Presen Ia blong Testemoni We I No Save Finis

Hem i evri samting mo Hem i paoa. Tru long Laet blong Kraes mo wok blong givhan blong Tabu Spirit, paoa blong Hem i stap long evri ples. Hem ia i fasin blong Hem blong blesem yumi.

Hem i luk laef blong yumi bifo, laef naoia, mo ples we i no save finis. I nogat wan samting i save haed long Hem.

Invitesen blong Presiden Russell M.Nelson blong “tingting selestial” i leftemap tingting blong yumi blong folem plan mo fasin blong Papa blong yumi long Heven.

From ol tabu fasin blong Hem, Papa blong yumi long Heven i givim long yumi evri gudfala presen, we long maen blong Hem wanwan, presen ia i folem wei blong lukluk mo tingting blong Hem we i no save finis.

Hem i wan responsabiliti tu blong jusum gud.

Jisas Kraes i pem bigfala praes ia wetem blad blong Hem from spesel janis ia.

Samtaem, maet yumi biliv se fridom blong mekem joes i minim se yumi save mekem eni samting we yumi wantem. Be wanem we i tru i we, praes oli pem finis we i minim se fridom blong mekem joes i wan tabu presen.

Yumi mekem wok long bihaf blong wan narawan, mo from hemia, yumi responsibol long wan samting. Long situesen olsem, yumi responsibol long ol joes we yumi mekem folem save we yumi gat mo ol presen we oli givim long yumi. Yumi no save mekem wan joes mo no responsibol long ol risal blong ol aksen blong yumi.

?From wanem yumi gat fridom blong mekem joes?

Blong jusum gud.

Blong jusum Kraes.

Blong jusum laef we i no save finis—bakegen mo bakegen.

Wan witnes we i kam tru long Tabu Spirit i moa bigwan bitim wanem we ae i luk. Hem i spesel witnes blong Papa mo Pikinini. Presiden Nelson i bin tijim: “Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”

Ol brata mo sista, hemia from wanem yumi nidim paoa blong Tabu Spirit tedei.

Wan testemoni tru long Tabu Spirit i save kam long plante wei. Olsem wan laet balb insaed long wan rum we i dak, we i save saen strong wantaem I save kam olsem san we i girap sloslo mo i tekem taem. I save kam olsem ol smol laet we i saen wanwan taem, blong kasem wan klia save. Nomata olsem wanem yu kasem save ia, hem i kam tru long Tabu Spirit.

Mi groap long naesfala Jamaeka, hem i gud mo i naes tumas. Be, taem mi statem hae skul, mi stat blong fesem sam had kwestin we i kam long ol fren long skul mo ol fren we oli no save andastanem desisen blong mi blong kam wan memba blong Jos Ia blong Jisas Kraes. “?From wanem nao yu joenem jos ia?,” oli askem. “?Hao nao yu save bilivim stori ia?”—we i minim Fas Visen. “?Hao nao yu save ridim buk ia?”—we i minim Buk blong Momon. “?Yu yu bilivim evri samting ia?” Mo “?From wanem yu stap spolem laef blong yu olsem?”

Hat blong mi i soa tumas, speseli taem i kam long ol pipol we mi kea long olgeta.

Be wanem we oli no save hem i hemia: Mi gat wan eksperiens wetem Tabu Spirit. Taem testemoni ia i fulumap hat blong mi, i mekem ol harem nogud blong dei ia oli lus, mo “blong wan sot taem, ol samting blong heven [i kamkamaot] long fored blong mi.”

Maet sam oli bin askem ol kwestin ia long yu. Maet, iven naoia yu stap fesem ol kwestin olsem mi bifo.

Presen ia mo witnes blong Tabu Spirit i stap blong evriwan.

Jamaeka long mi, i olsem Palmaera long Josef Smit. Hem i Tabu Bus blong mi. Mi no save weaples stret Josef i nildaon long hem long Tabu Bus taem we hem i nildaon blong prea, be mi save weaples stret mi bin stap long hem mo stret taem mo dei taem testemoni blong mi i kamtru. I hapen long Four Grove Rod, Mandeville, Jamaeka, insaed long batrum blong mi, long 6:00 klok moning, long wan Wenesdei afta long baptaes blong mi. Tabu eksperiens ia i hapen long mi from tu wik bifo, wan sista misinari we i kasem insperesen i invaetem mi blong ridim Buk blong Momon. Sista Audrey Krauss i stap long konfrens ia wetem famli blong hem, mo mi lavem hem blong oltaem.

Eksperiens ia i jenisim mi.

Ol brata mo sista, wan testemoni oli no givim blong yusum blong smol taem nomo. Presen ia we Papa blong yumi long Heven we i gat lav i givim.Mo presen ia i no save finis from Hem we i givim i no save finis. Wan testemoni i no mas gat wan deit blong i ekspae. Hem i no sud go daon o lus from wan samting long laef blong mi i bin jenis o wan samting long wol i bin jenis. Hem i sud kam moa strong, from olsem wan wokman long parabol blong ol talen i talem, testemoni blong miwan i wan presen we i save gro bigwan, i no blong berem o mekem i kam smol.

Taem mi lukluk i gobak long ol had dei blong tes mo hadtaem we mi bin gotru long hem olsem wan pikinini, oli helpem mi blong kasem save blong miwan we mi gat naoia Nomata se biliv, hop o tras i ol impoten pat blong fet , mi no bin mekem hemia nomo long rod blong mi blong kasem wan tru witnes. Mi glad long yu blong stap fanem wei blong yuwan taem yu stap askem ol kwestin, stap stadi, stap prea , stap livim kakae mo stap tingting hevi. Plis no stop. Evri hadwok blong yu i impoten blong gohed strong long rod ia blong testemoni. ?Huia mo wanem bae yu letem blong i tekemaot hemia long yu? “?Wanem bigfala witnes yu save kasem bitim hemia we i kam long God?”

Evri pikinini boe mo gel blong God oli save kasem wan save blong olgetawan we i dip, i strong mo i stret evriwan. Olsem Josef Smit, we i stanap strong long testemoni blong hem nomata long fasin blong agens, yumi save talem wetem strong paoa se, “Mi save hemia, mo mi save se God i save hemia, mo mi no save talem se i no tru, neva bae mi gat strong tingting blong mekem samting ia; mi bin save se sapos mi mekem samting ia.”

Ol dia brata mo sista blong mi, letem smol sid blong testemoni i wok insaed long yu kasem taem i gro i kam long wan save we i gat glori mo i tru.

Sapos yu kasem baptaes mo konfemesen olsem wan memba blong Jos Ia blong Jisas Kraes blong Ol Lata Dei Sent be yu no save se, “yu gat wan testemoni,” plis tingbaot promes ia: “ se oltaem, oli gat Spirit blong hem i stap wetem olgeta.” From promes ia, wanwan long yumi i save go from rod blong faenem testemoni mo wan stret save.

Nao hemia i bigfala trutok: Nomata wanem wei yu kasem testemoni—sapos yu kasem olsem san i stap girap o yu kasem olsem wan visen we i fulap long glori—be yet yu mas mekem wan joes blong kasem naesfala presen ia.

Blong talem se “Mi jusum blong biliv” i mekem i isi blong kasem wan witnes we i kam long God. Sapos yumi luk se testemoni blong yumi i stap slak, tingbaot se hem i ol joes we yumi stap mekem we i mekem paoa blong testemoni i stap foldaon. Be testemoni ia i no lus. Yumi nidim nomo blong fanem bakegen.

Fasin blong stap jus i wan waes wei i gat paoa blong yusum fasin blong yumi blong mekem joes.

Mi no luk wan wei we i moa gud blong yusum fasin blong mekem joes blong mi, bitim blong mi faet from testemoni blong mi.

Presiden Nelson i tijim: “Mi plis mo askem strong yufala blong stap responsibol long testemoni blong yufala. Wok from. Yu bos long hem. Lukaot gud long hem. Lukaotem gud blong i gro. Fidim wetem trutok.”

Ol toktok ia lukaotem, wok, kea, tekem responsabiliti, mo fidim, long mi i olsem oli givim responsabiliti long wan medel man, blong lukaotem wan samting we i naes mo impoten.

Long ol taem blong jos bifo, Parli P. Prat i kros long Profet Josef Smit mo jusum blong talem nogud hem mo Jos. “Taem Jon Teila we Parli i tijim gospel long hem i kam long taon, Parli i tekem hem i go long saed mo givim woning long hem blong folem Josef. Jon Teila i talem long Parli:

“Bifo yu aot long Kanada, yu serem wan strong testemoni abaot Josef Smit se hem i wan profet blong God, mo se yu save ol samting ia tru long revelesen mo presen ia we i Tabu Spirit.

“Naoia mi gat semmak testemoni ia we yu stap glad long hem. Sapos wok ia i bin tru blong sikis manis we i pas, hem i tru tedei. Sapos Josef Smit i bin wan profet, hem i wan profet naoia.”

Miwan mi testifae se Josef Smit i wan profet blong God mo wok we hem i kasem olsem wan profet, i stap gohed tedei. Jisas Kraes i daerektem wok ia.

Mi invaetem yu blong tingbaot rod blong yu blong kasem wan tru witnes long Jisas Kraes mo gospel blong Hem. Yu responsibol long testemoni blong yu, yusum fasin blong mekem joes wetem waes, mo luksave Man we i givim, mo ol naesfala fasin blong Hem. Mi talemaot witnes se paoa ia i stap insaed long yu. I nogat wan i save jus blong yu. I no gat wan i save tekemaot presen ia. Yu save jusum blong biliv.

Mi promesem yu se taem yu mekem hemia, testemoni blong yu bae i wan “wel blong wota we i stap laefmo i stap ron i go blong kasem laef we i no save finis.” Bae i kam olsem wan angka mo bae i pusum yu, mo bae i givim sapot long yu truaot ol hadtaem. Bae i mekem yu save developem ol presen long saed blong spirit. Bae i helpem yu long wok blong yu blong givhan mo givim seves. Bae hem i wan tul blong faet agensem Setan mo ol enemi blong yu. Testemoni blong yu bae hem i wan glad taem yu luk se i stap pas i go long ol pikinini, ol apu pikinini, ol bigfala apu pikinini, olgeta we yu lavem mo givim seves long olgeta. Bae testemoni blong yu bae gat paoa taem yu serem mo yusum blong testifae.

Sapos yu save, yu save ia nao. Mi save se mi save. Yumi nidim moa strong witnes blong Jisas Kraes mo gospel blong Hem. !Go From! !Lukaotem! !I Nid! Hemia i las dispensesen—dispensesen ia blong taem blong evri wok blong God i kamtru fulwan.

Jisas Kraes i talemaot trutok ia: “Bambae skae mo graon, tufala i lus, be tok blong mi bambae i no save lus samtaem.”

Ol brata mo sista, wan testemoni blong Jisas Kraes hem i no wan presen we i blong sot taem nomo. Nogat wan samting i blong sot taem nomo—I no Jisas Kraes, i no presen ia, i no Tabu Spirit, i no huia we testemoni i tokbaot. Mekem testemoni blong yu i olsem tu. Jisas i talem “Bambae skae mo graon, tufala i lus,” be testemoni blong yu long Jisas Kraes i no save lus. Naoia i taem blong holemtaet spesel presen ia. Long nem blong Jisas Kraes, amen.