Evri Man, I Jaj Blong Hemwan Nomo
Sapos yumi bin gat fet long Jisas Kraes, yumi bin mekem mo kipim ol kavenan wetem God, mo yumi bin sakem ol sin blong yumi—nao, bae kot blong jajmen i wan gudfala dei.
Buk blong Momon i en wetem ol insperesen invitesen we i kam long Moronae blong “kam long Kraes,” “kam stret evriwan tru long Hem,” “mo tanem baksaed blong [yumi] long evri fasin we i no olsem blong kam wan god,” mo “lavem God wetem ful paoa blong tingting, ful maen mo ful paoa blong [yumi].” Wanem we i pulum tingting blong mi, hem i stap long las sentens blong instraksen blong hem we i blong lukluk i go fored long tugeta Laef Bakegen long Ded mo Faenol Jajmen.
Hem i talem se, “I no longtaem bae mi go spel long paradaes blong God, kasem taem we spirit blong mi mo bodi bae tufala i kam tugeta bakegen, mo hae Jehova i tekem mi tru long skae, blong mitim yufala long fored blong gudfala kot blong hae Jehova, Jaj we I No Save Finis blong olgeta we oli stap laef tugeta wetem olgeta we oli ded.”
Mi intres long olsem wanem Moronae i yusum toktok ia “gudfala” blong tokbaot Faenol Jajmen. Ol nara profet blong Buk blong Momon oli tokbaot semmak se Jajmen i olsem wan “bigfala dei” mo wan we yumi mas “lukluk i go fored [from] wetem wan ae blong fet.” Be yet, oltaem taem yumi lukluk i go fored from Jajmen Dei, i gat ol nara toktok blong ol profet we oli kam long maen, olsem “sem mo nogud rong,” nogud mo fraet we i rabis stret,” mo “harem nogud we i no gat en.”
Mi biliv se bigfala samting we i mekem ol toktok ia oli defren i we oli soem se doktrin blong Kraes i mekem i posibol blong Moronae mo ol nara profet blong oli lukluk i go fored long bigfala dei ia wetem glad mo hop, be i no fraet we oli wonem long olgeta we oli no rere long saed blong spirit. ?Wanem nao Moronae i andastanem we yu mo mi i nid blong lanem?
Mi prea from help blong Tabu Spirit taem yumi tingting long plan ia blong Papa long Heven blong stap hapi mo sore, mo rol blong atonmen blong Sevya insaed long plan ia blong Papa, mo olsem wanem bae yumi “ansa from sin blong [yumiwan] long dei blong jajmen.”
Plan Ia blong Papa blong Stap Hapi
Ol stamba tingting we i kavremap evri samting long plan ia oli blong givim ol janis blong kasem wan bodi, blong lanem “gud aot long ivel,” long ol spirit pikinini blong Hem” tru long eksperiens long wol ia, blong gro long saed blong spirit mo progres i go long laef we i no save finis.
Wanem we Doktrin mo Ol Kavenan i tokbaot abaot “klin tingting blong fridom blong mekem joes” hem i stamba pat long plan ia blong God blong mekem ol pikinini boe mo gel blong Hem, oli nomo save ded mo kasem laef we i no save finis. Mo tu, impoten prinsipol ia oli tokbaot insaed long ol skripja olsem ejensi mo fridom blong jus mo blong tekem aksen.
Toktok ia “klin tingting blong fridom blong mekem joes” i kam wetem fulap wetem instraksen. Ol toktok we i semmak long toktok ia “klin tingting” i tekem tu “gud,” “ones,” mo “stap stret mo gud.” Ol toktok we i semmak long toktok ia “fridom blong mekem joes” i save tekem tu “aksen,” “aktiviti,” mo “wok.” From hemia, “klin tingting blong fridom blong mekem joes” oli save andastanem olsem paoa mo spesel janis blong jusum mo tekem aksen blong yumiwan long ol gudfala wei, stap ones, stap stret mo gud, mo stap tru.
Ol kriesen blong God i tekem tugeta “ol samting blong tekem aksen long olgeta, wetem ol samting we oli tekem aksen long yumi.” Mo klin tingting blong fridom blong mekem joes i wan tabu disaen blong “fri paoa blong tekem aksen” we i givim paoa long yumi olsem ol pikinini blong God we oli fri blong tekem aksen olgetawan nomo mo no stap wan samting nating we i blong ol samting oli tekem aksen long yumi.
Wol ia oli krietem olsem wan ples we ol pikinini blong Papa long Heven oli kasem tes blong luk sapos bae oli “mekem evri samting we Lod, God blong olgeta bae i givim oda long olgeta.” Wan fas stamba tingting blong Kriesen mo laef blong yumi long wol ia i blong givim long yumi wan janis blong tekem aksen blong kam wanem we Lod i invaetem yumi blong kam olsem.
Lod i givim instraksen long Inok:
“Luk olgeta brata blong yu; oli wanem we mi wokem long han blong mi, mo mi givim save blong olgeta long dei ia we mi bin krietem olgeta; mo insaed long Garen blong Iden, mi givim long man fridom blong hem blong mekem joes;
“Mo mi bin talem long ol brata blong yu, mo mi bin givim komanmen, long olgeta tu, se oli mas lavlavem olgeta bakegen, mo se bae oli mas jusum mi, Papa blong olgeta.”
Ol stamba tingting blong yusum fridom blong mekem joes i blong lavem wanwan long olgeta mo blong jusum God. Mo tufala stamba tingting ia tufala i go stret wetem fas mo nambatu bigfala komanmen we i blong lavem God ia [blong yu wetem ful hat, mo wetem ful sol, mo wetem ful tingting blong yu, mo yu mas lavem neba blong yu olsem yu lavem yuwan.
Tingting se Lod i givim komanmen long yumi—i no woning o kaonsel nomo, be Lod i komandem yumi—blong yusum fridom blong mekem joes blong yumi blong lavem wanwan long yumi, mo blong jusum God. Bae mi talem olsem se insaed long ol skripja, toktok we i jenisim “klin tingting” i no wan naes nem blong talem wan fasin be maet i wan tabu stret toktok abaot olsem wanem yumi mas yusum fridom blong mekem joes blong yumi.
Wan singsing we yumi save gud, taetol, “Jusum Raet” from wan risen. Yumi no kasem blesing blong klin tingting blong fridom blong mekem joes blong mekem eni samting we yumi wantem long eni ples yumi stap. Be, folem plan ia blong God, yumi bin kasem klin tingting blong fridom blong mekem joes blong lukaotem mo tekem aksen folem trutok we i no save finis. Olsem “olgeta we oli ripresentem Hem [yumiwan],” yumi mas wok wetem strong tingting long wan gud wok, “mo mekem plante samting long tingting blong [yumiwan] nomo, mo mekem plante stret mo gud wok oli kamtru.”
Wanem we i impoten mo i no save finis abaot klin tingting blong fridom blong mekem joes i kamaot insaed long skripja stori blong taem blong kaonsel we i tekem ples long laef bifo long wol ia. Lusifa i go agensem plan ia blong Papa blong ol pikinini blong Hem mo lukaotem blong prapa spolem paoa blong yumi blong tekem aksen yumiwan. Wanem we i moa impoten i we, fasin blong devel blong go agens i blong atakem nao prinsipol blong klin tingting blong fridom blong mekem ol joes.
God i bin eksplenem se, “Taswe, from se … Setan i bin kam agensem mi, mo i bin wantem blong prapa spolem gud fridom blong man blong mekem joes, … I Mi bin mekem se oli sakemaot hem.”
Selfis plan blong enemi i bin blong karemaot long ol pikinini blong God, paoa ia blong “oli fri blong mekem samting olgetawan nomo” blong oli save mekem samting long stret mo gud fasin. Tingting blong hem i blong mekem ol pikinini blong Papa long Heven oli stap olsem ol samting blong tekem aksen long olgeta nomo.
Stap Mekem mo Blong Kam Olsem
Presiden Dallin H. Oaks i bin tokbaot se gospel blong Jisas Kraes i invaetem yumi blong save wan samting mo blong kam wan samting tugeta, tru taem yumi eksesaesem klin tingting blong fridom blong mekem joes long wei we i stret mo gud. Hem i talem:
“Plante skripja long Baebol mo hemia blong tedei oli tokbaot wan faenol jajmen we bae evri man mo woman bae oli kasem riwod folem ol aksen, ol wok o ol tingting blong hat blong olgeta. Be ol nara skripja oli tokbaot moa hemia taem oli stap tokbaot se bae oli jajem yumi folem situesen we yumi bin stap long hem.
“Profet Nifae i tokbaot Faenol Jajmen folem ol situesen we yumi bin stap long hem: ‘Mo sapos ol wok blong olgeta oli bin doti, oli mas stap doti; mo sapos oli doti i mas nid se oli no save stap long kingdom blong God [1 Nifae 15:33; oli ademap italik]. Moronae i talemaot se, ‘Hem we i doti bae i doti i stap; mo hem we i stret mo gud bae i stret mo gud i stap’ [Momon 9:14; oli ademap italik].”
Presiden Oaks i gohed blong talem se: “Aot long ol tijing olsem, yumi kam blong lanem long en se “Las Jajmen i no blong skelem ful wok we i gud mo nogud—wanem yumi bin mekem. Hem i blong luksave wanem ol aksen mo tingting blong yumi—huia yumi bin kam.”
Atonmen blong Sevya
Ol wok mo samting we yumi wantem nomo, oli no save sevem yumi. “Afta evri samting nomo we [yumi] save mekem,” yumi stretem yumi wetem God tru nomo long sore mo gladhat we i stap tru long paoa blong sakrifaes blong Sevya we i no save finis.
Alma i talemaot se, “Stat blong biliv long Pikinini blong God, se bae hem i kam blong pemaot ol pipol blong hem, mo se bae hem i safa mo kasem ded blong pem praes blong ol sin blong olgeta; mo se bae hem i girap bakegen long ded, se bae i mekem fasin blong laef bakegen long ded i hapen, blong mekem se evri man bae i stanap long fored blong hem, blong kasem jajmen long las mo jajmen dei, folem ol wok blong olgeta.”
“Mifala i biliv we tru long Atonmen blong Kraes, bae Kraes i sevem evri man taem oli stap obei long ol loa mo olgeta odinens blong Gospel.” Hamas nao yumi mas glad se ol sin mo ol rabis fasin blong yumi bae oli no stap olsem wan testemoni agensem yumi sapos i tru se yumi “bon bakegen,” gat fet long Ridima, sakem sin wetem wan “tru hat” mo “tru tingting,” mo “stap strong kasem en.”
Fraet long God
Plante long yumi, yumi ting se wei we man bae i luk yumi long fored blong Jaj we I No Save Finis, bae i hapen olsem loa blong kot blong wol ia. Wan jaj bae i prisaed. Bae oli soem ol pruf. Long en, bae i gat wan las desisen. Mo i tru bae yumi no sua stret mo fulap wetem fraet kasem yumi faenemaot risal long en. Be mi biliv se fasin blong yumi tingting olsem, i no stret.
Hem i defren be i go wetem ol fraet blong wol we yumi fesem plante taem, hem i wanem we ol skripja i tokbaot olsem “fraet long God” o “tanem baksaed long ol fasin nogud.” I no semmak long fraet blong wol we i mekem man i tingting tumas, fraet long God bae i invaetem pis, hop, mo strong tingting.
Fraet we i stret mo gud i tekem wan dip filing blong bigfala respek, mo bigfala sapraes long Lod Jisas Kraes we i kwaet, fasin blong stap obei long ol komanmen blong Hem, mo wet from Las Jajmen mo jastis long han blong Hem. Fraet long God i gro aot long wan stret andastaning blong tabu fasin mo misin blong Ridima, wan strong tingting blong folem tingting blong Hem mo wan save we evri man mo woman bae oli responsibol long ol tingting blong hat blong olgetawan, mo ol tingting, ol toktok mo ol aksen blong olgetawan long Dei blong Jajmen.
Fraet long God i no blong fraet blong stanap long fored blong Hem mo kasem jajmen. Be, hem i hop ia long en we i blong akseptem ol samting abaot yumiwan olsem ol samting we oli tru, mo olsem ol samting we bae oli kam olsem.”
Evriwan we i bin laef, o naoia i stap laef mo we bae oli laef yet long wol ia “bae oli karem olgeta blong stanap long kot blong God, blong kasem jajmen folem ol wok blong [hem,] sapos oli gud o sapos oli nogud.”
Sapos tingting blong hat blong yumi i bin gat fasin blong stap stret mo wok blong yumi i bin gud—minim se yumi bin gat fet long Jisas Kraes, yumi bin mekem mo kipim ol kavenan wetem God, mo yumi bin sakem ol sin blong yumi—afta nao, bae kot blong jajmen i glad. Olsem we Inos i bin talemaot se bambae yumi “stanap long fored blong [Ridima]; afta bae [yumi] luk fes blong hem wetem glad.” Mo long las dei bae yumi “kasem pei blong stret mo gud fasin.”
Semmak, sapos wanem yumi bin wantem oli nogud o wok blong yumi i no stret, nao bambae long jajmen bae yumi wari. Bae yumi gat “wan stret save,” kam blong “tingbaot klia bakegen,” mo gat wan “filing blong luksave mo filim save ol rong blong yumiwan.” “Bae yumi gat fasin blong fraet blong lukluk antap long God blong yumi; mo bae yumi glad plante blong talem long ol ston mo ol bigfala hil blong foldaon long yumi blong haedem yumi long fes blong Hem.” Mo long las dei bae yumi “kasem pei blong nogud wok blong [yumi].”
Long en, yumi nao yumi ol jaj blong yumiwan nomo. I no gat wan bae i nid blong talem long yumi weaples blong go. Long ples we God i stap, bae yumi luksave wanem we yumi bin jusum blong kam olsem long laef blong wol ia mo save long yumiwan weaples yumi mas stap long hem blong taem we i no save finis.
Promes mo Testemoni
Blong andastanem se Faenol Jajmen i save kam wan gudfala samting be i no wan blesing we i stap speseli blong Moronae nomo.
Alma i tokbaot ol blesing we i gat i stap blong evri fetful disaepol blong Sevya. Hem i talem:
“Mining blong toktok ia, blong putumbak ol samting long stret ples we oli bin stap long hem bifo, i minim blong putumbak nogud long man we i mekem nogud samting, o fasin blong wol long man we i folem fasin blong wol, o samting blong devel long man we i mekem samting blong devel—gud long hemia we i gud; stret mo gud fasin long hemia we i stret mo gud; raet long hemia we i raet; sore long hemia we i gat sore.
“… Mekem stret samting, jaj wetem stret mo gud fasin, mo mekem gud oltaem; mo sapos yu mekem ol samting ia bae yu kasem pei blong yu; yes, bae fasin blong gat sore i kambak long yu bakegen; bae yu gat jastis i kambak long yu bakegen; bae fasin blong gat stret jajmen i kambak long yu bakegen; mo bae yu kasem gudfala pei bakegen.”
Mi witnes wetem bigfala glad se Jisas Kraes i Sevya blong yumi we i stap laef. Promes blong Alma i tru mo i blong yu mo mi—tedei, tumoro mo blong taem we i no save finis. Mi testifae olsem long tabu nem blong Lod Jisas Kraes, amen.