Stap Stretem Yufala Wetem God

Taem mi stadi long ol skripja, mi kam krosem ol toktok we oli oli tajem mi bigwan, from oli gat spesel mining olsem wan risal blong ol eksperiens we mi bin kasem truaot long laef blong mi. Mi spendem laef blong mi blong wok olsem wan faenens investigeta. Folem situesen ia, toktok ia stretem yufala bakegen i bin pulum tingting blong mi taem mi stap ridim ol skripja. Wok blong mi i blong stretem ol amaon we oli ripotem wetem ol rekod blong faenens taem mi yusum ol skil blong mi blong akaonting, odit mo investigeta. Long narafala toktok, gol blong mi i blong mekem ol faenens ripot i go stret wetem orijinol dokumen, blong mekemsua se oli stret evriwan mo i no gat mistek. Mi wok strong wetem strong tingting blong stretem plante samting we oli defdefren, mo hem i nomol se iven blong stretem ol smosmol samting, i nidim bigfala taem.

Aposol Pol i bin prea wetem Ol Man Korin blong oli stap “stretem olgeta wetem God.” Blong stretem yumi wetem God i minim blong putum yumi kambak wan wetem God, o blong putumbak wan rilesensip wetem God we i bin lus o brok, from ol sin o ol aksen blong yumi. Blong mekem hemia i simpol, stretem yumi wetem God i minim blong putum tingting mo ol aksen blong yumi i go stret wetem tingting blong God o, olsem we Presiden Russell M. Nelson i bin tijim, blong stap letem God i win long laef blong yumi.

Olsem we ol skripja oli tijim, yumi fri blong tekem aksen blong yumiwan, “blong jusum rod blong ded we i no gat en, o rod blong laef we i no save finis.” Be sapos yumi no wok strong wetem strong tingting, fridom ia blong tekem aksen blong yumiwan bae i save lidim yumi i go longwe long tingting blong God.

Profet Jekob i bin tijim se taem yumi luksave se yumi no stap folem tingting blong God o no stap stret wetem Hem, wei ia nomo blong mekem i kam gud bakegen i blong “stretem [yumi] wetem [God] tru long atonmen blong Kraes.” Yumi mas luksave se blong stretem yumi i dipen long sore, i minim se aksen blong gladhat we Jisas Kraes i bin tekem, blong atonmen i mekem hemia i posibol.

Taem yu tingting hevi long laef blong yuwan, tingbaot wan taem we yu bin filim se yu stap longwe long Papa long Heven from se yu bin muv i go longwe long Hem. Eksampol, maet yu nomo stap wokhad wetem strong tingting blong mekem ol prea blong yu i go long Hem o blong stap kipim ol komanmen blong Hem. Semmak olsem taem yumi jusum blong go longwe long God, yumi mas stat blong traehad blong stretem yumi. Lod i tokbaot bigwan responsabiliti blong yumi taem Hem i bin talem se, “Kam kolosap long mi mo bambae mi kam kolosap long yufala; lukaotem mi wetem strong tingting mo bambae yufala i faenem mi; askem mo bambae yufala i kasem; noknok, mo bae i open long yufala.”

?Olsem wanem nao Sevya i helpem yumi blong putumbak mo stretem impoten rilesensip ia? Long mi, mi bin mekem bigfala progres long rod blong mi blong stretem mi wetem God taem mi folem kaonsel we Presiden Nelson i bin tijim mo blong sakem sin evri dei. Risen blong hemia i we fasin blong stretem man i soem wan rilesensip we i bin brok mo i kam gud bakegen, speseli bitwin God mo ol man, blong stap karemaot sin we i stap blokem man long God.

Wan long ol gudfala fasin blong stretem man wetem God yumi ridim abaot Inos insaed long ol skripja. Wan samting long laef blong hem i mekem hem i go longwe long God. Hem i soem long yumi wei blong dipen long Atonmen blong Jisas Kraes blong stretem yumi wetem God. Hem i eksplenem filing blong hem blong wantem sakem sin wetem tingting we i stap daon, tingting blong hem i stap nomo long hemia, mo gat strong paoa long tingting blong mekem. Fasin blong hem blong stretem hem wetem God i bin kam tru taem wan voes i bin kam long hem mo talem, “Inos, mi mi fogivim ol sin blong yu, mo bae mi blesem yu.” Inos i luksave paoa blong fasin blong sakem sin mo fasin blong stretem hem we i bin kam long hem mo hem i talem se, “Mo mi, Inos, mi bin save we God i no save giaman; taswe, hem i bin tekemaot ol rong blong mi.”

Fasin blong stretem yumi i no karem pis nomo i kam taem yumi gat ol filing blong sem be tu, i karem pis i kam i raonem yumiwan mo wetem ol narawan. Hem i hilim ol rilesensip, i mekem ol hat i kam sofsof mo i givim paoa long yumi taem yumi stap olsem wan disaepol mo i mekem tras blong yumi long God i kam antap. Wanem we i tekem bigfala hop mo tras i kam long mi, i wan nara risal blong fasin blong stretem yumi wetem God, mo Inos i tokbaot hemia taem hem i talem se, “Mo afta mi, Inos, mi bin harem ol toktok ia, fet blong mi long Lod i stat blong i nomo seksek.”

Taem mi bin wan boe, bubuman blong mi long saed blong mama, i gat wan ples we oli planem ol bigfala tri blong jeri frut. Mi gat janis blong wok long garen blong jeri, plante taem long sama, long taem blong karemaot ol raep jeri. Olsem wan boe we i yang tumas, mi luk se, plante taem bae oli givim wan baket long mi mo afta oli sendem mi i go antap long tri blong pikimap ol jeri.

Fasin blong karemaot ol raep jeri i jenis bigwan taem we bubuman blong mi i pem wan masin we oli singaotem jeri seka. [masin blong seksekemaot ol jeri frut long tri]. Masin ia i holemtaet stamba blong tri mo seksekem we i mekem ol jeri oli foldaon aot long tri i go long ol net we oli yusum blong kolektem ol jeri. Mi luk se taem we masin i stat blong seksekem tri, kolosap evri jeri bae oli foldaon aot long tri long seken nomo. Mi luksave tu se i nomata sapos masin i seksekem tri blong 10 seken o wan ful minit, sam jeri bae oli no foldaon. I tru se i no gat eni samting i save sekemaot olgeta.

Blong stap seksekemaot ol jeri long wan tri i posibol from se smol branj we i holem frut i drae. Proses blong jenis ia i mekem ol skin bitwin smol branj blong jeri mo tri i no strong. From hemia, hem i isi blong smol branj blong wan raep jeri i kamaot long wan tri from se koneksen ia i slak.

Insaed long ol skripja, yumi lanem se branj blong Jese i wan toktok we i minim Mesaea, Jisas Kraes we oli bin profesae se bae Hem i kamaot long laen blong Jese, papa blong King Deved. Semmak olsem jenis we i hapen long wan frut we i grin i go raep, hemia i mekem koneksen blong wan smol branj blong jeri frut i kam slak, olsem fasin blong no obei, gat ol tu tingting mo fraet i save mekem koneksen blong yumi long branj blong Jese o Jisas Kraes i kam slak mo i mekem yumi i kam isi blong oli seksekemaot yumi mo seperetem yumi long Hem. Hamas we yumi save stap fetful, yumi mas lukaot blong no mekem koneksen blong yumi long Jisas Kraes i kam slak.

Long Doktrin mo Ol Kavenan, iven olgeta we oli stap fetful, oli kasem wan woning se: “Be i save hapen tu se man i save lusum gladhat mo i aot long God we i stap laef.” Lod i gohed se, “Yes, mo tu, olgeta we oli kam tabu oli mas lukaot gud tu.” Blong no foldaon, Lod i kaonsel se, “From hemia, jos i mas lukaot gud mo i mas prea oltaem, sapos no, bae oli foldaon long temtesen.”

Maet wan i stap long situesen we i isi blong foldaon, i go wetem wanem ol skripja oli tokbaot se, oli raep blong oli prapa spolem olgeta from risal blong ol aksen blong olgeta. Toktok ia oli save yusum tu plante blong talem wan situesen we samting i stat blong roten, samting i stat blong kam nogud, o valiu i stap godaon we i mekem se i save foldaon o kam nogud tumas.

?Wanem nao toktok ia kam raep gud i ripresentem? ?Hemia i minim se yumi kasem wan poen we i mekem se yumi no save jenis? No, mi ting se hemia i minim se yumi save kasem wan poen long wan taem we yumi no wantem jenis. Blong kamaot long situesen ia blong stap kam raep long fasin nogud, i taem yumi mekem ol samting ia we bae i mekem koneksen blong yumi long Jisas Kraes i kam moa strong. Olsem we mi bin tokbaot, fasin blong sakem sin i bin lidim Inos blong kasem poen ia we fet blong hem i no save seksek. I gat paoa long fasin blong sakem sin—long evri dei fasin blong sakem sin we yumi mekem wetem strong paoa long tingting. Olsem we Presiden Nelson i bin tijim yumi se, “Blong save progres, i no gat wan samting we i mekem yumi moa fri, gat moa gud fasin, o i moa impoten bitim blong stap lukluk evri dei long fasin blong sakem sin.”

Blong ademap long prijing blong fasin blong sakem sin, profet Jekob i bin tijim se blong stap luksave han blong God long laef blong yumi, stap lukaotem mo kasem revelesen, mo stap lisin long God taem Hem i toktok, evri samting ia oli helpem yumi blong stanap strong. Jekob i bin tijim tu se, “Taswe, mifala i stadi long ol toktok blong ol profet mo mifala i kasem plante revelesen mo spirit blong profesi; mo from mifala i gat ol witnes ia mifala i kasem wan hop; mo fet blong mifala i kam we i nomo seksek.” Blong stap lisin mo tekem aksen folem ol toktok mo ol invitesen blong ol profet mo ol aposol, hemia i save fulumap yumi wetem hop, tras mo paoa, we i mekem fet blong yumi i nomo save seksek.

Mi bin lanem se blong wantem blong stretem yumi wetem God, i mas kam wetem tingting ia blong wantem sakem sin. Blong stap sakem sin mo stap eksperiensem ol blesing blong Atonmen blong Jisas Kraes, bae i lidim yumi blong gat fet we i no save seksek. Fet we i no save seksek, oltaem i stap lid i go long tingting ia blong wantem blong stretem yumi wetem God. Hemia i wan paten we i stap go raon nomo o stap ripripit oltaem.

Ol brata mo sista, mi invaetem yu blong stap stretem yuwan wetem God tru long Atonmen blong Jisas Kraes. Mi testifae se blong stap mekem mo stap kipim ol kavenan, i mekem koneksen blong yumi wetem Sevya i kam strong, from hemia i mekem yumi stap longwe long fasin blong kam raep long nogud fasin. Mi testifae se fasin ia blong stretem yumi wetem God tru long Atonmen blong Jisas Kraes, i lid i go long fet we i no save seksek.

Mi save Papa long Heven i lavem yu mo mi, mo Hem i sendem Pikinini blong Hem we Hem i lavem tumas, Jisas Kraes, blong stap olsem Sevya, Ridima mo Man blong Stretem Gud yumi. Mi testifae abaot Jisas Kraes mo talem olsem long nem blong Jisas Kraes, amen.