Blong Mekem Se Evriwan I Kam Antap
Taem yumi lukluk nomo long Jisas Kraes, tijim doktrin blong Hem, mo lan wetem strong tingting, yumi stap invaetem Tabu Spirit blong mekem fet blong yumi long Jisas Kraes i gro mo helpem yumi blong kam moa olsem Hem.
I gat wan stori blong wan yang yunivesiti studen we i gat hadtaem wetem wan klas we i jalenj, mekem se hem i pem wan tija blong helpem hem. Kolosap long en blong lesen ia, profesa i anaonsem se ol studen bae oli save tekem wan pis pepa i go long faenol eksam mo oli save putum eni samting we oli wantem antap long pepa ia. Sam studen oli bin rere blong mekem ol smolsmol not wetem infomesen tru long ol riding mo ol teksbuk, we yu save ridim nomo taem yu yusum glas blong mekem toktok i bigwan. Be yang man ia i kam long faenol eksam wetem wan pepa we i nogat raeting long hem mo wan man we oli no save. Taem profesa i askem kwestin long hem, yang man ia i ansa, “Yu talem se mi save tekem wan pis pepa mo putum eni samting antap long hem.” Afta, hem i putum pepa ia long flo, saed long tebol blong hem mo talem, “Mi wantem tija blong mi i stanap long pis pepa blong mi.”
Tabu Spirit
Olsem ol memba blong Jos Ia blong Jisas Kraes blong Ol Lata-dei Sent, i wan blesing blong gat kampani blong wan memba blong Godhed, yumi save kasem help blong wan tija we i stret gud evriwan. Tabu Spirit i save evri samting, i testifae long trutok mo bae i “mekem [yumi] tingbaot olgeta samting ya bakegen.” Presiden Russell M. Nelson, plante taem i tokbaot hamas i impoten blong stap harem voes blong Lod. Hem i tijim yumi olsem wanem blong invaetem Tabu Spirit i gaedem yumi mo hem i askem strong long yumi oltaem, blong kam antap long paoa blong yumi long saed blong spirit blong kasem revelesen.
Tedei mi invaetem yu blong tingting long wk blong Tabu Spirit, speseli hemia we i go wetem fasin blong stap lan mo stap tijim gospel long hom, mo long jos. Tru long prea blong fet, bae yumi kasem Tabu Spirit taem yumi traehad blong laef long wan laef we i klin inaf blong kasem presen ia. Jos lesen buk we i givim insperesen Tij Folem Wei blong Sevya i soem sam moa prinsipol we Lod i putum we bae i help blong invaetem paoa blong Tabu Spirit.
Invaetem Fasin blong Lan Wetem Strong Tingting
Wan long ol prinsipol ia i blong invaetem fasin blong lanem samting wetem strong tingting. Bifo, maet yumi tingting long tijing olsem wan janis blong wan paren o tija blong invaetem Spirit i kam long fasin blong stap rere blong olgetawan mo afta serem wanem we oli bin lanem wetem ol pikinini o ol klas memba, we wok blong olgeta i blong lisin. Be bae i gud moa taem yumi, olsem ol man blong lanem samting, i rere tu mo kam long klas.blong mekem se taem ol tija oli krietem ol eksperiens blong lanem samting, hemia bae i givim revelesen blong yumiwan we i go stret long ol hat mo maen blong yumi. Afta, taem oli givim janis long yumi blong serem wanem we yumi lanem tru long stadi blong yumi mo tru long Tabu Spirit, yumi helpem wanwan long yumi blong lanem samting mo kam antap. Mo, taem yumi laef folem ol gospel prinsipol ia, Spirit i save witnes bakegen long olgeta trutok ia.
Jisas Kraes Hem i eksampol we i stret gud evriwan long evri samting. Hem i invaetem wanwan long yumi blong wok strong olsem ol man blong lanem samting mo blong tekem responsabiliti long testemoni blong yumiwan. Hem i invaetem ol disaepol blong Hem blong rere blong lan, blong serem wanem we oli lanem mo putum long aksen wetem fet. Hem i prea from olgeta, i luk huia man bae oli save kam, lisin long olgeta, mo helpem olgeta blong oli save se oli lavem mo nidim olgeta
Olsem ol tija, yumi save lukluk moa long progres blong olgeta, ansa long ol nid blong olgeta, mo helpem olgeta blong developem ol fasin long saed blong spirit long rod ia blong disaepol. Olsem ol man blong lan, taem yumi yusum ejensi blong yumi long proses blong stap lanem samting, yumi stap mekem saen long Tabu Spirit se yumi wantem Hem i yumi.
Mi talem tangkyu long tija we i invaetem mi blong kam wan moa gud man blong stap lan. Taem mi statem kolej, mi rong blong gat tingting ia se skul i wan samting we yu mas go tru long hem sapos yu wantem plei long ol spot. Wan dei, afta we profesa blong mi i ridim wan pepa we mi bin raetem, hem i talem long mi se mi gat presen ia blong stap stretem ol situesen. Mi no bin save wanem mining blong toktok ia. Hem i talem se sapos mi traehad moa, bae mi save kam wan gud studen. Tingting ia i neva kam long maen blong mi. Intres, toktok blong leftemap tingting mo invitesen blong hem, i jenisim rod ia blong edukesen blong mi mo i blesem laef blong mi bigwan.
Tijim Doktrin
Wan nara prinsipol we i go wetem fasin blong invaetem Tabu Spirit, i blong tijim tru doktrin. Hemia i minim se gospel stadi mo instraksen blong yumi i hang strong long toktok blong God mo i minim se yumi no mas talem wanem we Lod i no soemaot. Be, yumi lukluk nomo long ol gospel prinsipol we i impoten mo i no save finis, we i letem Spirit i testifae long trutok. Bakegen, yumi folem eksampol blong Sevya. Hem i talem, “Ol tok ia we mi stap tijim ol man long hem, oli no blong mi nomo, oli kamaot long God we i [sendem] mi mi kam.”
Tru doktrin i stap insaed long ol skripja mo ol tijing blong ol profet blong tedei. Lod i askem strong blong yumi stadi long ol skripja wanwan mo olsem ol famli mo blong go long jos evri wik blong stadi long gospel blong Hem. Hemia i givim sam gaedlaen blong lanem doktrin blong Hem mo harem voes blong Hem. Yumi stadi ol skripja blong andastanem ol stori, ol prinsipol we oli tijim, mo olsem wanem yumi save laef folem ol trutok ia. I wan blesing blong gat ol skripja long ol han blong yumi. Pikjarem long maen, Adam mo Iv, Abinadae, o iven Masta Tija Jisas Kraes i stap visitim ol hom o klas blong yumi blong tijim yumi. Oli save mekem hemia taem yumi kakae gud long ol toktok blong God. Wetem semmak efot, yumi save lanem blong andastanem mo lavem ol skripja mo trastem se oli gat ol ansa blong ol kwestin blong sol.
I gat wan taem, bifo mitufala i mared, taem waef blong mi Kristi i bin stap traehad blong filim lav blong Papa long Heven mo blong andastanem plan ia blong God long hem. Taem hem i prea blong kasem gaed, wan strong tingting i kam se bae hem i go long institiut, mekem se hem i enrol long Niutesteman klas. Wei we institiut tija blong hem i tij wetem skripja, iven wei we hem i holem ol skripja , i soem hamas hem i lavem toktok blong God. Taem Kristi i atendem klas, smol voes blong Tabu Spirit i toktok long hem se i gat wan samting insaed long ol skripja we hem i nidim. Tija blong hem we i laekem skripja mo smol voes blong Tabu Spirit i mekem Kristi i wantem blong statem wan series stadi long toktok blong God—we i kam wan rod ia blong laef taem mo givim tabu seves.
Lukluk Nomo long Jisas Kraes
Long en, olsem Tij Folem Wei blong Sevya i soem, tijing mo fasin blong yumi blong lanem samting i mas oltaem lukluk nomo long Jisas Kraes. Oltaem yumi save tokbaot Hem moa wetem respek, mo lukaotem moa janis blong talemaot testemoni, fasin blong tangkyu, mo lav blong yumi long Hem. Nomata long ples we yumi stap long hem, taem yumi tingbaot Hem, yumi save gat “Spirit blong Hem i stap wetem [yumi].”
Wan wei blong putum Jisas Kraes i kam faswan long tijing blong yumi i blong tokbaot gud se Hem i eksampol ia we i stret evriwan, Hem i ripresentem evri gospel prinsipol. Iven sapos skripja i no talem stret, yumi save poen i go long Hem olsem eksampol blong prinsipol we oli tijim. Maet yumi save askem se, “?Yu save tingbaot wan taem we Jisas Kraes i stap olsem eksampol blong prinsipol ia?”
Yumi save lukluk tu long Hem nomo taem yumi lanem ol taetol blong Hem, mo ol fasin blong Hem. mo no lukaotem blong andastanem nomo wanem Hem i bin mekem be tu blong andastanem gud moa huia Hem. Eksampol, taem yu stadi long prinsipol blong fasin blong sakem sin, i impoten blong andastanem olsem wanem blong sakem sin. Be tu, i impoten blong tingbaot wanem Jisas Kraes i bin mekem, blong mekem fasin blong sakem sin i posibol .Mo, andastanem wanem fasin blong sakem sin i tijim yumi abaot Hem, mo stret tabu fasin blong Hem. ?Wanem nao janis blong yumi blong sakem sin i soem abaot lav, fasin blong save wet longtaem, mo sore blong Hem, bilif blong Hem long tabu paoa blong yumi, fasin blong Hem blong wantem pem praes blong ol sin blong yumi, mo glad we Hem i faenem taem Hem i fogiv? Mo andastanem ol taetol blong Hem—olsem Smol Sipsip blong God, Ridima, mo Dokta—i helpem yumi blong luksave se fasin blong sakem sin hem i invitesen blong Hem blong mekem yumi kam klin, jenisim yumi, mo hilim yumi. Blong lukluk nomo long wanem we Hem i bin mekem blong yumi mo wanem ol samting ia oli talem abaot Hem, i save helpem yumi blong gat “fet blong yumi save sakem sin.”
Samtaem, yumi no save luksave kwiktaem, ol fasin blong Sevya we oli soem long wan skripja ves. Eksampol, taem yumi ridim abaot Nifae we i stap bildimap wan bot, samtaem yumi stap lukluk nomo long Nifae. Be blong lukluk long Sevya i save helpem yumi blong luk se oli kipim ol rekod ia i no blong tijim yumi abaot gudfala fasin blong Nifae be blong soem yumi gudfala fasin blong God—se Hem i givim yumi paoa blong kipim ol komanmen blong Hem mo mekem yumi i go fri taem yumi stap long nid.
Yumi save lukluk nomo long stamba wok blong Jisas Kraes insaed long plan ia blong God we i stret gud evriwan blong stap hapi. Hemia i save jenisim laef blong yumi blong lukluk ol situesen tru long lukluk blong God we i no save finis, be i no blong luk plan ia tru long ol lukluk blong wol ia. Gospel ia i no wan lis blong ol rikwes; hem i gud nius ia we Jisas Kraes i winim sin mo ded. Taem yumi kipim ol kavenan blong yumi wetem God, yumi gat akses long naesfala gladhat blong Hem mo hemia i mekem se yumi save laef hapi naoia mo rere blong stap wetem Papa blong yumi long Heven blong oltaem. Taem yumi lanem blong luk Papa long Heven mo Sevya insaed long ol skripja, bae yumi kam blong save gud Tufala. mo bae yumi luk lav mo paoa blong Tufala plante moa long laef blong yumi.
Bae mi oltaem tingbaot Spirit we mi filim olsem wan yut taem tija blong mifala i bin tij abaot ol las dei blong laef blong Sevya. Hem i helpem mifala blong luk hamas ol bigfala situesen ia oli impoten,Getsemane, Golgota, mo emti tumb. Hem i serem bigfala tangkyu blong hem long Sevya mo filing blong hat blong hem blong wantem folem Hem. Tijing blong hem i wan invitesen blong Tabu Spirit blong testifae abaot Jisas Kraes. Mo Spirit we mi filim long klas ia i mekem fet blong mi i gro, mo i mekem lav mo glad blong mi long Sevya i kam antap. Paoa blong tija ia i stap wetem mi long ful laef blong mi. Olsem we oli talem abaot wan nara tija, “Mifala i save mekem ol han blong mifala i wom tru long faea blong fet blong hem.”
Las Toktok
Long ol hom mo Jos miting blong yumi, taem yumi lukluk long Jisas Kraes, tijim doktrin blong Hem, mo lan wetem strong tingting, yumi stap invaetem Tabu Spirit blong mekem fet blong yumi long Jisas Kraes i gro mo helpem yumi blong kam moa olsem Hem, mo hemia i gol blong stap tij mo lan abaot gospel.
Mi talem tangkyu tumas long ol tija long laef blong mi, stat long ol gudfala paren kasem ol lokol lida mo ol tija, i go kasem ol man mo woman we oli singaotem olgeta blong tij mo testifae long pulpit ia, we oli helpem yumi blong save mo folem Jisas Kraes. Mo mi glad tumas long Tabu Spirit, tija ia we i stret gud evriwan. Hem i tru long Tabu Spirit we mi save se Papa long Heven i lavem yumi mo gat wan plan we i gud stret evriwan blong yumi, se Jisas Hem i Kraes, Sevya mo Ridima blong wol ia, mo se gospel mo Jos blong Hem i bin kambak bakegen. Wetem tangkyu, mi testifae long evri samting ia long nem blong Jisas Kraes, amen.