Smael Long Ol Fes mo Ol Hat blong Talem Tangkyu
Gud fasin blong ol Sent blong yumi long Afrika, i kam moa klia taem ol sent ia oli fesem ol jalenj blong laef, mo ol responsabiliti blong Jos we i stap gro.
Moa long wan yia i pas, mi bin rilis long asaenmen blong mi long Presidensi blong Seventi, wan jenis we oli anaonsem long ples ia long jeneral konfrens. From we oli ridim nem blong mi afta long olgeta blong Jeneral Atoriti we oli bin ritae, plante oli ting se mi tu mi stap finisim taem blong mi long seves. Afta long konfrens, mi kasem plante mesej blong tok tangkyu mo toktok blong sapot from niufala step long laef blong mi. Samfala oli askem blong pem haos blong mi long Not blong Sol Lek. Hem i naes blong luk se bae oli misim mi mo tu blong save se bae mifala i no fesem hadtaem blong salem haos blong mifala taem mi finis long wok ia. Be mi no finis wok yet.
Niufala asaenem blong mi i tekem mi mo Monica i go long naesfala Afrika, ples we Jos i stap gro bigwan. Hem i bin wan blesing blong stap givim seves long medel blong ol fetful Sent long Saot Afrika Eria, mo witnesem lav blong Lod long olgeta. Hem i tajem mi bigwan blong luk jeneresen blong ol famli blong evri bakgraon, we i gat tu plante Jos memba we oli gat sakses long saed blong edukesen we oli givim taem mo talen blong olgeta fulwan long seves blong ol narawan.
Long semmak taem, folem namba blong populesen long eria ia, plante pipol we oli kasem inaf blong sapotem famli oli joenem Jos mo jenisim laef blong olgeta tru long ol blesing blong fetful taeting mo ol janis long saed blong edukesen we Jos i givim. Ol program olsem Sakses long Skul, EnglishConnect, BYU-Pathway, mo Perpetual Education Fund, i blesem plante laef, speseli olgeta yangfala blong jeneresen ia.
Presiden James E. Faust i talem wan taem se, “Jos ia i no pulum ol bigman i kam, be hem i mekem ol simpol man oli kam ol bigman.”
Gud fasin blong ol Sent blong Afrika i kam moa klia, taem ol sent ia oli fesem ol jalenj blong laef mo ol responsabiliti blong Jos we i stap gro. Oltaem oli lukluk gudfala saed blong ol hadtaem. Olgeta oli laef gud folem wanem we Presiden Russell M. Nelson i stap tijim.
“Glad we yumi filim i no from situesen blong laef blong yumi, be hem i from samting we yumi lukluk long hem faswan long laef blong yumi.
“Taem we yumi mekem laef blong yumi i lukluk nomo long plan blong God blong fasin blong sevem man … mo Jisas Kraes mo gospel blong Hem, yumi save filim glad nomata wanem i stap hapen—o i no stap hapen—long laef blong yumi.”
Ol sent ia oli faenem glad nomata long ol jalenj blong olgeta. Olgeta oli bin lanem se rilesensip blong yumi wetem Sevya i helpem yumi blong go tru long ol hadtaem wetem smael long ol fes mo ol hat blong talem tangkyu.
Letem mi serem sam long ol eksperiens blong mi wetem ol fetful Sent ia we oli soem prinsipol ia. bae mi statem wetem Mosambik.
Mosambik
Sam manis i pas, mi bin prisaed long wan stek konfrens blong wan stek we i jes gat wan yia be i gat 10 yunit finis. Moa long 2,000 pipol oli fulumap smol japel ia mo ol tri tenet we oli pulum aotsaed. Stek presiden i gat 31 yia, waef blong hem i gat 26 yia mo tufala i gat tu smol pikinini. Hem i lidim stek ia we i stap gro mo fesem jalenj be hem i no komplen—hem i gat smael long fes mo wan hat blong talem tangkyu.
Long wan intaviu wetem petriak, mi faenemaot se waef blong hem i sik bigwan, mo hem i traehad blong lukaot long hem. Afta we mi tokbaot situesen ia long stek presiden, mifala i givim wan prishud blesing long waef blong hem. Mi askem petriak, hamas petriakel blesing hem i stap givimaot.
“Eit kasem ten,” hem i talem.
Mi askem se, “?Long wan manis?”
Hem i ansa, “!Long wan wik!” Mi kaonsel wetem hem se blong stap mekem plante olsem long wan wik i no waes.
“Elda Godoy,” hem i talem, “oli stap kam evri wik, wetem ol niu memba tu mo plante yut.” Bakegen, i nogat komplen—wan smael nomo long fes mo wan hat blong talem tangkyu.
Afta long Satedei naet sesen blong stek konfrens, long rod blong mi i go long hotel, mi luk ol man oli stap pem kakae long rod let long naet. Mi askem long draeva blong mi se from wanem oli stap mekem hemia long tudak be i no long dei. Hem i ansa se olgeta oli stap wok long deitaem blong gat mane blong pem kakae afta.
“O, oli stap wok tedei blong kakae tumoro,” mi talem.
Be hem i korektem mi: “No, oli stap wok long dei blong oli kakae long naet ia.” Mi bin gat hop ia se ol memba oli stap long wan moa gud situesen, be hem i konfemem se plante oli fesem ol semmak jalenj long pat blong kantri ia. Long nekis moning, long taem blong Sandei sesen blong mifala, mo naoia we mi save long situesen blong olgeta ia, i tajem hat blong mi moa taem mi luk smael long fes blong olgeta mo ol hat blong talem tangkyu.
Sambia
Long rod blong mifala i go long Sandei miting, mi mo stek presiden i luk wan kapol we tufala i stap wokbaot long saed blong rod wetem wan bebi mo tu smol pikinini. Mitufala i stop blong pikimap olgeta. Oli sapraes mo glad bigwan. Taem mi askem se rod blong haos kasem japel i longwan olsem wanem, papa ia i ansa se bae i tekem 45 minit o wan aoa, folem spid blong ol pikinini. Oli wokbaot long rod ia i go mo kambak, evri Sandei, mo oli no komplen—oli gat smael long ol fes mo ol hat blong talem tangkyu.
Malawi
Wan Sandei bifo long wan stek konfrens, mi bin visitim tu branj we oli stap yusum ol gavman skul olsem ol miting haos. Mi bin sek long simpol mo naes kondisen blong ol bilding ia, we i no iven gat sam long ol fasiliti we man i nidim. Taem mi mitim sam memba longwe, mi rere blong talem sore abaot pua kondisen blong mitinghaos blong olgeta, be olgeta oli hapi blong gat wan ples kolosap, blong stap tugeta long hem, blong oli no wokbaot longwe tumas. Bakegen, i nogat komplen—be smael long ol fes mo ol hat blong talem tangkyu.
Simbabwe
Afta long wan Satedei lidasip trening, stek presiden i tekem mi i go long ol Sandei seves we i stap tekem ples long wan rent haos. I gat 240 pipol we oli stap long taem ia. Afta bisop i welkamem 10 niu memba we oli baptaes long semmak wik ia. Ol memba oli seraot long tu smol rum, wetem sam memba tu we oli stap sidaon aotsaed long bilding ia mo wajem miting tru long ol windo mo ol doa. Bakegen, i nogat komplen—be smael long ol fes mo ol hat blong talem tangkyu.
Lesoto
Mi bin visitim naesfala smol kantri ia, we oli save tu olsem “maonten kingdom,” blong luk wan Jos distrik we i stap rere blong kam wan stek. Afta long ol miting blong wan Satedei, mi go long Sandei seves long wan long ol branj blong olgeta insaed long wan rent haos. Sakramen rum i fulap, mo ol pipol oli stap stanap aotsaed long doa blong tekpat. Mi talem long branj presiden se hem i nidim wan bigfala haos. Long sapraes blong mi, hem i talem long mi se hemia haf namba nomo blong ol memba long branj blong hem. Narafala haf bae oli kam long seken sakramen miting afta long seken aoa. Bakegen, i nogat komplen—be smael long ol fes mo ol hat blong talem tangkyu.
Mi gobak long Lesoto afta long wan bigfala trafik aksiden we sam long ol yut blong mifala oli pat long hem, we Elda D. Todd Christofferson i bin talem finis. Taem mi visitim ol famli mo ol lida, mi ting se bae oli harem nogud. Be, mi mitim wan grup blong ol sent we oli stanap strong mo handelem situesen ia wetem hop mo toktok blong leftemap tingting.
Mpho Anicia Nku, we i gat 14 yia, wan we i bin go tru long aksiden long pikja ia, hem i soem gud ol toktok blong hem se: “Trastem Jisas mo oltaem lukluk long Hem, from tru long Hem bae yu faenem pis, mo Hem bae i helpem yu long hiling proses.”
Hemia hem i sam eksampol nomo, we yumi luk long ol gudfala fasin blong olgeta from oli mekem gospel blong Jisas Kraes i kam nambawan long laef blong olgeta. Oli save wea ples blong faenem help mo hop.
Hiling Paoa blong Sevya
?From wanem Sevya i save helpem olgeta mo yumi long eni situesen long laef blong yumi? Ol ansa yumi faenem insaed long ol skripja:
“Mo bae hem i go aot, i harem nogud long ol soa blong bodi mo fulap hadtaem mo temtesen blong evri kaen. …
“… Mo bae hem i tekem long hem ol samting blong olgeta we oli no strong, blong mekem se insaed blong hem i save kam fulap long sore, … mekem se hem i save … olsem wanem blong helpem ol man blong hem long saed blong ol samting blong olgeta we oli no strong long olgeta. .”
Elda David A. Bednar i bin tijim se, i nogat harem nogud long bodi, o wikes we yumi go tru long hem we Sevya i no save. “Long wan taem we yu mo mi i no strong, bae yumi save krae, mo talem, ‘Nogat man i save andastanem [wanem we mi stap go tru long hem].’. …’ Maet bae nogat man bae i save. Be Pikinini Boe blong God i save gud mo Hem i andastanem.” ?Mo from wanem? From “Hem i bin filim mo tekem long Hemwan ol hevi samting blong yumi bifo yumi save filim.”
Mi endem wetem testemoni blong mi abaot toktok blong Kraes we i stap long Matiu 11:
“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.
“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan abaot mi, nao bambae yufala i save faenem pis long laef blong yufala.
“From we yok blong mi i isi nomo, mo oli no hevi.”
Olsem Ol Sent long Afrika, mi save se promes ia i tru. Hem i tru longwe mo i tru long evri ples. Long hemia, mi testifae long nem blong Jisas Kraes, amen.