Fas Toktok
Naoia bae yumi gohed wetem medel yia jeneral konfrens, wetem ol spika mo miusik we Presiden Nelson i bin asaenem long plante manis i pas, taem hem i stap rere from konfrens ia.
Ol dia brata mo sista blong mi, yumi kam tugeta long taem ia we yumi stap krae from ded blong Presiden Russell M. Nelson we yumi lavem tumas. Mi toktok long yufala olsem Presiden blong Kworom blong Olgeta Twelef, we hem i posisen we oli bin sastenem mi finis long hem long evri konfrens long—wod, stek, mo jeneral konfrens—blong seven mo haf yia we i pas.
Bae yumi gohed wetem medel yia jeneral konfrens, wetem ol spika mo miusik we Presiden Nelson i bin asaenem long plante manis i pas, taem hem i stap rere from konfrens ia. Ol samting we yumi ademap hem i introdaksen ia we mi stap eksplenem olsem wanem konfrens ia i hapen, mo we bae mi toktok long ples blong Presiden Nelson long las sesen long Sandei aftenun.
Hemia hem i fastaem long 75 yia we wan Presiden blong Jos i ded, hamas dei nomo bifo long wan jeneral konfrens. Hemia i mekem se mifala i mas mekem plan long olsem wanem bae mifala i save mekem ol impoten lidasip miting abaot wanem blong mekem abaot jeneral konfrens mo tu ol jeneral sesen blong konfrens, mo long semmak taem, oganaesem taem blong fenerol blong profet kwiktaem olsem we mifala i save mekem. Presiden Nelson i andastanem valiu blong jeneral konfrens blong givim daereksen long Ol Sent long ol manis we i stap kam. Mifala i givim ona long hem taem mifala i stap gohed wetem konfrens ia we hem i apruvum olsem we hem i plan from.
Long taem ia blong harem nogud, mifala i bin gat wan miting finis blong pem respek long Presiden Russell M. Nelson bifo long ol jeneral konfrens miting blong yumi, mo putum taem blong fenerol blong hem kwiktaem olsem we i posibol, afta long konfrens. Evri samting ia mifala i mekem wetem apruvol blong famli blong Presiden Nelson mo Kworom blong Olgeta Twelef Aposol.
From evriwan we oli bin asaenem blong givim toktok long jeneral konfrens bae oli wantem tekem janis ia blong pem respek blong olgetawan long Presiden Nelson, from hemia, mifala i bin askem evri spika blong konfrens blong mekem ol toktok blong respek i sot nomo mo kipim blong taem blong fenerol, we mifala i stat blong stap mekem plan from finis.
Sot toktok blong respek blong mi—we i stret blong konfrens ia mo ol nara toktok blong respek we oli talem finis—i hemia: Mi lavem Russell M. Nelson mo mi bin lanem moa abaot gospel mo gospel lidasip aot long longfala frensip mo wokbaot blong mi wetem hem, bitim eni nara lida we mi savegud olgeta. Hem i wan eksampol long yumi olsem wan wokman mo man blong folem Lod Jisas Kraes. Mi testifae long ol samting ia, long nem blong Jisas Kraes, amen.