Lihae long boe blong hem Jekob se God “i konsekretem ol hadtaem blong yu blong oli kam wan blesing blong yu.” (2 Nifae 2:2). Hemia i go long evri Lata-dei Sent famli, we i komplit o hemia we i no komplit yet. Yumi i wan jos blong famli .

Doktrin mo bilif blong yumi long famli we i no save finis, i fasem yumi mo mekem yumi kam strong. Bae mi neva fogetem promes blong apu man blong mi Harris, taem mifala ol pikinini i stap long fam blong hem kolosap long Paisen, Yuta. Hem i givim mi rabis nius ia se papa blong mi i ded longwe, long Denva, Kolorado. Mi ron i go long bedrum, mi nildaon mo krae bigwan. Apu man i folem mi, i nildaon long saed blong mi mo talem, “Bae mi kam papa blong yu.” Naes promes ia i tajem hat blong mi mo i wan eksampol blong wanem ol apu oli save mekem blong tekemaot responsabiliti taem ol famli o wan famli memba i lus.

Ol paren—hemia we i singgel o mared mo ol narawan olsem ol apu we oli tekem ol responsabiliti ia blong lukaotem ol pikinini—oli ol masta tija. Oli tij plante tru long eksampol. Famli i stret ples blong soem mo lanem ol valiu we i no save finis olsem, hamas mared mo ol pikinini, stamba tingting blong laef, mo tru stamba blong glad i impoten. Hem i stret ples tu blong lanem ol nara impoten lesen long laef, olsem fasin blong stap kaen, fogivnes, ,fasin blong kontrolem yuwan, wetem valiu blong edukesen, mo ones wok.

Yes, plante Jos memba oli gat ol famli memba we oli lavem, we oli no akseptem ol gospel valiu mo diuti . Ol memba olsem oli nidim blong yumi lavem olgeta mo wet wetem olgeta. Wetem ol rilesensip blong yumi, yumi mas tingbaot se ol situesen long laef ya we i mekem yumi wari, i no save stopem yumi blong kam stret evriwan, Bigfala tijing long Ol Doktrin mo Kavenan 138:57–59 i leftemap tingting blong yumi se fasin blong sakem sin mo gro long saed blong spirit, i save gohed long spirit wol afta long laef long wol ia. Taem ol famli oli kam tugeta blong sapotem olgetawan, i moa impoten blong yumi evriwan i save se yumi save kasem fogivnes from ol sin mo ol wiknes we yumi eksperiensem long laef ia, tru long fasin blong sakem sin from Atonmen blong Jisas Kraes we i gat glori mo i sevem man.

Sevya blong yumi Jisas Kraes, Hem i bigfala eksampol blong yumi. Bae yumi kasem blesing sapos yumi laef folem ol tijing mo sakrifaes blong Hem. Stap folem Kraes mo givim yumiwan long seves blong ol narawan i stret meresin blong selfis mo hae tingting we i kam wan nomol samting tedei.

Ol paren tu oli gat diuti blong tijim ol pikinini blong olgeta long ol save blong putum long praktis, we i defren long ol gospel prinsipol. Ol famli oli kam tugeta taem oli mekem ol impoten samting tugeta. Ol garen blong famli oli bildimap ol famli rilesensip. Ol hapi famli eksperiens oli fasem famli strong tugeta. kamp, ol spot aktiviti, mo ol nara aktiviti oli impoten blong holemtaet ol famli. Ol famli i mas kam tugeta blong tingbaot ol bubu blong olgeta, mo hemia bae i lid i go blong tokbaot tempol.

Ol paren oli mas tijim ol pikinini abaot ol skil blong laef, hemia i minim tu ol wok long yad mo long haos. Blong lanem ol lanwis i wan gudfala wei blong stap rere long laef blong tedei mo stap rere blong givim seves olsem wan misinari. Ol paren o apu o ol memba blong famli we i longwe smol, oli save kam ol tija blong tijim ol sabjek ia Ol famli oli gro taem oli stap lan olsem wan grup mo kaonsel tugeta long evri situesen abaot famli mo ol memba blong famli.

Maet sam bae oli talem, “Be yumi nogat taem blong hemia.” Blong mekem taem from wanem we i impoten, plante paren bae oli faenem se oli save onem famli blong olgeta taem olgeta evriwan i ofemol teknoloji blong olgeta. Ol paren, tingbaot, wanem ol pikinini ia oli wantem long taem blong kaekae i blong spendem taem wetem yu.

Ol bigfala blesing i kam long ol famli taem oli prea mo nildaon evri naet mo moning blong talem tangkyu from ol blesing mo blong prea from ol nid blong famli. Ol famli oli kasem blesing taem oli wosip tugeta long ol jos seves mo ol nara ples blong wosip. Ol famli rilesensip i kam moa strong tru long ol famli stori, taem yumi mekem ol famli tradisen, mo serem ol tabu eksperiens blong yumi. Presiden Spencer W. Kimball i rimaenem yumi se “ol stori blong insperesen we i kam long yumiwan mo hemia blong ol bubu blong yumi … oli ol tijing tul we i gat paoa.” Fulap taem, oli ol stret stamba blong insperesen, blong yumi mo fiuja jeneresen blong yumi.

Mi testifae long Lod Jisas Kraes we i Stret Pikinini Ia Nomo blong God, Papa ia we I No Save Finis. Hem i invaetem yumi blong folem kavenan rod ia we i lidim yumi i go blong joenem wan famli we i no save finis. Ol siling paoa blong prishud, we oli kam tru long ol ki we oli kambak long Ketlan Tempol, i mekem ol famli i kam tugeta blong taem we i no save finis (luk long Ol Doktrin mo Kavenan 110:13–16). Hemia i stap hapen tru long namba blong ol tempol blong Lod, we i stap kam antap, raon long wol. Gospel ia i tru. Letem yumi kam pat long hem, mi prea long nem blong Jisas Kraes, amen.