Flasem Yu Wetem Klin Fasin blong Kontrolem Yuwan

Long Mei 2021, taem Presiden Russell M. Nelson i stap visitim wok blong renovesen blong Sol Lek Tempol, hem i sapraes long hadwok blong ol paeonia we, wetem smol risos mo strong fet, oli bildim bigfala tabu bilding ia, wan naesfala wok long saed blong laef mo long saed blong spirit, we i bin stanap strong blong wan longfala taem. Be hem i luk tu se fandesen ston we oli bin stanemap blong fastaem, i stat blong gat ol hol from ren i stap wasemaot graon we i mekem bilding i no stap strong mo i soem klia se i nid blong mekembilding ia i kam strong moa.

Profet blong yumi we yumi lavem tumas i bin tijim yumi afta se, olsem we i nidim blong tekem ol bigfala step blong mekem fandesen blong tempol i kam strong moa blong i save stap strong long taem blong ol disasta, yumi tu yumi nid blong tekem ol step we i moa spesel—maet ol step we yumi neva tekem bifo—blong mekem fandesen blong yumiwan long Jisas Kraes i kam strong moa long saed blong spirit. Long mesej blong hem we bae yumi tingbaot oltaem, hem i lego tu bigfala kwestin long yumi blong luklukbak long yumiwan mo askem: “?Fandesen blong yu i strong olsem wanem? Mo ?Wanem nao yu nidim blong mekem testemoni mo andastaning blong yu long saed blong gospel i kam strong moa?”

Gospel blong Jisas Kraes i givim yumi ol tabu insperesen mo ol moa gud wei blong stopem ol graon we ren i wasemaot long saed blong spirit insaed long ol sol blong yumi mo wetem moa paoa i mekem fandesen blong yumi i strong moa mo helpem yumi blong nogat ol hol long fet blong yumi mo mekem tugeta testemoni mo andastaning blong yumi long ol tabu trutok blong gospel i stap strong. Wan spesel prinsipol we i stret gud blong kasem stamba tingting ia i stap long seksen 12 blong Doktrin mo Ol Kavenan, wan revelesen we i kam long Profet Josef Smit i go long Josef Knight we i wan stret mo gud man we i wantem tumas blong save andastanem tingting blong Lod, i no blong mekem hem i jenis blong man i save luk, be blong stanap strong olsem wan disaepol mo no muvmuv—“strong olsem ol laet blong heven we i saen strong.” Lod Hemwan i talemaot se:

“Luk, mi toktok long yu, mo tu, long olgeta evriwan we oli wantem tumas blong mekem wok ia i kamtru mo stanemap wok ia;

“Mo i no gat wan i save givhan long wok ia sapos nomo hem i putum tingting blong hem i stap daon mo hem i fulap long lav, mo i gat fet, hop, mo bigfala hat, i save kontrolem hem long eni samting, nomata wanem wok oli givim long hem blong mekem.”

Instraksen blong Sevya we oli rekodem long tabu revelesen ia, i rimaenem yumi se, fasin blong kontrolem yuwan i wan impoten wei blong gat wan strong fandesen long Jisas Kraes. Hem i wan long ol klin fasin we yumi nidim long laef, i no blong olgeta nomo we oli singaotem olgeta blong go long wan misin, be blong evriwan tu we oli bin mekem ol tabu kavenan wetem Lod mo akseptem blong stap fetful blong folem Hem. Fasin blong kontrolem yuwan i go gud wetem ol nara fasin olsem hemia blong Kraes, olsem we oli talemaot long revelesen ia: fasin blong putum tingting i stap daon, fet, hop, bigfala lav mo klin lav we i kam tru long Hem bae i kam moa strong. Moa long hemia, taem yusum fasin blong kontrolem yuwan, hem i gat moa mining from i protektem ol sol blong yumi agensem ol graon we ren i wasemaot long saed blong spirit we yumi no luksave be sloslo i stap lus hemia from ol paoa blong wol i mekem se fandesen blong yumi long Jisas Kraes i nomo strong.

Long medel blong ol fasin we i flasem tru fasin blong stap ol disaepol blong Kraes, fasin blong kontrolem yuwan i wan fasin we Sevya Hemwan i gat, wan spesel frut blong Spirit, we i gat i stap blong evriwan we oli akseptem tabu paoa blong spirit. Hem i klin fasin ia nao we i karem pis i go insaed long hat, stretem ol tingting blong hat mo stretem ol filing wetem waes tingting mo long wan kwaet wei. Insaed long ol skripja, oli tokbaot fasin blong kontrolem yuwan olsem wan impoten pat long laef blong yumi blong kam antap llong saed blong spirit, we i mekem se yumi save gat fasin blong save wet longtaem, fasin olsem hemia blong God, mo fasin blong gat sore mo lav, taem yumi stap mekem ol filing, ol toktok mo ol aksen blong yumi i kam klin gud.

Ol disaepol blong Kraes we oli traehad blong yusum fasin ia olsem hemia blong Kraes, oli kam antap wetemfasin blong putum tingting i stap daon mo fulap wetem lav. Wan paoa blong pis insaed long olgeta i gro, mo oli gat moa paoa blong stopem fasin blong kros, stap kam antap long fasin blong save wet longtaem, mo stap tritim ol narawan we oli gat defren bilif wetem respek mo hona, iven taem ol win blong agens oli blo strong tumas. Oli traehad blong no tekem aksen kwiktaem be oli jusum blong tekem aksen wetem waes tingting long saed blong spirit, we fasin blong no stap flas i lidim olgeta wetem kwaet paoa blong Tabu Spirit. Long wei ia bae oli no kwik blong harem nogud long ol graon we ren i wasemaot long saed blong spirit from, olsem we Aposol Pol i bin tijim, oli save se oli save mekem evri samting tru long Kraes, we i mekem olgeta oli strong iven taem oli fesem ol hadtaem, we i save muvmuvum testemoni blong olgeta abaot Hem.

Long Leta blong hem i go long Taetas, Pol i givim ol tabu kaonsel abaot ol kwalifikesen blong olgeta we oli wantem blong ripresentem Sevya mo mekem tingting blong Hem wetem fet mo komitmen. Hem i talem se oli mas kam ol man we oli stap tekem strenja i kam long haos blong olgeta mo oli waes, oli mas stret man we oli tabu—ol kwaliti we oli soemaot klia paoa blong fasin blong kontrolem olgetawan.

Be, Pol i givim woning se oli “no mas gat rabis poen long olgeta, oli mas man we tingting blong olgeta i no go antap tumas mo oli no save kros kwik, … [mo] no man blong faet.” Ol kaen fasin olsem ia oli no semmak long maen mo ol tijing blong Sevya mo oli mekem i had tumas blong gro long saed blong spirit. Insaed long toktok blong skripja, “no mas gat rabis poen long olgeta” hem i wan we i no akseptem blong man i luk daon long hem mo hem i gat hae tingting; “no save kros kwik” hem i wan we i no akseptem ol nomol samting we i save stap hapen truaot long laef mo hem i kam man we i isi blong kros mo harem nogud; mo hem i “no mas man blong faet” i minim wan we i no wantem blong rao, atak mo talem ol strong toktok mo mekem aksen we i save mekem wan i fraet, long bodi mo long filing. Taem yumi traehad blong jenisim fasin blong yumi wetem fet mo tingting we i stap daon, yumi save hang strong long strong ston blong gladhat blong Hem mo kam klin gud mo saen olsem ol tul long ol tabu han blong Hem.

Blong luklukbak long nid ia blong yusum klin fasin blong stap kontrolem yuwan, ol toktok blong Hana, mama blong profet Samuel i rimaenem mi—wan woman we i gat bigfala fet we, iven afta long ol bigfala hadtaem, hem i mekem wan singsing blong talem tangkyu long Lod. Hem i talem, “Olgeta. Yufala i stap leftemap yufala long ol flas tok ya blong yufala, be yufala i mas lego fasin ya, yufala i mas stap kwaet. Hae God ya, hem i wan God we i save olgeta samting, mo hem i stap jajem ol fasin we ol man oli stap mekem.” Singsing blong hem i moa long wan prea—hem i wan invitesen long hemwan blong tekem aksen wetem tingting we i stap daon, blong save kontrolem hemwan, mo folem gud standet. Hana i rimaenem yumi se, tru paoa long saed blong spirit oli no soem long ol kwik aksen o ol toktok wetem hae tingting, be tru long fasin blong stap kontrolem yuwan, ol gudfala fasin oli go gud wetem waes tingting blong Lod.

Plante taem wol i stap traem blong talem se ol strong fasin blong kros, hae tingting, fasin blong no save wet longtaem, mo no save kontrolem yuwan, oli oraet nomo from tumas presa evri dei long laef mo plante man oli stap mekem olsem. Taem yumi no folem klin fasin blong stap kontrolem yumiwan, mo no wantem save long naesfala paoa blong Tabu Spirit long taem we yumi mekem samting mo toktok, bae i isi blong enemi i trikim yumi, we i tru, bae i lidim yumi blong talem ol toktok mo akseptem ol fasin we biaen bae yumi rigret, maet long sosol laef blong yumi, long famli o iven long ol rilesensip blong yumi wetem ol narawan long jos. Gospel blong Jisas Kraes i invaetem yumi blong yusum klin fasin ia speseli long ol taem we i gat jalenj, from we ol kaen taem ia nao bae wan i save soemaot tru fasin blong hemwan. Olsem we Martin Luther King Junia i bin talem long wan taem se, “Long en, wan man o woman bae i soemaot tru fasin blong hemwan i no long taem we hem i gat kamfot mo ol taem we hem i stap glad, be bae hem i soemaot long ol taem we hem i stap fesem jalenj mo ol agens.”

Olsem ol kavenan pipol, oli singaotem yumi blong laef wetem ol hat we i stanap strong long ol tabu promes we yumi bin mekem i go long Lod, mo blong stap folem gud paten we Hem i bin putum i stap tru long eksampol blong Hem we i stret gud evriwan. Afta, Hem i promes se, “I tru, i tru, mi talem long yufala, se hemia i doktrin blong mi mo huia we i bildimap hem long hemia hem i bildimap hem antap long strong ston blong mi, mo ol get blong hel oli no save win agensem hem.”

Ministri blong Sevya long wol, oli bin makem tru long klin fasin blong stap kontrolem Hemwan long evri samting we Hem i bin mekem. Tru long gudfala eksampol blong Hem, Hem i bin tijim yumi se “long ol hadtaem, yu mas gat fasin blong save wet longtaem, yu no mas tok nogud agensem olgeta we oli stap tok nogud.” Taem Hem i tijim se yumi no mas foldaon long fasin blong kros long taem blong no agri mo ol raorao, Hem i talemaot se, “Yufala i mas sakem sin, mo kam olsem wan smol pikinini.” Mo tu, Hem i bin tijim se olgeta we oli wantem blong kam long Hem wetem evri tingting blong hat, oli mas stretem olgetawan wetem olgeta we oli kros long olgeta o wetem olgeta we oli gat wan samting agensem olgeta. Wetem fasin blong stap kontrolem Hemwan mo wan hat we i gat sore mo lav, Hem i promesem yumi se taem wan i tritim nogud yumi, i no kaen, i no gat respek o i no kea long yumi, bae fasin blong Hem blong stap kaen i no aot long yumi, mo bae kavenan blong pis blong Hem i stap oltaem long ol laef blong yumi.

Sam yia i pas, mi mo waef blong mi i bin gat spesel tabu janis ia blong mitim sam long ol fetful memba blong Jos long Meksiko Siti. Plante long olgeta, nomata tru olgetawan, o tru long olgeta we oli lavem, oli bin stanap strong tru ol bigfala hadtaem, olsem, fasin blong kidnapem wan, kilim man i ded mo ol nara bigfala aksiden we i mekem man i safa mo i brekem hat.

Taem mitufala i lukluk long ol fes blong Ol Sent ia, mitufala i no luk se oli kros, gat filing blong komplen o wantem blong givimbak. Be, mitufala i luk fasin blong putum tingting i stap daon we i kwaet. Nomata se oli gat fes blong harem nogud, be yet i soemaot wan tru filing se oli wantem tumas blong kasem hiling mo kamfot. Nomata se hat blong olgeta i bin brok from ol safaring, ol Sent ia oli muv i go fored wetem fet long Jisas Kraes taem oli stap jusum blong no letem ol hadtaem blong olgeta i kam ol hol long fet blong olgeta o jenisim testemoni blong olgeta long gospel.

Long en blong tabu taem ia we oli kam tugeta, mitufala i talem halo long wanwan long olgeta. Evri sekhan, evri hag, oli kam wan kwaet testemoni, we wetem help blong Lod, mitufala i save jusum blong ansa wetem fasin blong stap kontrolem mitufalawanlong ol harem nogud mo ol jalenj blong laef. Kwaet mo hambol eksampol ia i givim wan naesfala invitesen blong wokbaot long rod blong Sevya wetem fasin blong kontrolem yuwan long evri samting. Mitufala i filim olsem se mitufala i stap wetem ol enjel.

Jisas Kraes we Hem i bigwan bitim evri samting, i bin safa from yumi kasem taem blad blong Hem i ron aot long evri hol blong skin, be yet, Hem i neva letem filing blong kros insaed long hat blong Hem, o blong mekem strong aksen, o go agensem wan, o talem ol rabis toktok, iven long medel blong ol hadtaem olsem. Wetem fasin blong stap kontrolem yuwan we i stret gud evriwan mo tingting blong hat we i stap daon we i bigwan, Hem i no tingting long Hemwan be long wanwan long ol pikinini blong God—bifo, naoia mo long fiuja. Aposol Pol i testifae abaot gudfala fasin blong Kraes, taem hem i talemaot se: “Taem ol man oli tok nogud long hem, hem i no tok nogud bakegen long olgeta. Taem oli mekem hem i harem nogud tumas long bodi blong hem, hem i no talem se bambae i givimbak fasin ya long olgeta. Hem i putum tingting blong hem i stap strong long God, we i stap jajem ol man long stret fasin.” Iven long medel blong ol bigfala harem nogud blong Hem, Sevya i soemaot tabu fasin ia blong stap kontrolem Hemwan we i stret gud evriwan. Hem i talemaot se, “Be, glori i go long Papa, mo mi dring mo mi finisim wok blong mi blong mekem rere evri samting blong gud blong ol pikinini blong man.”

Ol brata mo sista blong mi we mi lavem tumas, mi givimaot wan invitesen we i kam long hat blong mi i go long yumi evriwan blong flasem maen mo hat blong yumi wetem klin fasin olsem hemia blong Kraes blong gat fasin blong stap kontrolem yuwan, olsem wan tabu ansa long singaot blong profet blong yumi dia Presiden Russell M. Nelson. Taem yumi traehad wetem fet mo wetem fasin blong wok strong wetem strong tingting, blong gat long yumi fasin blong stap kontrolem yumiwan long ol aksen mo ol toktok blong yumi, mi testifae se hemia bae i mekem laef blong yumi i kam strong moa mo mekem laef blong yumi i hang strong long wan sua fandesen blong Ridima blong yumi.

Mi talem tru testemoni blong mi se blong gat fasin blong stap kontrolem yumiwan oltaem, bae i mekem sol blong yumi i kam klin gud mo mekem hat blong yumi i kam tabu long fored blong Sevya, i mekem yumi kam kolosap gud long Hem mo stap mekem yumi rere wetem hop mo pis from dei ia we i fulap long glori, taem bae yumi mitim Hem long Seken Kaming blong Hem. Mi serem ol tabu toktok ia long nem blong Sevya blong yumi, Jisas Kraes, amen.