Tekem long yumi Nem blong Jisas Kraes.

Long 2018, Yunivesiti blong Yuta, i gat wan spesel ofis we oli krietem mo singaotem, “Dokta. Russell M. Nelson mo Dantzel W. Nelson Jea blong Presiden insaed long Kadiotorasik Operesen”—kadio, i minim hat, mo torasik, i minim jes”. Oli givim respek long Presiden Nelson long impoten wok blong hem olsem wan dokta blong operesen blong hat mo sapot we hem i kasem long let waef blong hem, Dantzel. Ofis ia i gat wan bajet we i save stap blong plante yia. Wan man we oli jusum long wan kaen ofis olsem hem i wan we bae oli luk save, bae kasem wan salari mo kasem ol fand blong wok wetem.

Fas dokta blong operesen we oli jusum long ofis ia i Dokta. Craig H. Selzman, wan dokta blong operetem hat we i no wan memba blong jos blong yumi. Long seremoni blong givim awod blong ofis ia i go long Dokta. Selzman, plante impoten ges oli stap long taem ia, wetem Presiden Nelson mo waef blong hem Sista Wendy W. Nelson. Long taem blong miting Presiden Nelson i toktok wetem tingting we stap daon abaot wok blong hem.

Dokta Selzman i serem wanem i minim long hem blong i kasem ofis ia. Hem i talem se fo dei bifo, afta long wan long dei insaed long rum blong operesen, hem i faenemaot se wan long ol sik man blong hem i nidim blong oli operetem hem bakegen. Hem i taet mo i harem nogud, hem i save se bae i spenem wan narafala naet long hospital.

Long naet ia, Dokta. Selzman i gat storian wetem hemwan we bae i jenisim laef blong hem. Stret long taem ia, hem i tingting, “Long Fraedei, bae oli singaotem mi go long ofis we oli nemem afta long Dokta. Nelson Oli save hem olsem wan man we i save holem taet ol filing blong hem, soem respek long evriwan, mo i neva kros. Naoia we bae nem blong mi i joen wetem blong hem, mi nidim blong traem blong kam moa olsem hem.” Dokta Selzman hem i wan gudfala dokta blong operetem man finis. Be hem i wantem blong kam moa gud.

Bifo, operesen tim blong hem oli save gud taem we hem i taet mo kros from hem i soem long aksen mo tiun blong voes blong hem. Be long naet ia insaed long rum blong operesen, Dokta. Selzman i mekem wan efot speseli blong sapotem mo andastanem tim blong hem. Hem i filim se hem i mekem wan samting i defren mo gohed blong traem blong kam olsem Dokta Nelson

Faef yia i pas, Presiden Nelson i mekem wan donesen long ol profesonol pepa blong hem i go long Yunivesiti blong Yuta. Ol impoten man blong Yunivesiti oli kam blong talem tangkyu long Presiden Nelson. Long iven ia , Dokta. Sezman i toktok bakegen. Hem i yusum nem blong Presiden Nelson, olsem RMN, mo hem i talem“I gat wan fasin blong ‘RMN’ we Grup blong Hat Operesen long Yunivesiti blong Yuta oli folem.”

Long taem blong ol situesen we i fasfas, Dokta. Selzman i eksplenem, “Mi mekem wanem naoia mifala i stap tijim olgeta we oli stap tren blong mekem—blong lukluk stret, muv i go fored , mo mekem bes efot blong yu. Fasin ia i stap wetem yumi evri dei. Mifala i givim wan smol pin long evri memba blong grup o evri niu studen we i tekem trening. Andanit long pin ia ol leta ia i stap ‘RMN.’ Fasin blong RMN i stamba blong trening blong mifala, mifala i tijim long evriwan.” Dokta Selzman i jenisim fasin mo hop blong hem from se naoia nem blong hem i joen wetem hemia blong Presiden Nelson.

Long ol taem we Dr. Selzman i mekem mi askem miwan, “?Olsem wanem nao mi bin jenis taem we mi bin joenem nem blong mi wetem Jisas Kraes? ?Mi bin karem ol fasin blong Kraes olsem wan risal blong hem? ?Mi bin traehad wetem tru tingting blong kam moa gud mo olsem Hem?

Long eksperiens blong Dokta Selzman, yumi save luk faef wei we yumi save tekem long yumi nem blong Jisas Kraes. No mata se rod ia i stat wetem baptaes, be hem i no komplit kasem taem yumi kam klin evriwan mo tabu mo kam moa olsem Hem.

Fas wei hem i blong luksave. Apoenmen blong Dokta Selzman i go long Ofis blong Nelson i joenem nem blong hem wetem Presiden Nelson mo Dokta Selzman i stat blong luksave Presiden Nelson. Taem yumi tekem long yumi nem blong Jisas Kraes, yumi joenem nem blong yumi wetem blong Hem. Yumi luksave Hem. Wetem glad, yumi kam olsem ol Kristin man. Yumi luksave Sevya mo no fraet blong talem se yumi pat blong Jos blong Hem.

Semmak olsem blong luksave wan narafala wei hem i—blong tingbaot. Taem we Dokta Selzman i go insaed long ofis blong hem, ae blong hem i fas long medol we hem i bin kasem taem we oli singaotem hem i go long Nelson ofis. Medol ia i rimaenem hem long evri dei fasin blong RMN. Long yumi, stap tekpat long sakramen evri wik i helpem yumi blong tingbaot Jisas Kraes truaot long wik. Taem yumi tekpat long sakramen, i mekem yumi tingbaot praes blong sin we Hem i pem blong sevem yumi. Yumi mekem kavenan bakegen blong tingbaot Hem, luksave olsem wanem Hem i impoten mo glad from gud fasin blong Hem. Yumi gohed blong luksave tru nomo long gladhat blong Hem, oli sevem yumi long ded long saed blong bodi blong mit mo bun mo long saed blong spirit.

Blong tingabaot i minim se bae yumi folem advaes we i kam long Buk blong Momon profet, Alma. Semmak olsem we Alma i talem long boe blong hem, “letem evri wok blong yu i blong Lod, mo eni ples we yu go, letem i hapen wetem Lod; yes, letem evri tingting blong yu i go long Lod; yes, letem ol filing blong hat blong yu i stap long Lod blong oltaem.” Iven we yumi gat tumas samting long maen, yumi mas tingbaot Hem, i olsem we yumi tingbaot nem blong yumi, nomata wanem yumi fokas long hem.

Wan samting we i kamaot blong tingbaot wanem Sevya i bin mekem blong yumi i namba tri wei—kopi. Dokta. Selzman i stat blong kopi Presiden Nelson mo fasin blong RMN. Mi biliv se fasin blong Presiden Nelson i jes soemaot fasin blong hem blong folem Jisas Kraes. Blong yumi, moa yumi luksave Kraes mo tingbaot Jisas Kraes, moa yumi wantem blong kam moa olsem Hem. Olsem ol disaepol blong Hem, yumi jenis evriwan taem yumi lukluk nomo long Hem, moa bitim we yumi lukluk long yumi. Yumi traem blong kam moa olsem Hem mo lukaotem blong kasem ol blesing blong fasin blong Hem. Yumi prea wetem tingting i stap daon blong fulap wetem jareti, klin lav blong Kraes.

Olsem we Presiden Nelson i tijim long Epril: “Taem bigfala lav i kam pat blong laef blong yumi, bae yumi lusum paoa blong putumdaon ol narafala man. Bae yumi stop blong jajem ol narafala man. Bae yumi gat bigfala lav long evri man raon long yumi wetem defren wei blong laef blong olgeta. Yumi nidim blong gat bigfala lav long evri wan blong mekem se yumi save gro. Jareti i fandesen blong ol gudfala fasin.” Long saed blong Jareti, yumi lukaotem, “wok yusum, mo mekem i kam bigwan” ol narafala presen long saed blong spirit we i kam long Sevya, i we i tekem tu klin fasin, stap tru mo strong, fasin blong save wet longtaem, putum tingting i stap daon, mo stanap strong.

Stap kopi Jisas Kraes i lidim yumi go long namba fo wei—stretem yumi wetem stamba tingting blong Hem. Yumi joen wetem Hem long wok blong Hem. Olsem wan dokta blong operesen, Dokta. Nelson oli save hem olsem wan tija, man blong mekem man i fil oraet , mo man blong lukaotem samting. Pin we oli yusum long grup blong Dokta. Selzman’s i talemaot , ol toktok ia tij, hilim, mo faenemaot. Long yumi, sam pat blong tekem nem blong Jisas Kraes long yumi.i tekem tu fasin blong minim blong mekem samting wetem ful hat mo stretem ol gol blong yumi wetem blong Hem. Yumi joen wetem Hem long wok blong Hem taem yumi “lavem, serem, mo invaetem.” Yumi joen wetem Hem long wok blong Hem taem yumi givhan long ol narafala, speseli olgeta we oli no strong o oli harem nogud long ol eksperiens blong olgeta long wol ia.

Mekem se yumi tekem moa long yumi nem blong Jisas Kraes tru long fasin blong luksave, tingabaot, kopi, mo stretem fulwan . Mekem olgeta fo wei ia i tekem yumi go long namba faef wei—gat paoa. Yumi kasem akses long paoa blong God mo ol blesing insaed long laef blong yumi. Ofis blong Nelson i mekem oli luksave Dokta Selzman mo ol sapot fand we hem i stap yusum blong jenisim kalja insaed long grup blong hem. Hem i yusum “tabu mane ia” blong helpem ol narafala man. Long semmak wei, we yumi tekem long yumi nem blong Sevya, Papa blong yumi long Heven i blesem yumi wetem paoa blong Hem blong helpem yumi blong fulfilim misin blong yumi long wol ia.

Taem yumi stap mekem moa kavenan wetem God, yumi tekem long yumi nem blong Jisas Kraes fulwan. Oltaem, God i blesem yumi wetem paoa blong Hem. Olsem we Presiden Nelson i tijim: “Wanwan man mo woman we i mekem kavenan long ples blong baptaes mo insaed long ol tempol—mo i kipim olgeta—i kasem moa paoa blong Jisas Kraes. Presen blong kipim kavenan wetem God hem i paoa blong heven we i mekem yumi strong blong winim ol hadtaem blong yumi, ol temtesen, mo mekem hat we i so i kam moagud bakegen.”

Ol maen blong yumi i open moa long saed blong spirit. Yumi gat moa strong tingting blong fesem eni kaen situesen. Yumi mekem kam strong moa blong folem Jisas Kraes. Taem yumi mekem sin, yumi sakem sin kwiktaem moa mo gobak long Hem. Yumi kam moa gud blong serem gospel blong Hem wetem paoa blong Hem mo atoriti. Yumi helpem olgeta we oli stap long nid mo no jajem olgeta. Holemtaet fasin blong kam klin aot long ol sin blong Yumi. Yumi save gat bigfala pis, mo yumi hapi moa, mo oltaem yumi save stap glad. Nem blong Hem i stap wetem yumi, mo ol enjel blong Hem oli lukaotem gud yumi.

Sevya i invaetem yumi blong “Kam long Papa tru long nem blong mi, mo long stret taem, kasem ful paoa mo glori blong hem. ” Mi askem strong long yu blong mekem hemia. Kam long Papa blong yumi long Heven. Tekem nem blong Jisas Kraes long yumi. Luksave wetem Hem. Tingbaot Hem oltaem. Traem blong kam olsem Hem. Joen wetem Hem long wok blong Hem. Kasem ol paoa blong blesing blong Hem long laef blong yu. Yu wantem mo minim blong raetem nem blong Hem long hat blong yu. Hemia i mekem yu “stanap long fored blong God mo i kwalifaem Sevya blong stap olsem loya blong yu. Bae yu kam wan god insaed long kingdom blong Papa blong yumi long Heven, yumi save joen long Kraes, Sevya mo Ridima we yumi lavem tumas.

Hem i stap laef. Mi save se hemia i tru. Hem i lavem yu. Hem i givim laef blong Hem from yu. Hem i askem strong blong yu kam long Papa tru long Hem. Long nem blong Jisas Kraes, amen.