Stap Simpol long Kraes

Teti tri yia i pas, oli bin singaotem mi blong stap olsem wan misinari long Yuta Ogden Misin. Yes, from we mi kam long Yurop, sam lokol tradisen blong Yuta olsem “grin jeli wetem karot” mo “poteto wetem jis” oli defren smol!

Be, mi glad tumas long komitmen mo fasin blong plante Sent blong stap wan disaepol, namba blong ol Jos program we oli wok fulwan mo bigfala namba blong ol man we oli atendem ol Jos miting. Taem misin blong mi i finis, mi wantem blong mekem sua se glad ia we mi bin filim wetem paoa mo fasin blong gro long saed blong spirit we mi bin luk, bae i stap tu long fiuja famli blong mi. Mi bin tingting strong blong gobak hariap mo laef long “ol bigbigfala hil ya we oli stap bifo olgeta, bambae oli stap olwe, gogo i no save finis.”

Be, Lod i bin gat defren plan. Long fas Sandei blong mi long hom blong mi, waes bisop blong mi i singaotem mi blong stap olsem Yang Man Presiden long wod blong mifala. Taem mi stap helpem naesfala grup ia blong ol yang man, mi lanem kwiktaem se glad ia we i kam taem yumi stap olsem ol disaepol blong Kraes, i no from saes blong ol Jos miting o namba blong ol program.

Taem we mi maredem naesfala waef blong mi Margret, mitufala i disaed wetem glad, blong stap long Yurop mo lukaotem famli blong mitufala long hom kantri blong mitufala long Jemani. Tugeta, mitufala i witnesem wanem Presiden Russell M. Nelson i bin tijim plante yia i pas: “glad we yumi filim i wan smol pat nomo blong ol situesen blong laef blong yumi mo evri samting we yumi stap mekem long laef blong yumi i lukluk i go long hem.” Taem we, long laef blong yumi, yumi stap lukluk long Jisas Kraes mo gospel mesej blong Hem, yumi save eksperiensem ol ful blesing blong stap olsem wan disaepol long weaples yumi stap long hem.

Be long wan wol we i fulap long plante tingting we oli fasfas, i mekem man i konfius wetem ol defren mesej mo nid we i save mekem man i rao, olsem wanem yumi save mekem ol ae blong yumi oli no blaen, ol hat blong yumi oli no strong mo stap lukluk strong long “ol klia mo gudgudfala samting” blong gospel blong Jisas Kraes? Long wan taem blong stap konfius, Aposol Paul i bin givim ol gudfala advaes long ol sent blong Korin taem hem i rimaenem olgeta blong stap lukluk long “fasin blong stap simpol we i stap long Kraes.”

Doktrin blong Kraes mo loa blong gospel i simpol tumas mo iven ol pikinini oli save andastanem. Yumi save kasem paoa blong Jisas Kraes blong pemaot man mo kasem evri blesing long saed blong spirit we Papa long Heven i mekem rere blong yumi, taem yumi praktisim fet long Jisas Kraes, fasin blong sakem sin, kasem baptaes, kam klin tru long presen blong Tabu Spirit, mo stanap strong kasem en. Presiden Nelson i tokbaot rod ia i gud tumas olsem “kavenan rod” mo proses ia blong kam wan “tru disaepol blong Jisas Kraes.”

Sapos mesej ia i simpol tumas, from wanem yumi filim se hem i had tumas blong laef folem loa blong Kraes mo folem eksampol blong Hem? Maet yumi lukluk fasin blong stap simpol olsem wan samting we i isi blong mekem mo i no nidim hadwok o strong tingting. Blong folem Kraes i nidim blong traehad mo jenis oltaem. Yumi nidim blong “[tekem] aot man we i folem fasin blong wol, mo [kam olsem wan [smol] pikinini.” Hemia i minim tu blong “gat tras long Lod” mo letem ol tingting we oli fasfas i go, olsem ol pikinini oli stap mekem. Stap praktisim doktrin blong Kraes long wan simpol mo stret wei bae i helpem yumi blong faenem glad evri dei, bae i gaedem yumi long ol koling blong yumi, ansa long sam had kwestin blong laef, mo givim paoa blong go tru long ol bigfala hadtaem blong yumi.

?Be olsem wanem nao yumi save praktisim simpol wei ia long laef blong yumi olsem ol disaepol blong Kraes? Presiden Nelson i rimaenem yumi blong lukluk long “trutok we i stret gud, doktrin we i stret gud, mo revelesen we i stret gud” taem yumi lukaotem blong folem Sevya. Askem kwestin ia oltaem,“?Wanem nao Lod Jisas Kraes bae i wantem mi blong mekem?” i mekem yumi save kasem dip daereksen. Blong stap folem eksampol blong Hem i givim wan sef rod long taem we yu konfius mo wan han blong yu holem we i gat lav mo i save gaedem yu evri dei. Hem i Masta blong Pis mo Gudfala Man blong Lukaot long Sipsip. Hem i kamfotem yumi mo Mekem yumi I Go Fri. Hem i sua fandesen blong yumi mo i Givim Kamfot. !Hem i wan Fren—fren blong yu mo fren blong mi! Hem i invaetem yumi evriwan blong lavem God, kipim ol komanmen blong Hem, mo lavem ol neba blong yumi.

Taem yumi jusum blong folem eksampol blong Hem mo muv i go fored wetem fet long Kraes, akseptem paoa blong Atonmen blong Hem, mo tingbaot ol kavenan blong yumi, lav i fulumap hat blong yumi, hop mo hiling i leftemap spirit blong yumi. Yumi no kros mo harem nogud be yumi talem tangkyu mo gat fasin blong save wet longtaem long ol promes blesing. Samtaem, bae yumi nid blong muvumaot yumiwan long sam situesen we i no helti o lukaotem help blong ol profesonol. Be long evri situesen, taem yumi praktisim ol gospel prinsipol, bae i helpem yumi blong go tru ol jalenj blong laef long wei blong Lod.

Samtaem yumi stap tingdaon long paoa we yumi kasem tru long ol simpol aksen olsem prea, livim kaekae, skripja stadi, sakem sin evri dei, tekem pat long sakramen evri wik, mo wosip long haos blong Lod oltaem. Be taem yumi luksave se yumi no nidim blong “mekem sam bigfala samting” mo yumi putum yumiwan long medel blong klin mo simpol doktrin, yumi stat blong luk olsem wanem gospel i “wok gud tumas” blong yumi, iven long ol had situesen. Yumi faenem paoa mo “gat tras long fored blong God,” iven taem hat blong yumi i soa. Elda M. Russell Ballard i rimaenem yumi plante taem se, “Hem i long fasin blong stap simpol ia nao bae [yumi] faenem… pis, glad, mo hapines.”

Praktisim fasin blong stap simpol we i stap long Kraes i mekem yumi lukluk moa long ol pipol bitim ol proses mo ol rilesensip we i no save finis bitim ol fasin blong sot taem. Yumi lukluk long “ol samting we i impoten moa” long wok blong God blong fasin blong sevem man mo fasin blong kam olsem wan God be i no blong letem fasin blong manejem wok blong givhan i karemaot lukluk blong yumi. Yumi mekem taem blong putum ol samting we yumi save mekem i kam faswan be i no blong letem ol samting we yumi no save mekem i pulum yumi i go daon. Lod i rimaenem yumi:“Taswe, yufala i no taed blong mekem gud samting, from we yufala i stap putum fandesen blong wan bigfala wok. Mo aot long ol smol samting, ol samting we oli bigwan oli kamaot.” Fasin blong stap simpol mo gat tingting we i stap daon i leftemap tingting mo i gat paoa, nomata long ol situesen blong yumi.

Apu woman blong mi Marta Cziesla, hem i wan gudfala eksampol blong mekem “ol smol mo simpol samting” blong mekem ol bigfala samting oli hapen. Mifala i singaotem hem apu Cziesla wetem fulap lav. Apu blong mi wetem mama blong hem, tufala i bin akseptem gospel long smol vilej blong Selbongen long Is blong Prusia, long Mei 30, 1926.

Martha Cziesla (long raet) long dei we hem i kasem baptaes.

Hem i lavem Lod mo gospel blong Hem mo hem i tingting strong blong kipim ol kavenan we hem i bin mekem. Long 1930 hem i maredem apu man blong mi, we hem i no bin wan memba blong Jos. Long taem ia, i no posibol blong apu woman i atendem ol Jos miting from fam blong apu man blong mi i stap longwe long jos. Be hem i lukluk long wanem hem i save mekem. Apu woman i gohed blong prea, ridim olgeta skripja, mo singim ol song blong Saeon.

Sam pipol oli ting se maet hem i lusum fet blong hem long jos, be hemia i no wanem we i hapen. Taem anti mo papa blong mi, tufala i bon, taem i nogat prishud long hom mo i nogat eni Jos miting o odinens kolosap, bakegen, hem i mekem wanem hem i save mekem, blong tijim ol pikinini blong hem blong “prea, mo wokbaot stret long fored blong Lod.” Hem i ridim ol skripja long olgeta, singim ol song blong Saeon wetem olgeta, mo tu hem i prea wetem olgeta—evri dei. Wan Jos eksperiens we i hapen fulwan long hom.

Long 1945, apu man blong mi i givim seves long wo, longwe long hom. Taem ol enemi i kam kolosap long fam, apu woman i tekem tufala smol pikinini blong hem mo livim fam ia we oli lavem, blong faenem wan sef ples. Afta long wan wokbaot we i had tumas, oli faenem wan sef ples long Mei 1945 long not blong Jemani. Oli nogat eni nara samting, be ol klos nomo long bodi blong olgeta. Be apu woman i gohed blong mekem wanem hem i save mekem: hem i prea wetem ol pikinini blong hem—evri dei. Hem i singim ol song blong Saeon we hem i bin lanem bae hat—evri dei.

Laef i had tumas, mo blong plante yia hem i mekem sua nomo se i gat kaekae long tebol. Be long 1955, papa blong mi, we i gat 17 yia nomo, i stap go long tred skul long taon blong Rendsburg. Hem i wokbaot long saed blong wan bilding mo i luk wan smol saen aotsaed we i talem “Kirche Jesu Christi der Heiligen der Letzten Tage”—“Jos Ia blong Jisas Kraes blong Ol Lata-dei Sent.” Hem i tingting se, “Hemia i interesting; hemia hem i jos blong Mama.” Taem hem i kambak long haos, hem i talem long apu woman se hem i faenem jos blong hem.

Yu save pikjarem olsem wanem bae hem i filim afta long kolosap 25 yia we hem i nomo go long Jos. Hem i tingting strong blong go long nekis Sandei, mo hem i traem blong mekem papa blong mi i folem hem. Rendsburg hem i moa long 20 mael (32 kilometa) longwe long smol vilej we oli stap long hem. Be hemia bae i no stopem apu woman blong no go long jos. Long nekis Sandei, hem i tekem baskel blong hem wetem papa blong mi mo tufala i go long jos.

Taem sakramen miting i stat, papa blong mi i sidaon biaen olgeta, i wantem blong sakramen i finis hariap. Hemia i jos blong apu woman, i no blong hem. Wanem hem i luk i no leftemap tingting blong hem nating: sam olfala woman nomo oli kam, wetem tu yang misinari we tufala i mekem evri samting long miting ia. Be afta oli stat blong singsing, oli singim ol song blong Saeon we papa blong mi i bin harem taem hem i smol: “Kam, Kam, ol Sent,” “O Papa blong Mi,” “Presem Man ia.” Blong harem smol grup ia i singsing long ol singsing blong Saeon we hem i harem taem i smol, i tajem hat blong hem, hem i nogat tu tingting mo hem i save stret wantaem se jos i tu.

Fas sakramen miting ia we apu woman blong mi i atendem afta long 25 yia, hem i miting ia we papa blong mi i kasem konfemesen blong hemwan blong trutok we i fulwan blong gospel blong Jisas Kraes we i bin kambak. Hem i bin kasem baptaes tri wik afta long Septemba 25, 1955, tugeta wetem apu man mo anti blong mi.

Moa long 70 yia nao i pas afta long smol sakramen miting ia long Rendsburg. Mi stap tingbaot apu woman plante taem, olsem wanem hem i stap filim long ol naet ia hemwan, taem hem i stap mekem ol smol mo simpol samting we hem i save mekem, olsem prea, rid, mo singsing. Taem mi stap stanap ia tedei long jeneral konfrens mo tokbaot apu woman blong mi, strong tingting blong hem blong kipim ol kavenan mo tras blong hem long Lod nomata long ol jalenj blong hem, hat blong mi i fulap wetem tangkyu mo tingting we i stap daon—i no from hem nomo be from plante long ol gudfala sent blong yumi raon long wol we oli stap simpol long Kraes long ol had situesen blong olgeta. Ating oli stap luk sam smol jenis be oli gat tras se bae ol bigfala samting i hapen long fiuja.

Mi lanem tru long eksperiens blong miwan se ol smol mo simpol samting mo lukluk blong yumi long Kraes wetem fet i save lidim yumi i go long tru glad, long ol bigfala merikel, mo i mekem yumi gat tras se bae yumi kasem evri promes blesing. Hemia i tru blong yu, mo i tru blong mi. Long toktok blong Elda Jeffrey R. Holland, “Samfala blesing oli kam hariap, sam oli kam let, mo sam oli no kam kasem taem yumi go long heven, be long olgeta we oli akseptem gospel blong Jisas Kraes, ol blesing ia oli kam Long hemia, mi testifae long nem blong Jisas Kraes, amen.