Lod i Lukluk long Hat
Evri samting we God i nidim blong mekem ol plan blong Hem i kamtru mo blong helpem yumi blong kam olsem we Hem i wantem, hem i blong yumi tanem hat blong yumi fulwan i go long Hem.
Taem hem i kasem komanmen blong jusum niu king blong Isrel long ol pikinini boe blong Jesi, profet Samuel, hem i luk Eliab, pikinini ya blong Jese, nao i stap tingting se, “Man ya we i stap stanap long fes blong Hae God, ating hem nao we hem i jusumaot.” Be Eliab, God i no bin jusum hem olsem wokman blong Hem. Lod i bin talem long profet Samuel se: “Fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long hat blong hem”
Nomata se David hem i no strong long saed blong bodi o nogat plante save olsem ol bigfala brata blong hem, hat blong hem i bin strong long ae blong God. Hem i lavem God wetem ful hat blong hem mo gat strong tingting blong obei long Hem. Hem i gat fet long lav, paoa, mo ol promes blesing blong God we i no hafhaf, olsem we hem i soem taem hem i faet wetem Golaeat wetem paoa blong Lod.
Stori ia i tijim yumi se samting we God i nidim blong mekem ol plan blong Hem i kamtru mo blong helpem yumi blong kam olsem we Hem i wantem yumi blong kam, hem i blong yumi tanem hat blong yumi fulwan i go long Hem. Long wan loya, Hem i talem, “Yu mas lavem Hae God* ya we i God blong yu long olgeta hat blong yu.” Long profet Josef Smit Hem i talem: “Luk, Lod i askem blong mas gat wan hat mo wan maen we i wantem mekem samting.” Olsem we Hem i talem long Ol Man blong Nifae: “Mo bae yufala i mekem olsem wan sakrifaes long mi, wan hat we i fulap wetem sore mo wan spirit we i wantem blong sakem sin.”
?From wanem nao i olsem? Sevya i tijim se sapos ol hat blong yumi i tanem fulwan i go long Hem, from sakrifaes blong Hem blong pemaot yumi long sin, bae Hem i blesem yumi wetem paoa mo ol presen long saed blong spirit. Yumi nidim ol presen ia blong winim ol jalenj blong laef ia, stanap strong agensem temtesen, kasem daereksen mo andastaning, mo filim glad mo pis long laef blong yumi. “Aot long ol smol samting, ol samting we oli bigwan oli kamaot.” Hem i talem se Hem i save “mekem ol samting we oli no strong, oli kam strong.” mo blesem yumi wetem evri samting we yumi nidim blong laef gud long wol ia mo kasem laef we i no save finis. “Olgeta we tingting blong olgeta i klin gud,” Hem i talem, “oli save harem gud, from we bambae oli save luk God.”
Mi biliv se hemia from wanem, pat blong risen we, Jisas Kraes i stretem ol tija blong loa mo ol Farisi plante taem long ministri blong hem long wol. From nomata oli fetful blong kipim ol loa blong Hem, olgeta oli bin mekem from ol rong risen. Lod i wonem olgeta, Hem i talem se, “Ol man ya oli stap ona long mi long ol toktok blong olgeta nomo, be tingting blong olgeta i longwe tumas long mi.”
Hemia hem i wan strong rimaenda long olgeta disaepol blong Hem se hem i no abaot wanem yumi mekem nomo—hem i abaot ol toktok mo aksen blong yumi—mo from wanem nao yumi mekem wanem we Jisas Kraes i askem yumi blong mekem—ol tingting blong yumi mo risen biaen long ol aksen. Hem i talem, “From we mi, Lod, bae mi jajem evri man folem wok blong olgeta, folem wanem we hat blong olgeta i wantem.” Papa blong yumi long Heven i wantem yumi ol pikinini blong Hem blong obei mo givim seves wetem tru hat, be i no blong mekem nomo from oli askem yumi blong mekem. Hem i wantem yumi blong mekem olgeta samting ia wetem wan tru hat, from we yumi lavem Hem wetem ful hat blong yumi. Hem i wantem yumi blong wantem blong kam moa olsem Hem.
Nao, sapos wari blong Sevya hem i helt blong hat blong yumi long saed blong spirit—?wanem nao Hem i stap lukaotem long wan tru disaepol—?olsem wanem nao yumi save jekem gud ol hat blong yumi mo save se i stret long ae blong God?
I no longtaem i pas, taem mi mo waef blong mi i kambak long misin blong mitufala long Potugal, mitufala i go tru long ol tes blong helt blong jekem bodi blong mitufala. Sam long ol tes ia i lukluk long helt blong hat blong mitufala—olsem blad tes, skan blong hat, mo ol tes blong wari. Mi bilivim se Sevya i givim long yumi sam tes long saed blong spirit we yumi save yusum blong jekem ol hat blong yumi long saed blong spirit. Letem mi serem sam long ol tes ia wetem yu.
Stap Jekem ol Hat blong yumi long Saed blong Spirit
Faswan, Stamba Lukluk blong Yumi, ol Impoten Samting we i Pusum Tingting blong yumi long Laef.
“From we long weples we ol gudgudfala samting blong yufala i stap long hem, be oltaem tingting blong yufala tu i stap long ples ya,” Jisas i tijim. Wan gudgudfala samting i wan samting we i gat valiu long yumi, we yumi hadwok from mo lukluk plante long hem. Yumi jusum blong spenem taem blong yumi mo lukluk moa long hem. Wanem we i pusum tingting blong yumi blong mekem ol samting we yumi mekem, i soem ol tingting blong hat blong yumi. Sevya i givim woning ia se nomata se Hem i singaot plante i kam long Hem, Hem i jusum sam nomo “From se hat blong olgeta i stap tumas long ol samting blong wol ia, mo oli wantem kasem ol ona blong man.” ?Mi mi stap mekem Sevya i kam faswan long laef blong mi? ?Ae blong mi i lukluk nomo long glori blong Hem long evri samting we mi mekem?
Nambatu, Hamas Yumi Wantem blong Obei long ol Komanmen blong God.
Long ol skripja, Lod mo ol profet blong Hem oli tokbaot fasin blong tinghae mo fasin blong no obei tugeta wetem hat we i strong tumas. Nifae i leftemap tingting blong ol brata blong hem, i talem se: ““?Weswe nao i hapen se yufala i no obei long ol komanmen blong Lod? ?Weswe nao i hapen se bae yufala i ded, from hat blong yufala i strong?” Lod i givim woning long ol Sent blong Misuri se, “Be hem we i no mekem wan samting kasem taem nomo we mi talemaot long hem blong mekem, mo hem i kasem wan oda wetem wan hat we i gat tu tingting, mo i mekem folem oda ia wetem fasin blong stap les, bae devel i stap kontrolem hem.” Sevya i no askem yumi blong kam stret evriwan blong stap kipim ol komanmen blong Hem, be Hem i askem blong yumi wantem blong traehad blong kipim ol komanmen wetem ful hat blong yumi.
Namba tri, Strong Tingting blong yumi blong Stap Stadi oltaem long ol Skripja mo stap Lukaotem Revelesen
Lod i wonem Oliva Kaodri blong “holemtaet gud olgeta toktok ia long hat blong yu.” Oli invaetem yumi blong gat strong tingting blong lukaotem ol skripja, mo tru long paoa blong Tabu Spirit, lukaotem blong kasem andastaning mo witnes long trutok blong gospel long hat blong yumi.
Profet Abinadae i tok long ol giaman pris blong King Noa from oli no mekem hemia, hem i talem, “Yufala i no putum fulwan hat blong yufala blong andastanem samting; from hemia, yufala i no bin waes.” ?Mi mi stap traehad blong stadi ol skripja evri dei wetem wan tru hat mo mekem hat blong mi i andastanem olgeta tru long prea?
Nambafo, ol Tingting mo Toktok blong Yumi.
Sevya i tijim se “from we long tingting blong man nao, ol rabis tingting olsem, oli save kamaot. ” mo se “Taem man i tok, hem i stap talemaot ol samting we tingting blong hem i fulap long hem.” Kwaliti blong ol tingting mo ol toktok blong yumi, hem i wan gudfala saen we i soemaot hamas hat blong yumi i klin. ?Mi stap gat tumas nogud tingting abaot aksen blong ol nara man o risen biaen long aksen ia o iven abaot miwan? ?Mi hariap tumas blong jajem mo talem nogud nara man? ?Mi mi stap faenem ol eskius o faet from rong blong mi? ?Mo olsem wanem long ol toktok blong mi? ?Oli leftemap mo givim insperesen long olgeta raon long mi? ?O oli krietem raorao mo mekem man i kros?
Afta we oli finisim ol tes blong bodi blong mi, dokta blong mi i talem long mi se, hat blong mi i helti—be i gat sam samting we mi nid blong wok long hem naoia bifo oli kam series. Hem i givim advaes blong jenisim laefstael blong mi. Semmak long hemia, taem yu jekem hat blong yu long saed blong spirit, bae yu luksave sam nogud saen we oli stat blong kamaot, !plis no fraet! Sevya i bin givim wan nambawan meresin mo tritmen blong helpem yu. !Hem i iven promes blong givim yu wan niu hat! Hemia sam long ol aksen we i save mekem paoa blong hat blong yu long saed blong spirit i kam moa strong.
Mekem Helt blong Hat blong Yu long saed blong Spirit Kam Gud
Faswan, mekem Rilesensip blong Yu wetem Kraes i Kam Moa Strong
Taem yumi givim taem evri dei blong kam kolosap long Kraes, ol hat blong yumi oli jenis. Stadi evri dei long ol skripja, folem wetem prea we i kamaot long hat mo livim kakae oltaem, bae i save mekem lav blong yu long Sevya i kam bigwan, mekem fet blong yu i kam moa strong, mekem yu wantem sakem sin mo givim hat blong yu long God wetem tingting we i stap daon. Tingting long eksampol blong Nifae: “Mi bin prea long Lod; mo luk hem i visitim mi, mo i mekem hat blong mi i kam sofsof, mekem se mi bilivim evri toktok we papa blong mi i talemaot.”
Taem yumi gohed blong fidim gud sid blong fet ia tru long ol tingting mo aksen blong yumi we i stret mo gud, bae hat blong yumi i kam tabu, olsem ol Man blong Nifae: “Be oli bin livim kakae mo oli bin prea plante taem, mo oli kam moa strong mo moa strong long fasin blong olgeta blong putum tingting i stap daon, mo oli kam moa strong moa mo moa strong moa long fet blong Kraes, mekem se oli fulumap sol blong olgeta wetem glad mo fasin blong leftemap tingting blong harem gud bakegen, hem i mekem se hat blong olgeta i kam klin mo tabu, we fasin blong mekem i kam tabu i kam from we oli givim hat blong olgeta long God.”
Nambatu, stretem hat blong Yu Folem wanem Hem i wantem
Sevya i bin tijim se, “Spos yufala i lavem mi, bambae yufala i save obei long ol tok blong mi.” Hem i invaetem yumi blong soem lav blong yumi long Hem taem yumi mekem mo stap kipim ol kavenan wetem Hem. Taem yumi traehad blong kipim ol komanmen blong Hem evri dei, sakem ol sin blong yumi wetem tru hat, gohed blong tekem nem blong hem long yumi mo stretem hat blong yumi folem wanem we Hem i wantem, bae yumi save kasem blesing ia blong gat Tabu Spirit i stap wetem yumi oltaem.
Nifae i testifae se: “Mi save se sapos yufala i folem Pikinini, wetem evri tingting blong hat, mo no mekem fasin blong gat tufes mo no giaman long fored blong God, be wetem tru tingting, yufala i sakem ol sin blong yufala, mo soem long Papa se yufala i glad blong tekem long yufala nem blong Kraes, tru long baptaes … , afta nao bae yufala i kasem Tabu Spirit.” Tabu Spirit bae i gaedem yu mo helpem yu blong save wanem Lod i wantem mo mekem ol gudfala joes.
Laswan, Givim Seves long God mo ol Narawan wetem Ful Hat blong Yu
Sevya i invaetem evriwan blong “wok blong hem wetem ful hat.” Taem yumi jusum blong mekem evri samting we Lod i askem yumi blong mekem—olsem kipim ol komanmen, tekpat long sakramen, stap wosip insaed long tempol, mo stap givim seves long ol narafala man—wetem wan tru hat mo tru tingting, wanwan aksen blong seves mo wosip ia i kam wan eksperiens long saed blong spirit we i gat paoa, we i mekem fet mo testemoni blong yumi i kam strong, mo i fulumap ol hat blong yumi wetem glad mo lav blong God mo ol nara man.
Kwestin blong profet Alma i stap yet tedei: “Yufala i bin bon long God long saed blong spirit? ?Yufala i bin kasem pikja blong hem long fes blong yufala? ?Yufala i ting se yufala i bin kasem bigfala jenis ia long ol hat blong yufala?”
Ol brata mo sista, mi invaetem yufala blong givim ful hat blong yufala long Sevya tedei. Letem evri aksen blong wosip mo seves i kam long tru hat mo tingting. Lego ol samting blong wol ia we oli stap tekem aot lukluk blong yu long Hem mo traehad blong mekem taem blong Lod evri dei long laef blong yufala. Sakem sin mo kambak long Hem wetem ful hat blong yufala, mo Hem bae fogivim yufala mo ol han blong lav blong hem bae oli raonem yufala. No lukaotem ol samting blong wol ia, be jusum blong gat wan ae we i lukluk nomo long glori blong Hem, mo lukaotem ol samting blong wan wol we i moa gud. Hem i save ol tingting mo hat blong yu, mo taem yu kam long Hem, Hem bae i blesem yu wetem paoa, tras, pis, mo glad long laef ia mo wan ples insaed long selestial kingdom blong Hem blong taem we i no save finis.
Mi save se Jisas Kraes i laef. Hem i Ridima blong yumi. Mo Hem i lavem yu mo mi wetem ful hat blong Hem. Long nem blong Jisas Kraes, amen.