Luk long God mo Stap Laef

Long manis Jun las yia, wan bigfala aksiden i bin hapen long kantri ia Lesotho long Saot Afrika. Wan smol bas we i karem tuwenti yang woman blong Maputsoe Branj blong Jos mo seven long ol lida blong olgeta, oli bin go long kapitol siti ia, Maseru, long wan kam tugeta blong ol yang woman blong Maseru Lesotho Distrik. Taem oli stap ron i go long bigfala rod ia we tu trak i save ron long hem, hemia long moning, wan trak i stap ron i kam, mo i stap traem blong bitim wan nara trak, mekem i ron i kam long saed ia we bas i stap ron long hem. From we i nomo gat spes o taem blong tanem blong no bang bangem tufala, long seken nomo, tufala trak ia i bangem tufala mo rol aot long rod, afta faea i laet bigwan long trak.

Namba blong pipol we oli ded long aksiden ia hem i fiftin, we i gat sikis long olgeta oli ol yang woman, tu Yang Woman lida, mo Branj presiden wetem waef blong hem. Olgeta we oli laef, ol famli memba, ol fren oli serem bigfala harem nogud, wetem filing blong kros, bigfala wari, mo iven fasin blong sem from wanem we i hapen. Nomata long ol filing ia mo kwestin we oli nogat ansa, olgeta oli givim kamfot long wanwan long olgeta mo lukluk long God tru long ol tabu miusik, ol skripja, mo prea, we i mekem olgeta oli filim kamfot. Setso’ana Selebeli we i gat seventin yia i testifae , “Jisas Kraes i lavem yumi mo i stap wetem yumi, nomata yumi harem nogud.”

Wan yang woman mo wan lida we tufala i slip i stap long hospital from tritmen blong bodi we i bon long faea i bin stadi long Buk blong Momon tugeta. Wan i talem se, “Mitufala i bin stap ridim Moronae, mo Moronae i talem stret filing ia we mi bin stap filim. … Taem hem i toktok, i olsem se hem i stap talem se, ‘Yu mas lanem ol toktok ia from olgeta oli bin raetem blong helpem yu winim samting ia.’”

Long wan joen fenerol seves blong evriwan we oli ded, Eria Seventi Elda Siyabonga Mkhize i kaonsel se, “Yumi evriwan i mas lukluk long Lod long taem olsem mo askem Hem blong kamfotem ol hat blong yumi mo … mekem bigfala harem nogud we yumi stap filim i go daon.” Yang Woman presiden blong neba branj, Leribe Branj, Mampho Makura, i askem olgeta blong “Tanem olgeta i go long Lod, mo faenem paoa blong akseptem wanem Hem i wantem. Jisas Kraes ‘hem nomo i stamba blong bilif blong yumi, i stat long stat blong hem gogo i kasem en blong hem’ [Hibrus 12:2]. No tanem yu be lukluk long Hem.”

Lukluk long Hem. Ol toktok blong hem i semmak long kaonsel blong Alma i go long pikinini boe blong hem Hileman: “meksua se yu luk long God mo stap laef.” Alma i kwotem eksperiens blong Lihae mo ol pipol blong hem wetem Liahona olsem: “From luk, hem i isi semmak blong stap biaen long toktok blong Kraes, we bae i soemaot long yu stret rod blong kasem hapines we i no save finis, semmak olsem we ol papa blong yumi oli folem kampas ia, we bae i soemaot long olgeta wan stret rod we i go long promes graon.” Alma i talem se: “Sapos olgeta oli lukluk bae olgeta oli laef. … Mo sapos yumi … lukluk bae yumi save laef blong oltaem.”

Long wan nara taem, Alma i kwotem eksampol blong bras we oli wokem wan pikja blong snek long hem, Moses i putum long wan pos i stanemap. Lod i talem long Moses blong i tekem bras we oli wokem wan pikja blong snek long hem, i putum long wan pos, mo i stanemap,se “evriwan we oli luk long pikja ya blong snek, nao bambae i kam gud bakegen.” Alma i eksplenem se pikja blong snek ia we oli wokem long bras hem i wan saen o simbol blong Kraes, we bae oli leftemap Hem long kros. Plante we oli bin luk oli stap laef, be ol narawan, Alma i talem long olgeta toktok blong hem se, “hat blong olgeta i strong” mekem se oli no luk nao oli ded.

Alma i askem se:

“Sapos yufala i save kam oraet taem yufala i sakem ae nomo, blong mekem se yufala i save kam oraet, ?bae yufala i no wantem lukluk kwiktaem; o bae yufala i wantem mekem hat blong yufala i kam strong blong no bilif, mo stap les, blong yufala i no sakem ae blong yufala raon long yufala, mekem se bae yufala i ded?

“ … ale yufala i sakem ae raon long yufala mo stat blong biliv long Pikinini blong God, se bae hem i kam blong pemaot ol pipol blong hem, mo se bae hem i safa mo kasem ded blong pem praes blong ol sin blong olgeta; mo se bae hem i girap bakegen long ded, se bae i mekem fasin blong laef bakegen long ded i hapen, blong mekem se evri man bae i stanap long fored blong hem, blong kasem jajmen long las mo jajmen dei, folem ol wok blong olgeta.”

I tru se, kaonsel ia “Luk long God mo Stap Laef” i gat mining long laef we i no save finis, be tu, i mekem man i jenis long fasin mo standet blong laef long wol ia. Tingbaot ol toktok blong yang Sista Selebeli long Lesotho we i bin talem se—“Jisas Kraes i lavem yumi mo hem i stap wetem yumi, nomata yumi harem nogud.”

I nomol se long wan wol we i foldaon—ples we Setan i rul bigwan mo evriwan i no stret mo klin—bae i gat harem nogud from plan i no hapen mo toktok blong agens, safaring mo harem nogud from nogud fasin, nogat sakses mo harem nogud from wan samting we yu lusum, fasin blong agens mo fasin blong luk daon long narawan. Wanwan man, ol famli, mo ol kantri oli save antap gud nomo taem oli lukluk long God. Presiden Russell M. Nelson i bin tijim se: “From atonmen blong Hem we i no save finis, Sevya i pemaot yumi wanwan aot long ol wiknes, mistek, mo sin, mo from se Hem i eksperiensem evri soa, wari, mo ol harem nogud we bae yu gat [luk long Alma 7:11–13], afta, taem yu sakem sin long wan tru fasin mo lukaotem help blong Hem, yu save winim ol jalenj blong tedei long wol ia.”

I nogat wan promes we oli ripitim moa insaed long Buk blong Momon skripja bitim hemia: “Folem hamas we yufala i obei ol komanmen blong mi bae yufala i kam antap gud long graon ia; be folem hamas we yufala i no obei ol komanmen blong mi bae mi katemaot yufala long fes blong mi” Laef eksperiens blong ol pipol long Buk blong Momon ova long handred yia i soem trutok blong ol toktok ia. “Kam antap gud” i minim blong stap glad long daereksen mo ol blesing blong heven long laef blong olgeta. ““Kam antap gud” i minim se oli kasem level ia we oli stap dipen long olgetawan we i mekem se oli save mared, gat ol famli, mo givhan long olgeta we oli stap long nid. “Stap kam antap gud” i minim tu blong gat paoa blong winim hadtaem mo temtesen. Tru long gladhat blong Kraes , “olgeta samting we oli [bin] kamtru long laef blong olgeta, oli blong gud blong [olgeta],” i klinim olgeta, mo mekem rilesensip blong olgeta wetem Hem i kam strong.

Alma i eksplenem se blong luk long God, i blong kipim ol komanmen blong Hem, krae long Hem oltaem from sapot blong Hem, askem advaes long Lod long evri wok blong yu, mo letem hat blong yu i fulap long ol tangkyu long Hem long dei mo naet. Ol komanmen mo kaonsel blong God oli stap long ol skripja mo long ol toktok blong ol wokman blong Hem. Ol prinsipol mo ol tingting we oli stap insaed long “Famli: Wan Ofisol Toktok I Go long Wol” oli wan gudfala eksampol. Narawan hem i gaed buk we hem i buk ia Blong Ol Yut Oli Kam Strong. Stamba toktok blong ol yang Man mo Yang Woman long yia ia hem i “Lukluk long Kraes,” we oli karemaot long daereksen we Lod i givim long Joseph Smith mo Oliver Cowdery : “Lukluk long mi long evri tingting blong yutufala; no gat tu tingting, no fraet.” Blong Ol Yut oli kam strong i tokbaot sam long ol impoten komanmen mo ol standet blong Lod, mo i tijim olsem wanem blong lukluk long Lod mo mekem ol gudfala desisen. Hem i wan gaed we i no blong ol yut nomo be i blong yumi evriwan.

Olsem wan impoten eksampol, Blong Ol Yut Oli Kam Strong i gat wan impoten instraksen insaed long japta taetol ia “Bodi blong Yu i Tabu.” Hem i talem se: “Tritim bodi blong yu—wetem bodi blong ol narawan—wetem respek. Taem yu mekem desisen blong yu abaot ol klos, hea stael mo olsem wanem bae yu luk, askem yuwan“? Mi mi stap ona long bodi blong mi olsem wan tabu presen we i kam long God?’”

Blong Ol Yut Oli Kam Strong i eksplenem moa se: “Kipim seks mo ol filing blong seks oli tabu. Oli no mas stap olsem topik blong mekem fani o blong pulum tingting. Bifo mared bitwin wan man mo wan woman, hem i no stret blong tajem praevet, tabu pat blong bodi blong narawan nomata we hem i werem klos. Long ol joes blong yu abaot wanem yu mekem, lukluk long hem, tingting long hem, postem o teksem, no mekem eni samting we i save givim filing blong seks long ol narafala man o long yuwan.”

Toktok ia blong Presiden Nelson i rimaenem yumi long woning we hem i bin givim:

“Sam samting bae i mekem laef blong yu i had kwik bitim we blong spolem nogud tabu loa ia [Fasin blong stap klin long saed blong seks]. Blong olgeta we oli bin mekem ol kavenan wetem God, fasin blong nogat klin tingting i wan long ol kwik wei blong lusum testemoni blong yu.

“… Paoa blong krietem laef hem i wan spesel janis blong stap olsem wan god we Papa long Heven i letem ol pikinini blong Hem long wol ia blong yusum. From samting ia, God i putum sam gaedlaen blong yusum tabu paoa ia we i laef. Fasin blong fasfas tugeta long saed blong bodi hem i blong wan man mo wan woman nomo we tufala i mared tugeta.

“Plante long ol man long wol oli no bilivim hemia, be tingting blong pablik hem i no stamba blong trutok. Lod i talem se wan man we i no klin bae i no save kasem selestial kingdom. … Mo sapos yu no klin, mi askem strong long yu blong sakem sin. Kam long Kraes mo kasem promes blong Hem, blong kasem ful fogivnes taem yu sakem sin blong yu fulwan [luk long Aesea 1:16–18; Doktrin mo Ol Kavenan 58:42–43].”

Tingbaot se insaed long promes long Buk blong Momon, taem yumi no kam antap gud i no minim se bae yumi pua —be bae Lod i katemaot yumi long fes blong Hem. Blong stap long fes blong Hem i abaot paoa blong spirit long laef blong wanwan man. Evriwan oli fulap long Laet blong Kraes taem oli kam insaed long wol ia. Mo tu, samfala oli wok blong kasem baptaes mo kasem presen mo moa laet we i Tabu Spirit Spirit i givim gudfala tingting, i lidim man, i mekem ol talen mo paoa oli gro , mo helpem man blong winim paoa blong devel, ol pua desisen, mo ol rod we i fas.

Olsem yu, mi save samfala we oli bin stap glad long presen ia blong Tabu Spirit be afta, from oli no kipim ol komanmen blong God, oli lusum blesing ia. Wan long olgeta i kam long tingting blong mi. Wan we membasip blong hem long Jos, oli bin tekemaot from fasin blong brekem komanmen. Hem i talem se, fas aksen blong hem i we, hem i filim sem. Hem i bin filim se ol lida we oli no stret evriwan oli jajem hem. Hem i save se aksen blong hem i rong, be hem i faenem risen blong poenem aot ol rong mo mistek blong ol narawan. Afta long samtaem, hem i stat blong filim kamfot ia long wan laef stael aot long Jos we hem i nogat diuti ia blong fulfilim ol koling mo nid ia blong go long ol wosip seves mo givhan long ol narawan.

Hemia i gohed blong samtaem, be hem i stat blong filim save se Tabu Spirit i no stap—God i nomo stap—long laef blong Hem. Folem eksperiens blong hem fastaem, hem i save filing ia blong gat, evri dei, kamfot, gaed, mo tras we Spirit i givim, mo hem i misim hemia. Long en, hem i mekem wanem we i nid blong mekem blong sakem sin mo kwalifae bakegen blong baptaes long wota mo long Spirit.

Plante man oli stap lukaot hapines mo help long ol defdefren ples. Plante “oli lukluk i go ova long mak,.” Be yumi no nid blong stap olsem ol “pikinini, we ol giaman tijing blong ol man ya we oli save wokem ol trik, oli save lidim olgeta i go krangke.” Taem yumi lukluk long God, yumi save faenem pis long ol hadtaem mo fet blong yumi i save gohed blong gro iven long ol taem blong tu tingting mo jalenj long saed blong spirit. Yumi save kasem paoa long fes blong devel mo long taem we yumi stap yumiwan. Yumi save andastanem ol lukluk blong wol mo wei we yumi save se i stret. I tru se i nogat wan nara wei aot long wei we God hemwan i bin odenem, “Lukluk long mi, mo yufala i kambak long mi, blong mi mi sevem yufala. Mi nomo mi God, i no gat narafala god i stap.”

Lukluk long God i no minim nomo se Hem i wan long ol fas samting long laef blong yumi, be i minim se, Hem nomo i fas samting long laef blong yumi. Mi wantem yufala i tingbaot bigfala aksiden ia long Lesotho las yia long Jun. Long hospital bed blong hem, wan long ol Yang Woman lida, we i no bin bilif long God bifo hem i joenem Jos, i talem se stamba tingting blong hem naoia i blong faenemaot from wanem hem i no bin ded. “Sapos mi faenem wan ansa, ansa ia bae i kam from traehad blong mi blong mekem wok blong God oltaem,” hem i talem. “Mi bin stap tingting se mi lavem God, be naoia mi rili, rili, rili lavem Hem. Naoia Hem i [nambawan] samting long laef blong mi.”

Mi serem testemoni blong mi se God Papa, Pikinini, mo Tabu Spirit we oli wan long toktok, tingting, stamba tingting, mo aksen, oli wan God ia, we tru long Hem, yumi save lukaotem evri gudfala samting. Mi serem testemoni blong mi abaot Atonmen blong Jisas Kraes, we paoa ia blong fulfilim naesfala promes ia i kam long hem: “Lukluk long mi, mo stap strong kasem en, mo bae yufala i laef, from long hem we i stap strong kasem en, bae mi givim laef we i no save finis.” Long nem blong Jisas Kraes, amen.