Mekem Pat blong Yu wetem Ful Hat blong Yu
Trastem Sevya inaf mo mekem pat blong yu fulwan moa, wetem tingting we i stap daon, wetem strong tingting mo wetem ful hat blong yu.
Las yia long trip blong mi go long Yurop, mi bin visitim olfala ples blong wok blong mi, Lufthansa German Airlines long Frankfurt Eapot.
Blong trenem ol paelot blong olgeta, oli gat sam trening blong draevem plen long kompiuta we hem i stap trenem ol paelot blong hem long hem, mo sam long ol trening ia, kompiuta i save mekem plen i flae long eni kaen kondisen, ol nomol wan, o ol imejensi wan. Long ol plante yia we mi bin stap olsem wan kapten blong plen, mi mas go mekem ol trening ia evri sikis manis blong mekem se paelot laesens blong mi laef i stap. Mi tingbaot gud ol taem ia we i fulap long wari, be i gat filing ia tu se yu win afta we yu pasem wan tes. Long taem ia mi bin yang mo mi laekem jalenj ia.
Long taem we mi stap visit, wan long ol eksekutiv long Lufthansa i askem sapos mi wantem traem bakegen mo draevem 747 long kompiuta wan moa taem.
Mi stap traem blong tingting gud long kwestin ia fastaem be afta mi harem wan voes—mi sek se hem i voes blong mi—we i stap talem se, “Yes, bae mi laekem tumas.”
Taem mi talem ol toktok ia nomo, fulap tingting i kavremap tingting blong mi. Hem i bin wan long taem finis we mi bin draevem wan 747. Long taem ia bifo, mi bin yang mo gat fulap tras olsem wan kapten. Naoia mi mas pruvum miwan se mi bin wan foma jif paelot. ?Bae mi mekem sem long miwan long fored blong ol profesonol ia?
Be naoia i let tumas blong talem no, mekem se mi go sidaon long jea blong kapten, mi putum ol han blong mi long ol kontrol blong plen we mi bin save gud olgeta, mo afta mi filim bakegen, glad ia blong flae taem bigfala plen ia i ron long rod blong plen mo flae long open skae.
Mi glad blong talem se flaet ia i bin wan sakses, i nogat damej long plen, mo nem blong mi tu i gud.
Nomata long hemia, eksperiens ia i mekem mi gat tingting we i stap daon. Taem mi strong mo yangfala, mi save draevem gud plen mo i stap long blad mi. Naoia, mi mas tingting strong fulap blong mekem ol besik samting.
Fasin blong Stap Wan Disaepol I Nidim blong Yu Kontrolem Yuwan
Eksperiens blong mi blong flae long kompiuta ia, i wan impoten rimaenda se blong kam gud long eni samting—sapos hem i blong flae, somap, mekem garen, o blong lanem samting—i nidim blong oltaem kontrolem yuwan mo praktisim.
Maet bae yu save spendem plante yia blong lanem wan skil o developem wan talen. Maet bae yu wok had tumas mekem bae i stap long blad blong yu. Be sapos yu ting se hemia i minim se yu save stop blong praktis mo stadi, sloslo bae yu lusum save mo paoa ia we wantaem yu bin traehad tumas blong kasem.
Hemia i semmak long fasin blong stap lanem wan lanwis, plei wan miusik tul, o draevem wan plen. Hemia i semmak tu taem yu wantem kam wan disaepol blong Kraes.
I simpol olsem, yu nidim blong save kontrolem yuwan blong mekem se yu save stap olsem wan disaepol.
Hem i no wan nomol gol, be hem i no hapen tu olsem nomo.
Fet long Jisas Kraes i wan presen, be blong akseptem presen ia i wan joes we i nidim komitmen blong ful “paoa blong tingting, maen mo paoa.” Hem i wan praktis blong evri dei. Evri aoa. I nidim blong yu komitim yuwan blong stap lan mo tingting strong evri taem. Fasin blong agens long laef ia i mekem fet blong yumi we i fasin blong stap tru long Sevya i kam moa strong. Hem i stanap strong kasem en from yumi gohed blong fidim, yumi gohed blong yusum mo yumi no givap.
Long narasaed, sapos yumi no yusum fet mo paoa blong hem blong winim tingting taem yumi no mekem samting folem, yumi nomo sua tumas long ol samting we i tabu long yumi—yumi nomo gat tras long ol samting we yumi bin save se oli tru.
Ol temtesen we long taem bifo, bae i neva winim yumi, naoia oli stat blong luk intresting.
Strong faea blong testemoni blong yumi yestedei, i save holemtaet yumi blong smol taem nomo. I nidim blong yumi fidim oltaem blong mekem i gohed blong saen strong.
Long Niu Testeman, Sevya i tijim wan parabol abaot wan masta we i givim wan tabu tras long wanwan long ol wokman blong hem—wan amaon blong mane we oli singaotem ol talen. Ol wokman we oli yusum ol talen blong olgeta oltaem oli mekem ol talen ia i kam bigwan. Wokman we i berem talen blong hem, i lusum talen ia long en.
?Wanem lesen long ples ia? God i givim ol presen long yumi, presen—blong save, blong paoa, blong janis—mo Hem i wantem yumi blong yusum mo mekem i bigwan blong i save blesem yumi mo ol nara pikinini blong Hem. Hemia i no save hapen sapos yumi putum ol presen ia antap long wan kabod olsem wan trofi we bae yumi stap laekem blong lukluk wanwan taem. Ol presen blong yumi oli kam bigwan mo plante nomo taem yumi yusum olgeta.
Yu Gat Talen
Ating bae yu talem se “Be Elda Uchtdorf, mi nogat eni presen o talen—o mi nogat wan we i gat valiu.” Ating bae yu lukluk ol presen blong ol narawan we yu save luk i klia se oli naes mo yu filim se yu yu nomol nomo, i no olsem olgeta. Ating bae yu tingting se long taem blong laef bifo wol ia, long dei blong kakae blong ol bigfala presen mo talen, oli kasem ol talen blong yu i smol nomo long plet blong yu—be blong ol narawan, plet blong olgeta i kapkapsaed long ol talen.
O mi wantem tumas blong haggem yu mo helpem yu blong andastanem bigfala trutok ia: Yu yu wan blesing blong laet; !spirit pikinini blong wan God we i no save finis! Mo yu gat wan paoa insaed long yu we i bitim hamas paoa we yu ting se yu save gat.
!Olsem olgeta we oli stap raetem ol poem oli talem, yu kam long wol ia !“wetem ol klaod blong glori”!
Stori blong yuwan i tabu, semmak long ples we bae yu go long hem. Yu bin lego heven blong kam long ples ia, !be heven i neva lego yu!
Yu yu evri samting be yu yu no nomol nomo.
!Yu gat talen!
Insaed long Doktrin mo Ol Kavenan, God i talemaot:
“I gat plante presen, mo long evri man, mi givim wan presen tru long Spirit blong God.
“Long samfala, mi givim wan, mo long sam narafala, mi givim wan narafalawan, blong olgeta presen ia oli blong gud blong evriwan.”
Sam long ol presen blong yumi i stap insaed long ol skripja. Plante oli no stap.
Olsem profet Moronae i talem, “no tanem baksaed long ol presen blong God, from oli plante; mo oli kamaot long semfala God.” Oli kamkamaot long “ol defren fasin … ; be hem i semfala God we i stap wokem evri samting mo long evriwan.”
Ating bae i tru i se i no oltaem we ol presen blong yumi long saed blong spirit oli naes naes, be hemia i no minim se oli no impoten semmak. ?Mi save serem sam presen long saed blong spirit we mi luksave long plante memba raon long wol? Tingting long hem sapos yu gat blesing ia blong wan o moa presen ia olsem:
-
Stap soem sore.
-
Stap luksave oli pipol we oli no luksave olgeta.
-
Stap faenem ol risen blong stap glad.
-
Stap wan blong putum pis.
-
Stap luksave ol smol merikel.
-
Stap talem ol naes toktok long ol narawan.
-
Stap fogiv.
-
Stap sakem sin.
-
Stap stanap strong kasem en.
-
Stap eksplenem samting blong i simpol.
-
Save olsem wanem blong toktok wetem ol pikinini.
-
Stap sastenem ol lida blong Jos.
Ating bae yu no luksave ol presen ia we bae oli soem long wan talen so blong wod. Be mi hop se yu save luk hamas oli impoten tumas long wok blong Lod mo ating yu bin tajem, blesem, o iven sevem wan long ol pikinini blong God tru long presen blong yu. Tingbaot: “Tru long ol smol mo simpol samting, ol bigfala samting oli kam blong hapen.”
Mekem Smol Pat blong Yu
Ol brata mo sista we mi lavem, mo ol dia fren, mi prea se Spirit bae i helpem yu blong luksave ol presen mo talen we God i bin givim long yu. Afta, olsem ol fetful wokman long parabol blong Lod, letem yumi mekem olgeta i kam moa bigwan.
Dei ia bae i kam, taem bae yumi stanap long fored blong Papa blong yumi long Heven we i gat sore, blong yumi ripotem ol wok yumi mekem. Bae Hem i wantem save wanem yumi mekem wetem ol presen we Hem i bin givim long yumi—speseli, olsem wanem yumi bin yusum olgeta blong blesem ol pikinini blong Hem. God i save huia yumi stret, huia oli mekem yumi blong kam olsem, mo Hem i wantem yumi mekem fulap samting.
Be Hem i no minim blong yumi mekem wan bigfala samting tumas blong kasem ples ia. Long wol we Hem i krietem, fasin blong gro i hapen sloslo wetem taem—be long semmak taem, i hapen oltaem mo wetem strong tingting.
Tingbaot se Jisas Kraes nao i bin mekem wan bigfala samting tumas taem Hem i winim ded mo sin.
Pat blong yumi i blong folem Kraes. Hem i pat blong yumi blong gowe long sin, tanem yumi i go long Sevya, mo wokbaot long rod blong Hem, wan step afta narawan. Taem yumi mekem hemia, wetem strong tingting mo fet, long en bae yumi winim ol samting we yumi nogud long hem mo ol mistek, mo afta sloslo yumi kam moa gud, kasem long taem blong dei ia we i stret evriwan, taem bae yumi kam stret evriwan tru long Kraes.
Yumi save kasem ol blesing ia. Ol promes blong hem oli stap. Doa i open bigwan i stap. Hem i joes blong yumi blong go insaed mo stat.
Ating stat bae i smol. Be hemia i oraet.
Taem fet i slak, stat wetem hop long Kraes Jisas mo paoa blong Hem blong mekem man i klin.
Papa blong yumi i askem se bae yumi go tru jalenj ia blong fet mo stap olsem wan disaepol, olsem ol man blong biliv wetem ful hat, we oli lego Babilon biaen mo putum hat, maen mo wokbaot blong olgeta i go long Saeon, be i no olsem ol turis nomo.
Yumi save se ol traehad blong yumi hemwan i no save mekem kasem selestial. Be i save mekem yumi stap tru mo komitim yumi long Jisas we i Kraes, mo Hem i save mekem yumi selestial.
From Sevya blong yumi we yumi lavem, i nogat wan samting olsem wan situesen we bae yu no win long hem. Sapos yumi putum hop mo fet blong yumi long Hem, fo sua bae yumi win. Hem i promesem yumi blong gat akses long paoa blong Hem mo gladhat mo sore blong Hem. Wan step afta wan, smol afta smol, bae yumi kam moa kolosap long bigfala dei ia we i stret evriwan. Long taem we bae yumi laef wetem Hem mo olgeta we yumi lavem long glori we i no save finis.
Blong kasem long we, yumi mas mekem pat blong yumi tedei mo evri dei. Yumi glad long ol step we yumi tekem yestedei, be yumi no stop long ples ia. Yumi save se yumi gat longfala rod yet blong go, be yumi no letem hemia i mekem tingting blong yumi i foldaon.
Hemia i huia yumi—olsem ol man blong folem Kraes.
Mi askem strong mo blesem evri memba blong Jos, mo evriwan we oli wantem pat long hem, blong trastem Sevya mo tekpat, save wet longtaem mo tingting strong blong mekem pat blong yu wetem ful hat blong yu—mekem se glad blong yu i save fulwan mo blong, wan dei, bae yu kasem evri samting we Papa i gat. Mi talem witnes blong mi abaot hemia, long nem blong Jisas Kraes, amen.