Jisas Kraes mo Niu Stat blong Yu

Jisas “i go mo mekem ol gudfala wok.” Yumi ridim simpol ripot ia long buk blong Ol Wok. !Hemia i wan bigfala toktok we yumi no luksave se i impoten! !I tru se Jisas i go mo mekem ol gudfala wok! !Hem i stret stamba—mo sos—blong gud samting! Hem i givim ful laef blong Hem blong mekem ol gudfala wok. Hem “i gat sore, i gat gladhat, i gat longfala tingting long hadtaem, mo i fulap long gud fasin mo trutok”. Sore mo gladhat blong Hem i stap blong oltaem.

!Bae yumi neva save tokbaot gladhat mo sore blong Hem fulwan, wetem ol toktok blong yumi iven sapos yumi traem! I tru, olsem Aposol Jon i talem se, sapos yumi traem blong raetem daon evri situesen we Sevya i soem gudfala fasin blong Hem, “bae i nogat inaf rum long wol ia blong holem ol buk ia.”

Ol stret eksampol long skripja we i stap blong oltaem, abaot Jisas we i mekem “ol gudfala wok”, oli tajem hat blong yumi. Speseli taem yumi tingting long olsem wanem bae i hapen sapos yumi stap long taem ia, blong witnesem ol merikel, kasem ol tijing, mo eksperiensem hiling blong Hem. Hem i stori wetem olgeta we sosaeti i sakemaot olgeta, Hem i tajem ol sik mo olgeta we oli no klin, givim pis long olgeta we oli taet, tijim trutok we i mekem man i fri, mo invaetem ol man we oli mekem sin, blong sakem sin. Hem i givim wan niu stat long olgeta we oli gat rabis sik, oli blaen, mo ol woman we i slip wetem man we i no ol man blong olgeta; long man we i no save wokbaot, harem samting, mo toktok; long mama we i stap wari, papa we i gat nid, wido we i harem sore; long olgeta we oli kasem panis, oli sem, mo oli harem nogud; long olgeta we oli ded long saed blong bodi mo spirit. !Yes, wan moa impoten toktok we i wekemap yumi!

Evri samting Hem i talem mo mekem, i givim wan niu stat long wanwan long olgeta we Hem i hilim, blesem, tijim, mo mekem i fri aot long sin. Hem i no bin lego olgeta, mo bae Hem i no lego yu. Tekem olsem yu stap harem ol naes toktok ia i kam long Hem naoia:

“Pikinini blong mi, ol sin blong yu mi mi tekemaot finis.”

“Smol gel, yu stanap.”

“Yu klin.”

“Mi tu mi no save jajem yu. Be i gud yu gohom, mo yu nomo mekem sin bakegen.”

“Dota blong mi, bilif blong yu i mekem yu yu gud bakegen. Yu go, yu no moa wari bakegen.”

Ol toktok blong Sevya we i go long olgeta ia, oli sot nomo, be wetem ol toktok ia, Hem i jenisim lukluk long fogivnes, hiling, restoresen, pis mo laef we i no save finis. Mo gud nius hem i we, Hem i givim semmak niu stat ia long yu mo long mi. Yumi evriwan i save gat wan niu stat, tru, mo from, Jisas Kraes. Iven yu. Ol niu stat oli impoten long plan blong Papa, blong ol pikinini blong Hem. !Hemia i jos blong ol niu stat! !Hemia i jos blong ol fres stat!

Taem yumi kasem baptaes long wota mo Spirit, yumi “bon bakegen” mo save “gat niufala laef.” ?Hamas hop nao wan niu stat i givim long wan man we i hevi long sin blong hem, o i harem nogud from ol risal blong wan trabol laef mo ol rilesensip we i nogud? Jisas Hemwan i no nidim fogivnes blong sin o wan niu stat long laef, be yet Hem i kasem baptaes, mo soem long yumi klia rod we i lid i go long wan niu stat, we Hem i mekem blong yumi.

Mo niu stat blong yumi i no save hapen wan taem ia nomo. Yumi stap ting oltaem se baptaes hem i wan taem ia nomo blong yumi gat wan niu stat. Be i no olsem. Yumi gat plante janis. !Ol niu stat ia i save hapen evri dei! !Mo tu long evri wik taem yumi tekpat long sakramen blong tingbaot presen blong Sevya blong yumi we i stret evriwan, we Hem i ded speseli blong givim yumi ol niu stat we yumi nidim! Jisas i givim yumi ol niu stat we yumi nidim.

Taem yumi givim yumiwan mo stap glad long wan niu laef long Kraes, yumi save kam “wan niufala man,” taem yumi letem evri olfala samting i go mo welkamem ol niu wan. ?Olsem wanem nao wan niu stat olsem i givim pis long wan sol we i stap traehad, mo gohed blong jusum fet long paoa blong Ridima blong yumi, blong kasem hiling mo kambak tugeta bakegen, nomata long ol bigfala hadtaem blong laef long wan rabis wol? Sevya i neva givap long komitmen blong Hem blong mekem tingting blong Papa mo tabu misin blong atonmen blong Hem i hapen, iven tru long harem nogud we i mekem Hem i seksek from soa long bodi, blad blong Hem we i ronaot long evri hol blong skin, i safa tugeta long bodi mo long spirit­ mo Hem i no wantem dring kap ia we i konkon, Hem i wantem holemtaet Hem. Bakegen, Hem i soem long yumi olsem wanem yumi save stanap strong wetem fet long God.

Taem yumi stap traehad blong kipim evri kavenan yumi mekem, yumi save kasem “wan niufala laef” mo “wan niufala tingting” we i moa bigwan. Taem yumi statem sloslo blong invaetem gudfala fasin blong Hem long hat blong yumi mo karemaot ol rabis tingting blong yumi, yumi stap kam ol pipol blong Hem from yumi mekem Hem i kam God blong yumi wetem tru hat. Jisas i wantem tumas blong kam King, Man blong lukaot long sipsip mo Stamba blong Pis blong yumi. Yumi save jus blong mekem Hem i kam ol samting ia insaed long hat mo maen blong yumiwan.

Fasin blong sakem sin i givim yumi ol niu stat, ol fres stat, mo ol seken janis. Ol tijing blong dia Presiden Russell M. Nelson i karemaot ol tu tingting abaot tabu presen blong sakem sin, mo mi ting se naoia yumi statem blong andastanem hemia moa.

I gud tumas blong harem ol yut blong yumi i tokbaot wanem fasin blong sakem sin i minim long olgeta. I no longtaem i pas, mi harem wan yang woman i talem, wetem wan smael long fes blong hem, se “Taem mi tingting long fasin blong sakem sin evri dei , i, mi filim bigfala glad mo hop. Mi filim lav mo hapines blong Papa long Heven mo Sevya blong mi. Mi no fraet blong kam long Papa long Heven mo askem help blong Hem long wanem samting mi stap fesem. Mi save se Tufala i no traem blong mekem mi sem taem mi sin. Tufala i stap oltaem blong welkamem yumi. Hemia, long mi i fasin blong sakem sin,” hem i talem. !Yang woman ia i andastanem se tru long Jisas Kraes, hem i save gat ol niu stat!

?Yu yu nidim wan niu stat? ?Iven yu, yu save mekem wan fres stat? Tingbaot ol pipol we Sevya i givhan long olgeta —ol pipol we Hem i bin tijim, hilim, mekem oli laef bakegen long ded, fogivim, mo mekem oli kam moa gud. ?Hem i bin jusumaot olgeta folem saed blong mane o from oli rij? ?Hem i bin jusumaot olgeta we oli klin aot long olgeta we oli fulap long sin? ?Hem i bin jusumaot olgeta from oli klin inaf o from Hem i lavem olgeta moa? No.

Sam oli kam long Hem wetem bigfala fet, mo oli biliv long paoa blong Hem blong kasem hiling—olsem woman we i gat sik blong woman, wokman blong kapten blong ol soldia blong ol man Rom we i stap ded, man ia we i gat rabis sik, Jaeras, o blaen Batimeas. Wanwan long olgeta i soemaot fet blong hem, mo i wantem se gudfala fasin mo paoa blong tija blong Nasaret bae i jenisim laef mo fiuja blong olgeta. Mo Hem i bin mekem hemia i hapen. Hem i letem hiling paoa blong Hem i mekem wok.

Be Jisas i helpem tu olgeta we oli nogat strong fet, olsem papa blong pikinini ia we i sik i talem, ating semmak olsem yu mekem, “Mi mi bilif, be bilif blong mi i smol. Plis yu givhan long mi.” Mo Hem i gat bigfala sore long olgeta we oli no iven lukaotem Hem, olsem woman ia we i slip wetem wan man we i no man blong hem, wido blong Naen, sikman ia long wota blong Betsata, mo man ia we i blaen taem i bon. ?Yu stap filim finis taem Hem i stap go raon mo mekem ol gudfala samting long laef blong yu iven taem yu no lukaotem o folem Hem?

Long wanwan man long olgeta long skripja ia, mo evriwan we i lisin mo tekem aksen, Hem i givim wan niu stat. Wan niu laef we i fri aot long sin, wan niu laef we i hil long sik, mo wan niu laef we i girap bakegen long ded.

?Hemia i minim wanem long yu mo long mi? Gudfala fasin, sore, kaen fasin mo lav blong Hem i we i no save finis. !Ol niu stat oli impoten long plan blong Papa! !Ol fres stat oli misin blong Pikinini! !Ol niu stat, niu japta, mo niu janis oli ol simpol samting we oli impoten long gud nius blong gospel ia!

?Yu stap longwe long ol kavenan blong yu longtaem tumas blong kasem wan niu stat? No. ?Yu bin mekem hemia plante taem tumas blong kasem wan moa janis? No. ?Yu bin go longwe tumas long Kraes, blong Hem i helpem yu blong raetem wan niu stori stat naoia i go? No. Enemi hemwan nomo bae i glad sapos yu draon long harem nogud blong yuwan. I no olsem.

Mo ol niu stat oli no blong ol sin mo mistek blong yumi nomo. Tru long gudfala fasin mo gladhat blong Sevya, yumi save gat ol fres stat we i mekem yumi jenisim ol fasin blong bifo, ol rabis fasin, ol kros, ol fasin we i no stret, filing blong nogat paoa, fasin blong poenem fingga long narawan mo no mekem ol diuti blong yuwan. Yu save jenisim ol samting abaot yuwan, ol samting we i stap pulum yu i go daon blong plante yia. Yu save stat bakegen tru long paoa blong Masta blong ol niu stat. Hem i neva taet blong givim yumi ol niu stat.

Long olgeta we oli stap traehad blong winim semmak sin o oli stap foldaon bakegen mo bakegen, gohed blong traehad. Hem i no blokem rod blong yu. Hem i no putum wan limit long ol seken janis blong yu. Yu go fored. Yu gohed blong stap traehad. Yu askem help blong olgeta raon long yu. Mo gat tras long niu stat we i stap, blong yu, evri taem yu kambak long Papa blong yu wetem tru hat. Lego ol sin we yumi minim blong mekem mo ripitim , mo ol faet wetem hae tingting, biaen, long stret ples blong olgeta. Yu no nid blong stap semmak olsem bifo. Akseptem fres stat, seken , nambatri, nambafo—o namba handred—janis blong yu, we yu kasem tru long blad blong Jisas Kraes we i ron from yu.

Mi no save talem hamas mi glad from niu stat we mi kasem mo from ol niu stat we bae mi kasem yet.

Sevya blong yumi i talemaot wan las impoten toktok we sapos i nogat, bae i nogat risen blong gat hop o glad tedei. Afta long bigfala harem nogud long Getsemane mo afta we oli nilim Hem long kros, Hem i talem nomo se, “Olgeta samting i finis nao.” Profesi blong Mesaea i fulfil, Hem i pemaot fulwan, kaon blong ol sin mo harem nogud blong wol. Hem i talem “i finis nao” long sakrifaes blong Hem we i no save finis mo i stap blong oltaem. Be Atonmen blong Hem bae i no save komplit kasem taem Hemwan nomo i eksperiensem niu laef long nambatri dei, wan niu stat, ia olsem wan we i kasem glori mo i laef bakegen long ded tru long paoa blong Papa.

From se oltaem Hem i stap mekem ol samting we Papa i wantem, mo from Hem i “mekem wanem we Papa i wantem long evri samting,” yumitu save gat ol niu stat. Plis kasem niu stat blong yu, iven tedei, naoia. Jisas Kraes we i stamba blong bilif blong yumi, i stap raetem plante niu japta wetem yumi. Hem i stat mo i En—en blong sem mo harem nogud blong yumi mo stat blong wan niu laef long Hem, we i mekem yumi kasem gladhat blong hem mo lego ol samting we i pas finis, biaen mo stat bakegen wetem wan niu stat o plante stat olsem yumi nidim. I tru se “bae Hem i gat sore long [yumi] oltaem long [laef blong yumi].” Long nem blong Jisas Kraes, amen.