No Gat Wan I Sidaon Hemwan

Blong 50 yia, mi bin stadi long kalja, mo tu long kalja blong gospel. Mi bin stat wetem ol laki biskit (we i gat ol mesej we oli raetem long ol smol pepa insaed long hem).

Long Jaena taon blong San Fransisko, long en blong dina blong famli Gong, bae mifala endem wetem wan laki biskit mo wan waes mesej olsem “Wan wokbaot blong taosen kilo mita, i stat wetem wan singgel step.”

Olsem wan yang adalt, mi bin stap mekem ol laki biskit ia. Mi werem ol waet koten glav mo foldem mo benem ol raon kuki i go long sep, taem oli kamaot long oven.

Mi sapraes blong lanem se ol laki biskit oli no kamaot long kalja blong ol Jaenis. Blong luksave wanem i defren long kalja blong laki biskit blong ol man Jaena, Amerika, mo Yurop, mi lukaotem ol laki biskit ia long ol defdefren ples long wol—long semmak fasin we wan bae i mekem taem i stap traem blong faenemaot se faea blong bus i stat wea. Ol Jaenis ples blong kakae long San Fransisko, Los Anjeles, mo Niu Yok, oli mekem ol laki biskit, be i no olgeta long Beijing, Landon, o Sidni. Ol man Amerika nomo oli selebretem Nasonal Laki Biskit Dei. Ol Jaenis advataesmen nomo oli givim “Stret Laki Biskit blong Amerika.”

Ol laki biskit oli wan naes mo simpol eksampol. Be semmak prinsipol blong stap komperem ol praktis long ol defren ples blong kalja, i save helpem yumi blong luksave kalja blong gospel. Mo naoia Lod i stap givim yumi ol niu janis blong lanem kalja blong gospel taem ol parabol mo profesi blong Buk blong Momon mo Niu Testeman ol stap kam tru.

Ol pipol oli stap muv evri ples. Yunaeted Nesen i ripotem 281 milian pipol we oli muv long ol nara kantri. Hemia i 128 milian moa man bitim long 1990, mo i tri taem bitim namba blong ol pipol ia long 1970. Long evri ples, yumi stap kasem ol rekod namba we i moa hae, blong ol konvet we oli stap joenem Jos Ia blong Jisas Kraes blong Ol Lata-dei Sent. Evri Sabat dei, ol memba mo fren blong 195 kantri mo eria, oli kam tugeta long 31,916 kongregesen blong Jos. Yumi toktok 125 lanwis.

I no longtaem i pas long Albania, Not Makedonia, Kosovo, Switselan, mo Jemani, mi bin luk ol niu memba oli stap mekem parabol blong oliv tri long Buk blong Momon, i kam tru. Long Jekob 5, Lod blong plantesen mo ol wokman blong Hem oli mekem ol rus mo branj blong oliv tri i kam strong, taem oli karem ol nara rus mo branj long ol nara ples mo joenem olgeta i kam wan. Tedei ol pikinini blong God oli kam wan long Jisas Kraes; Lod i givim ol gudgudfala wei blong mekem yumi kasem ol blesing blong gospel blong Hem we i kambak.

Jisas i talem ol parabol blong bigfala kaekae mo lafet blong mared, blong rere long yumi from kingdom blong heven. Long ol parabol ia, ol ges we oli invaetem oli mekem ol eskius blong no kam long kaekae. Masta i sendem ol wokman blong Hem blong “hareap, [mo] go long ol rod” mo “ol ples olbaot long taon ya” blong “tekem olgeta oli kam” ol puaman, mo ol blaenman, mo ol man we bodi blong olgeta i nogud, mo ol man we leg blong olgeta i nogud. Hemia i wanwan long yumi ia long saed blong spirit.

Ol skripja i talem:

“Wan kaekae blong haos blong Lod” we ”bae evri kantri i kasem invitesen blong kam long hem.”

“Yufala i mas mekem rere rod blong Lod, … se bae kingdom blong hem bae i go evri ples long wol, blong ol man we oli stap laef long hem oli save kasem kingdom ia, mo oli mekem olgeta oli rere from ol dei we oli stap kam.”

Tedei, olgeta we oli invaetem olgeta blong kakae wetem Lod, oli kam long evri ples mo kalja. Ol olfala mo yangfala, ol rij mo pua, ol lokol mo olgeta nara ples. Yumi mekem ol kongregesen i kam ol komuniti blong yumi.

Olsem jif Aposol, Pita i luk heven i open mo i gat wan visen blong wan samting olsem wan bigfala tapolen … we sam man oli stap holem long ol fo kona blong hem, … insaed long hem, i gat ol naranarafala anamol.” Pita i tijim se: “God i stap mekem i semmak nomo long olgeta man. … Sipos wan man i ona long [Lod], mo i mekem ol samting we i stret long fes blong hem, bambae God i glad long hem.”

Long parabol blong gudfala man Samari, Jisas i invaetem yumi blong helhelpem yumi mo kam long Hem long hotel blong Hem—we i Jos blong Hem. Hem i invaetem yumi blong stap olsem ol gud neba. Gudfala man Samaria ia i promes blong kambak mo pem kea blong olgeta we oli stap long hotel blong Hem. Blong stap laef folem gospel blong Jisas Kraes i tekem tu blong stap mekem rum blong evriwan insaed long Jos blong Hem we i kambak.

Blong stap mekem “rum long hotel” i minim tu se i “no gat wan i sidaon hemwan.” Taem yu kam long jos, sapos yu luk wan i stap hemwan, ?plis bae yu save go talem halo mo sidaon wetem hem? Ating bae hemia i no kastom blong yufala. Ating man o woman ia i luk o toktok defren long yu. Mo yes, olsem wan laki biskit i save talem, “Wan wokbaot blong frensip long gospel mo lav, i stat faswan wetem wan halo mo no sidaon yuwan.”

“No gat wan i sidaon hemwan” i minim tu se no gat wan i stap hemwan long saed blong filing mo spirit. Mi bin go wetem wan papa we hat blong hem i brok, blong go visitim boe blong hem. Sam yia bifo, boe ia i bin hapi tumas blong kam wan niu dikon. Long spesel taem ia, famli blong hem i bin pem fas niu sus blong hem.

Be afta ol dikon oli laf long hem long jos. Ol sus blong hem oli niu, be stael blong sus ia i no naes tumas. Yangfala dikon ia i bin sem mo harem nogud mo i talem se bae hem i neva go long jos bakegen. Hat blong mi i brok yet from hem mo famli blong hem.

Long ol rod blong das i go long Jeriko, wanwan long yumi tu oli bin laf long hem, i bin filim sem, mo ating oli bin talem nogud hem o abiusum hem. Mo wanwan long yumi tu, yumi stap mekem ol narawan oli harem nogud long ol defdefren wei. Ating yumi no minim blong mekem, o samtaem yumi no luksave, o samtaem yumi minim blong mekem. Jisas Kraes i karem yumi evriwan i go long hotel blong Hem from risen ia nao. From yumi bin filim harem nogud mo from yumi bin mekem ol narawan oli harem nogud. Yumi helpem yumi mo kam long Jisas Kraes tru long Jos blong Hem, mo long ol odinens mo kavenan blong Hem. Yumi lavem mo oli lavem yumi, yumi givim seves mo oli givim seves long yumi, yumi fogivim mo oli fogivim yumi. Plis tingbaot, “wol i no gat harem nogud we heven i no save hilim”; ol harem nogud blong wol i save kam laet—glad blong Sevya blong yumi i tru.

Long 1 Nifae 19, yumi ridim se: “God blong Isrel, ol man oli purumbut andanit long ol leg blong olgeta; … oli putum hem olsem se hem i no impoten nating. … From samting ia oli wipim hem, mo hem i letem samting ia; mo oli kilim hem, mo hem i letem samting ia. Yes, oli spet long hem, mo hem i letem samting ia.”

Fren blong mi Profesa Terry Warner i talem se fasin ia blong stap jaj, wipim, kilim, mo spet i no hapen nomo long taem we Kraes i laef long wol. Olsem wanem yumi tritim yumi wanwan—speseli olgeta we oli hanggri, tosta, oli filim se oli stap olgetawan—hem i olsem wanem yumi tritim Kraes.

Long Jos blong Hem we i kambak, yumi evri i kam moa gud taem nogat wan i stap sidaon hemwan. Yumi no tekem nomo o letem nomo. Letem yumi welkamem, luksave, givhan long mo lav wetem wan tru hat. Letem evri fren, sista, mo brata i filim se hem i no wan man defren ples, o strenja, be bae hem i filim se hem i pikinini blong haos.

Tedei plante oli filim se oli stap olgetawan. Sosol media mo atifisol intelijens i save mekem yumi wantem tumas blong kam moa kolosap long wan mo filim hem. Yumi wantem blong harem ol voes blong yumi bakegen. Yumi wantem filim se yumi pat mo filim kaen fasin.

I gat plante risen we i mekem yumi filim se yumi no go gud wetem ol narawan long jos—hemia nao wanem i minim blong sidaon yumiwan. Ating bae yumi wari long tiun blong lanwis blong yumi, klos mo situesen blong famli. Ating bae yumi filim se yumi no inaf, yumi smel smok, yumi wantem tumas blong kam klin long tingting, yumi nomo fren wetem wan mo yumi harem nogud mo sem, yumi wari abaot ol polisi blong Jos. Ating yumi singgel, divos o wido. Ol pikinini blong yumi oli mekem tumas noes; yumi nogat pikinini. Yumi no go long wan misin o yumi no finisim misin. Lis ia i gohed.

Mosaea 18:21 i invaetem yumi blong joenem hat blong yumi i kam wan long lav. Mi invaetem yumi blong no wari tumas, no jaj tumas, no askem tumas long ol narawan—mo taem i nidim, yumi no strong tumas long yumiwan. Yumi no krietem Saeon long wan dei nomo. Be evri “halo,” evri gud aksen, i karem Saeon i kam moa kolosap. Letem yumi trastem Lod moa mo jusum wetem glad blong obei evri komanmen blong Hem.

Long doktrin, insaed long haos blong fet mo felosip blong Ol Sent, i no gat wan i sidaon hemwan from kavenan ia blong stap pat blong Jisas Kraes.

Profet Josef Smit i tijim: “yumi nao yumi stap luk, tekpat, mo help blong rolem Lata-dei glori ia i go, ‘long dispensesen blong ol taem … ,’ we Ol Sent blong God bae oli kam wan long evri kantri, famli, mo pipol.”

God “i no mekem eni samting sapos i no blong helpem wol; … blong hem i save pulum evri man [mo woman] i kam long hem. …

“… Hem i askem olgeta evriwan blong kam long hem mo tekem pat blong gud fasin blong hem; … mo evriwan i semmak long God.”

Fasin blong jenisim laef long Jisas Kraes, i nidim yumi blong Blong yumi jenis, yumi nidim blong tekemaot man we i folem fasin blong wol mo kalja blong wol. Olsem we Presiden Dallin H. Oaks i tijim, yumi mas lego eni fasin blong kastom mo kalja we i no folem ol komanmen blong God mo blong kam Ol Lata-dei Sent. Hem i eksplenem se “i gat wan gospel kalja, sam valiu mo bilif mo praktis we evri memba blong Jos Ia blong Jisas Kraes blong Ol Lata-dei Sent, oli save gud long hem.” Gospel kalja ia i tekem tu jastiti, go long jos evri wik, stap longwe long alkohol, tabak, ti, mo kofi. Hem i tekem tu fasin blong stap ones mo stap tru mo strong blong andastanem se yumi stap muv fored mo gro, be i no antap o daon insaed long ol koling blong Jos.

Mi lanem samting aot long ol fetful memba mo fren long evri graon mo kalja. Taem ol man oli stadi long ol skripja long ol defdefren lanwis mo lukluk long saed blong kalja, andastaning blong olgeta long gospel i kam moa bigwan. Ol defren wei blong soem ol fasin olsem blong Kraes, i mekem lav mo andastaning blong mi long Sevya i kam moa strong. Yumi evriwan i kasem blesing taem yumi luksave aedentiti blong yumi olsem we Presiden Russell M. Nelson i bin tijim, olsem wan pikinini blong God, wan pikinini blong kavenan, wan disaepol blong Kraes.

Pis blong Jisas Kraes hem i blong wanwan long yumi. I no longtaem i pas, wan yang man i askem se, “?Elda Gong, mi save go long heven yet?” Hem i askem sapos Papa God i save fogivim hem yet. Mi askem nem blong hem, mi lisingud long hem, mi invaetem hem blong toktok long bisop blong hem, mo mi givim wan bigfala hag long hem. Hem i bin go wetem hop long Jisas Kraes.

Mi bin tokbaot yang man ia long wan nara ples. Afta mi bin kasem wan leta we i nogat nem long hem, mo i go olsem, “Elda Gong, mi mo waef blong i bin resemap naen pikinini … mo go long tu misin.” Be “oltaem mi filim se bae mi no save go long selestial kingdom … !from se ol sin blong mi long yang taem blong mi i nogud tumas!”

Leta ia i gohed blong talem, “Elda Gong, taem yu tokbaot yang man ia we i kasem hop blong kasem fogivnes, mi bin fulap long glad, mo mi stat blong luksave se ating [bae oli save fogivim mi].” Long en, leta ia i se, “!mi iven laekem miwan naoia!”

Kavenan blong stap pat i kam moa bigwan taem helhelpem yumi mo kam long Lod long hotel blong Hem. Lod i blesem yumi evriwan taem i no gat wan i sidaon hemwan. ?Mo huia i save? Ating hem we yumi sidaon narasaed long hem i save kam bes laki biskit fren blong yumi. Letem yumi faenem mo mekem ples blong Hem mo yumi bakegen long kakae blong Smol Sipsip, mi prea wetem tingting i stap daon long tabu nem blong Jisas Kraes, amen.