Tanem Hat blong Yu i go long Jisas Kraes: Tabu Presen Blong Praemeri Miusik
Ol singsing blong Praemeri oli ol toktok blong ol disaepol blong Jisas Kraes, ol testemoni blong trutok blong gospel we oli kambak fulwan, mo ol prea we oli putum i go long miusik.
Wan long olgeta blesing blong givim seves long Praemeri i we, hat blong mi i lanem blong lavem ol lanwis we mi no toktok long hem. Mi faenem glad taem mi joen wetem ol Sent tru long lanwis we oli serem, long ol tabu miusik. Mo speseli tru long ol simpol singsing blong Praemeri, Tabu Spirit i mekem mi kam blong andastanem moa ol lanwis mo fulumap hat blong mi wetem, smol voes blong Hem. Ol voes blong ol pikinini, oli tijim i klia trutok abaot lav blong God mo Pikinini blong Hem, Jisas Kraes.
Nomata mi no groap long Praemeri, Spirit i tijim mi kwiktaem se ol singsing ia oli tabu mo oli kam pat blong wosip blong miwan. Ol praemeri singsing oli gat tabu paoa long laef blong mi mo leftemap sol blong mi, oli tijim mi ol trutok we i no save finis, mo tekem mi i kam moa kolosap long Sevya mo gospel blong Hem.
Presiden Dallin H. Oaks i bin tijim wantaem se: “singsing blong ol hym i wan long bes wei blong lanem doktrin blong gospel we i kambak.” Ol toktok ia oli tru blong yumi evriwan, be speseli nao ol pikinini. Praemeri miusik i wan long impoten tul we God i laekem blong yusum blong planem ol sid blong testemoni long hat blong ol yang disaepol blong Sevya. Ol paren, lida, mo ol tija oli stap fidim sid ia taem oli testifae mo helpem ol pikinini long ol testemoni blong olgeta long wanem we oli stap mekem blong save Papa long Heven; Pikinini blong Hem, Jisas Kraes mo Tabu Spirit.
Long ol pas yia blong seves blong mi, mi bin spenem taem blong singsing mo lan aot long ol Praemeri miusik taem mi stap tingting hevi long sam kwestin ia:
-
Olsem wanem nao ol singsing blong Praemeri we yumi lanem taem yumi smol, i kam wan lanwis long saed blong spirit we ol pikinini oli yusum blong testifae long ful laef blong olgeta?
-
Olsem wanem nao singsing blong trutok blong gospel i helpem ol pikinini blong tingbaot Lod olsem pat blong kavenan blong olgeta mo rere olgeta from ol odinens blong Hem?
-
Olsem wanem ol singsing blong Praemeri i help blong raetem loa blong God long hat blong ol yang disaepol ia?
Taem Praemeri i stat long 1878, fas presiden, Aurelia Spencer Rogers, i luksave se “singsing i impoten.” Miusik i oltaem impoten blong tijim ol pikinini abaot gospel. Ol singsing blong Praemeri i save kam wan fas lanwis long saed blong spirit from ol simpol, melodi we i talemaot klia ol trutok blong gospel. Ol singsing ia oli gat paoa blong stap wetem ol pikinini ia truaot laef blong olgeta, bae i kam pat long rod ia blong olgeta blong stap wan disaepol mo wan wei long olgeta blong testifae abaot Sevya.
Tijim Doktrin blong Jisas Kraes Tru long Singsing
Ol Praemeri singsing oli save stap tu olsem ol tul we i gat paoa blong tijim doktrin. Sam singsing i talem abaot ol stori blong laef blong Sevya mo wok blong Hem. Ol narawan oli tijim abaot ol fasin blong Hem, olsem fet, hop mo bigfala lav blong Hem. Mo ol singsing we i moa tabu i testifae abaot Atonmen blong Hem we i no save finis mo lav we i kam tru long fasin ia blong pemaot praes.
Wan profet blong Lod, Presiden Russell M. Nelson i bin tijim se: “[Miusik] i save gohed blong stap olsem wan gudfala paoa long taem we ol pikinini oli smol. [Miusik] [i] gat paoa blong givim kaekae long saed blong spirit. Miusik i gat hiling paoa. Miusik i gat paoa blong mekem i isi blong wosip; i letem yumi tingting moa long Atonmen blong [Sevya] mo Restoresen blong gospel, wetem ol prinsipol blong hem blong sevem man, mo ol odinens blong kam olsem wan god. Miusik i givim paoa long yumi blong talemaot tingting blong yumi tru long prea mo serem testemoni abaot ol tabu trutok.”
Olsem ol paren, lida, mo ol tija, efot blong yumi blong helpem ol pikinini oli kasem promes blesing ia, taem yumi tijim ol trutok blong gospel we i stap insaed long miusik wetem stamba tingting. Presiden Nelson i tijim tu se “ol pikinini oli save lanem ol doktrin taem oli lanem blong singsing bitim blong lanem doktrin insaed long wan klas.” Ol singsing ia i save givim ol tijing we i fulap long fet mo lidim ol pikinini i go long Sevya, mo helpem olgeta blong developem fasin blong olgeta blong stap fetful long gospel blong Hem.
Skripja i tijim se ol singsing blong ol stret mo gud man we i kamaot long hat, i wan prea we i go long Sevya. Mi save tingbaot ol naesfala voes blong ol yangfala disaepol blong Sevya, we i givim glad. Mi save se ol singsing blong prea blong olgeta i kasem heven olsem wei blong soem fet, we i invaetem Tabu Spirit blong konfemem trutok we i no save finis, mo talem slo wetem kaen fasin, i invaetem ol narawan blong akseptem singaot blong Sevya blong yumi blong folem Hem mo go hom. Olsem Presiden Henry B. Eyring i rimaenem yumi, hem i long ol taem ia blong filim Spirit, we yumi gat pruf abaot Atonmen blong Sevya se i stap wok long laef blong yumi.
Raetem Trutok insaed long Hat
Praemeri miusik i save stap wan merikel truaot long laef blong ol pikinini blong yumi long rod ia blong stap olsem wan disaepol. Singsing we yumi lanem taem yumi gat sikis yia i gat paoa blong stap wetem yumi—mo i save kambak long yumi afta long ol taem blong mekem desisen, temtesen, harem nogud, o glad. Maet long ol yia we bae kam, ol toktok blong singsing ia, “Bae Mi Folem Plan blong God”, i save stap olsem wan angka long saed blong spirit we i talemaot witnes blong Aposol Paul abaot ol tru promes blong God long yumi. O, oli save rimaenem yumi se from God i kipim ol promes blong Hem, ol kavenan blong Hem i givim bigfala kamfot mo wan sefples mo i invaetem yumi blong putum hop mo tras blong yumi i stap strong long Jisas Kraes mo long tabu paoa blong sakrifaes blong Hem.
Ol adalt memba raon long wol, long ol taem blong hadtaem, oltaem oli tingbaot mo luklukbak long ol Praemeri singsing we oli lanem taem oli ol pikinini. Blong plante, ol singsing ia i sapotem fet blong olgeta long Jisas Kraes we i stap gro mo plante taem, ol fas ples ia nao we laef blong olgeta i jenis tru long gospel blong Hem. Ol papa mo mama, lida, mo ol tija, oli fidim gud fet ia truaot long ol yia taem oli tijim, singsing, mo testifae long ol pikinini wetem kea.
Wan sista i serem wetem mi se hem i laekem Praemeri miusik tumas, mo afta long 20 yia, hem i glad from ol singsing ia oli helpem hem blong gohed blong stap strong long gospel blong Jisas Kraes. Wan narafala memba i testifae se Praemeri i planem wan smol sid blong fet taem hem i yang mo hem i risen ia nao from wanem hem i kambak bakegen long Jos blong Lod, long ol 30 yia blong hem. Sevya i promesem: “Kamfota bae i save tijim yufala long evri samting, mo bae hem i save mekem yufala i tingbaot olgeta samting ya bakegen” Praemeri miusik i save stap wan long ol wei ia we i mekem promes ia i hapen.
Wan narafala Praemeri singsing i soem paoa blong simpol fet mo wan strong testemoni.
Taem ol pikinini oli singsing, oli stap serem tingting blong hat blong wan disaepol mo stap lanem ol wei blong stap laef long kavenan. Spirit i save yusum miusik blong putum ol trutok we i no save finis long ol sofsof hat blong olgeta. Mo long semmak taem, ol pikinini oli save jusum blong filim mo tanem ol hat mo laef blong olgeta i go long Jisas Kraes taem oli mekem mo kipim ol tabu kavenan wetem Hem.
Stap Tingbaot Ol Kavenan Blong Yumi mo Rere from Ol Odinens
Tabu miusik i save help blong raetem doktrin blong Kraes i go long sol mo mekem yumi rere blong kasem ol odinens blong Hem. I joenem doktrin blong Sevya wetem memori blong yumi mo memori ia i go long fasin blong stap olsem wan disaepol long Hem.
Olsem ol Praemeri lida, yumi gat janis ia mo tabu wok ia blong mekem sua se yumi tijim miusik long Praemeri wetem glad, wetem andastaning blong doktrin mo wetem Spirit. Hemia i tekem tu fasin blong stap invaetem ol pikinini blong luksave wanem oli filim taem oli stap singsing, mo helpem olgeta blong luksave se ol filing ia oli kam long Tabu Spirit. Ol efot ia i help blong rere ol pikinini blong yumi blong mekem ol tabu odinens olsem baptaes mo konfemesen, mo tu blong givim insperesen long kavenan memori blong olgeta taem oli riniu ol promes blong olgeta wetem God.
Long Las Kaekae Blong Sevya, afta we Hem i introdiusum sakramen, Matiu i rekodem se “taem oli finis singsing, oli aot i go long hil, we oli singaotem Olif.” Evri wik, ol memba we oli kasem baptaes mo konfemesen long Jos Ia blong Lod we i kambak, we i tekem tu baptaes blong ol pikinini taem oli kasem eit yia, oli rere blong tekem sakramen blong Lod. Blong stap singsing ol tabu miusik, kongregesen blong ol pikinini blong God, oli gat janis ia blong rere ol hat blong olgeta, blong mekem ol tabu odinens ia blong tekem nem blong Hem, blong oltaem tingbaot Hem, mo blong kipim ol komanmen blong Hem.
Endem wetem Testemoni
Ol dia fren, mi testifae se ol Praemeri singsing oli tijim ol trutok we i no save finis mo doktrin we i lidim yumi i go long Jisas Kraes mo gospel blong Hem. Mi invaetem yu blong tingting long ol stamba trutok we oli raetem insaed long ol hat blong yufala, tru long ol simpol tijing blong ol singsing mo blong testifae long ol trutok long ol yang disaepol blong Sevya taem yufala i tijim olgeta gud nius blong gospel tru long ol singsing.
Mi save se God Papa blong yumi, wetem lav blong Hem we i no save finis, i sendem Pikinini blong Hem we Hem i Lavem Tumas i kam long wol blong tijim yumi, soem yumi rod, mo blong pemaot yumi tru long Atonmen blong Hem.
Mi save se laef mo ministri blong Sevya i blong yumiwan mo i tru. Ol skripja oli fulap long ol stori blong Hem blong hiling, fasin blong Hem blong stap kaen, mo ol merikel blong Hem.
Mi save se Papa long Heven i harem mo ansarem ol tru prea blong ol pikinini blong Hem, nomata wanem yia, situesen, o lanwis blong olgeta. Hem i lisin long ol kwaet krae blong hat blong yumi.
Mi testifae se long Getsemane, Jisas Kraes, i tekem hevi samting blong ol sin blong yumi, harem nogud mo soa long bodi long Hemwan. Hem i safa wetem wiling hat from lav blong Hem long yumi mo mekem i posibol blong yumi save kasem fogivnes mo gobak hom.
Mi save se yumi i ol pikinini blong God, we Hem i krietem yumi folem imej blong Hem, yumi gat blesing ia blong kasem tabu paoa, mo oli invaetem yumi blong gobak stap wetem Hem sapos yumi jusum blong folem Jisas Kraes.
Mi save se Jisas Kraes i eksampol blong yumi we i stret gud evriwan, mo taem yumi folem Hem tru long fasin blong givim seves, stap fogiv, mo lavem wanwan long yumi, evri dei bae yumi kam moa olsem Hem.
Mo mi save se ol tabu tempol blong Lod oli ol haos blong Hem long long wol ia. Insaed long olgeta, yumi mekem ol tabu kavenan, kasem ol blesing we i no save finis, mo lanem moa abaot Hem mo filim Hem moa kolosap long yumi. Tempol i wan ples blong stap lan, pis, mo rere from laef blong yumi.
Mi testifae se ol efot we yumi mekem blong tijim mo singsing long ol Praemeri singsing ia long ol pikinini blong yumi, i no wan naes wei blong relijin blong yumi nomo. Oli ol toktok blong ol disaepol blong Jisas Kraes, testemoni blong ol trutok blong gospel we oli kambak fulwan, mo ol prea we oli putum i go long miusik. Tabu miusik i save saenem Laet blong Kraes i go long olgeta we oli harem mo i save go insaed long hat blong olgeta we oli singsing. Ol dia fren, Jisas i wantem yumi yet blong stap olsem wan laet. Mi testifae olsem long tabu nem blong Jisas Kraes, amen.