Ol Sol We Tingting blong Olgeta I Stap Daon, Oli Nildaon long Ol Olta
Taem yumi mekem mo kipim ol kavenan blong yumi, yumi fasem yumi i go long Sevya, mo save kasem moa akses long sore, proteksen, hiling mo spel blong Hem, mo kam tabu tru long Hem.
Tangkyu kwaea, long testemoni blong yufala tru long niu hym ia.
Niu sakramen hym “Bred blong Laef, Wota We I Laef” i fulumap sol blong mi. Wan laen blong hym i talem se, “Naoia mi kam long fored blong olta, mi givim hat blong mi we i brok long Hem.”
Andastaning blong mi long ol toktok ia i kam moa bigwan, taem famli blong mifala i aot long Niuberi Pak, Kalifonia, blong go givim seves long Yuta Ogden Misin long 2015. Mi bin kasem wan invitesen blong go long wan tua long Hil Ea Fos Bes kolosap long Leiton, Yuta. Mi neva go long wan militeri bes bifo, mo mi neva mitim wan militeri pasta o ol man o woman we oli stap wok blong givim sefti mo proteksen blong kantri blong olgeta.
Pasta Harp, semmak olsem taosen blong ol nara volontia mo profesonol pasta blong militeri we oli wok long ol kalabus, hospital, mo bes blong militeri raon long wol, i bin givim insperesen long mi mo leftemap mi. Las stop blong mifala long bes hem i long japel blong olgeta. Mi askem Pasta ia sapos hem i stap mekem seves blong evriwan we oli wantem blong kam tingting hevi, prea mo wosip. Hem i go long fored blong wol blong japel mo hem i pulumaot wan kros biaen long ol keten. Hem i talem se hem i yusum kros blong ol seves blong Protestan mo Katolik. Mi askem se hem i yusum wanem blong ol brata mo sista blong yumi long Jiu, mo hem i go long narasaed blong wol long fored ia mo i pulumaot wan Sta blong Deved.
Afta mi askem, “?Wanem nao yu mekem blong ol seves blong Ol Lata-dei Sent?” Hem i pusumaot ol saen ia mo hem i poenem wan bigfala olta we oli mekem long wud long medel blong japel. Hem i talem se ol memba blong Jos Ia blong Jisas Kraes blong Ol Lata-dei Sent, oli rere long mo blesem bred mo wota long olta. Mi askem sapos oli stap karemaot bigfala olta ia bifo oli mekem ol seves blong ol brata mo sista blong yumi blong Jiu, Muslim, Katolik o Protestan. Hem i talem se olta ia i stap stap nomo, from sam long ol nara fet ia oli yusum olta ia tu long semmak fasin.
Ebraham i bin bildim wan olta, i fasem Aesak, mo i redi blong sakrifaesem wan boe blong hem ia nomo, be oli stopem han blong hem, mo hem i talemaot, olsem we Lod i bin talemaot, “[!Mi hemia]”! ?Hamas taem nao Lod o wan long ol profet blong Hem i volontia mo talem, “[!Mi hemia!]”?
Long taem blong wan prijing blong Hem long Hil, Sevya i invaetem yumi blong stretem yumi wetem ol brata mo sista blong yumi bifo yumi kam long olta. Pol i tijim se yumi “kam tabu” long olta tru long atonmen blong Jisas Kraes.
Profet Lihae i bin “Profet i bin livim haos blong hem … mo ol gudgudfala samting blong hem. … [Afta] hem i bildim wan olta i mekem wan ofring, mo i talem tangkyu long Lod.”
Baebol mo Buk blong Momon i tijim yumi blong wosipim Pikinini blong God long ol olta. ?From wanem?
Fas papa mo mama blong yumi, Adam mo Iv, oli bildim mo wosip long ol olta. Afta we oli sakemaot tufala long Garen blong Iden mo oli bin wosip blong “plante dei,” wan enjel i visitim tufala mo i askem wan kwestin we i stikim tufala mo oli save askem long wanwan long yumi tu se: “?From wanem nao yu yu stap mekem ol sakrifaes i go long Lod?”
Adam i ansa se, “Mi no save.”
Ansa blong enjel long Adam i intresting: “Samting ia i ripresentem sakrifaes blong Wan Stret Pikinini Ia nomo blong Papa. … Taswe, bae yu mekem evri samting we yu stap mekem long nem blong Pikinini, mo bae yu sakem sin mo bae yu prea long God long nem blong Pikinini blong oltaem gogo i no save finis.”
Tebol blong sakramen mo ol olta long tempol, oli ripresentem sakrifaes blong Jisas Kraes mo Atonmen blong hem we i no save finis.
Taem yumi mekem mo kipim ol kavenan blong yumi, stap kasem ol odinens blong sakramen long jos mo endaomen mo siling long tempol, yumi stap fasem yumi i go long Sevya, mo save kasem moa akses long sore, proteksen, hiling mo spel blong Hem, mo kam tabu tru long Hem.
Sore mo Proteksen Tru long Ol Kavenan
Taem mi yangfala mo gat 15 yia, mi bin askem wantaem long papa blong mi, sapos mi save skipim sakramen miting—wan Sandei ia nomo long Jenuware, from mi wantem go long wan futbol gem. Hem i talem se mi bigwan inaf blog mekem desisen ia blong miwan, mo hem i askem mi blong tingting gud long wan kaonsel. Hem i talem, “Sapos yu jusum blong mestem sakramen wan taem, bae hem i moa isi blong yu jusum blong mestem bakegen.”
Sapos Sevya i bigfala man ia we i joenem yumi, nao devel i hem we i seraotem yumi. Hem, Setan i temtem yumi blong seraotem yumi long ol tabu ples blong wosip blong yumi mo long proteksen blong Jisas Kraes. Taem yumi wosipim Sevya, yumi kasem “paoa ia blong go agensem ol nomol taed blong wol ia.” Taem yumi spendem taem blong kam moa kolosap long Hem, yumi kasem promes ia blong “fri aot long Setan.” “Afta, taem yumi stap kipim ol kavenan blong yumi, Hem i kavremap yumi wetem paoa blong Hem we i save … mekem yumi kam strong moa.” O mi laekem tumas fasin ia blong stap toktok mo kam moa kolosap long Sevya tru long ol kavenan we oli mekem long ol tabu olta.
Blong stap bildim wan andastaning abaot Atonmen blong Sevya we i no save finis, tijing folem tijing, rul folem rul, i givim proteksen long yumi agensem ol temtesen blong Setan. Yangfala Elda Jaggi long Meksiko, Sista Jaggi long Beljiom, mo ol nara misinari raon long wol, bae oli save luk moa long ol fren blong olgeta oli kasem blesing blong baptaes mo kasem presen we i Tabu Spirit, sapos ol fren blong olgeta oli kam long sakramen miting long fas wik we ol misinari oli invaetem olgeta.
Wan yang adalt long Tonga o Samoa bae i moa janis blong sil insaed long haos blong Lod sapos oli rere from mo kasem endaomen blong olgeta taem oli jes graduet long skul. Oli invaetem ol memba blong laef folem, obei, mo kipim ol faef loa we i givim paoa mo proteksen long laef blong olgeta, taem oli endao. Taem yumi mekem ol kavenan wetem Lod, yumi mekem wan rilesensip we i wok tu wei. Yumi soem lav blong yumi mo we yumi fetful long Hem. Paoa blong yumi i kam moa bigwan evri taem yumi mekem wan promes mo kipim promes ia.
Stap Tingtingbak mo Kam Tabu
Taem yumi putum tingting i stap daon mo nildaon long ol olta blong Lod, hem i wan janis blong tingtingbak, blong “kontrolem ol hae tingting blong hat blong [yumi], … putum tingting blong [yumi] i stap daon long fored blong God.” Bifo taem mi go aot wetem ol fren blong mi, plante taem bae mama blong mi i talem, “Tingbaot huia yu, mo letem mi save taem yu kasem haos.” Long sam naet, bae mi mestem blong letem hem i save se mi kambak finis from i let tumas. Mi harem nogud blong stap mestem ol impoten storian ia wetem Mama.
Tedei mi lukluk fored long ol impoten taem blong storian wetem Papa long Heven. Long evri dei fasin blong mi blong wosip blong miwan, mi nildaon blong prea narasaed long bed blong mi, o tugeta wetem famli blong mi, mi stap lukluk miwan se mi stap nildaon long ol olta, mo stap tingtingbak long laef blong mi. Mi tingbaot sakramen, we ol bred ia we oli fulwan, bae oli brebrekem blong yumi, mo wanwan i wan saen blong bodi blong Sevya we oli brekem. Hemia i mekem mi tingbaot tijing blong Presiden Dallin H. Oaks we i se “wanwan pis blong bred i defren long narawan, semmak olsem ol wanwan man we oli tekem oli defdefren.” Taem mi nildaon blong prea, mi tingbaot olsem wanem mi save givim tingting blong hat blong mi long God.
Elda Deved A. Bedna i tijim se “odinens blong sakramen i tabu mo i wan invitesen blong sakem sin fulwan we i stap ripit mo yumi riniu wetem spirit. Blong tekem pat long sakramen, insaed mo long hemwan, i no karemaot sin. Be taem yumi rere gud mo tekem pat long tabu odinens ia wetem wan hat we i fulap wetem sore mo wan spirit we i wantem blong sakem sin afta promes ia i we bae oltaem oli gat Spirit blong Lod i stap wetem olgeta. Mo tru long paoa blong Tabu Spirit we i mekem yumi tabu, we i stastap wetem yumi, oltaem bae yumi save holemtaet fasin blong kam klin aot long ol sin blong yumi.”
Taem mi mo Amy i stap luklukbak long ol laef eksperiens blong mitufala, mitufala i selebretem presen blong lav mo sakrifaes blong Jisas Kraes we i stret evriwan. Mitufala i luk tu kros blong Setan i olsem wanem. ?Olsem wanem yumi save winim ol nogud lukluk blong ol man long yumi, ol wari, harem nogud, kansa, sik suga, buli onlaen, fasin blong stilim aedentiti blong wan, ol bebi we oli ded long bel, ded blong wan pikinini, wan brata, o wan papa? From se Jisas i tekem konkon kap ia we i mekem yumi seksek, panis blong kros—i tekemaot long mi, long famli blong mi, !blong yumi evriwan!
Getsemane, i kam long Adam Abram, wetem help blong altusfineart.com © 2025
“Konkon kap” ia we Hem i dring long Garen blong Getsemane mo harem nogud blong Hem i kam “moa strong” long kros long Kalvari, i mekem yumi save putum daon ol hadtaem, ol nogud fasin blong nogat respek, blong kros, mo ol hadtaem we i mekem yumi seksek, long ol olta blong Lod mo oltaem kam “tabu taem we [yumi] kasem Tabu Spirit” oltaem.
Sista Patricia Holland i talem, “Bigfala prea blong mi blong yufala mo miwan tedei, hem blong bae yumi givim yumi fulwan mo silip long olta blong ol promes mo pis blong God, nomata weaples yumi stap long hem, mo nomata wanem yumi bin mekem.”
Wan Ples blong Hiling mo Spel
Taem yumi kam long olta, yumi no stap winim wan riwod; yumi stap lanem abaot Hem we i stap Givim Presen. Taem yumi stap lanem mo fasem yumi wetem kavenan, bae yumi kasem hiling. Nifae i talem, “Hem i fulumap mi wetem lav blong hem, i olsem se i kakae bun mo bodi blong mi.” Sevya blong yumi i invaetem yumi se, “?Bae yufala i no kambak naoia long mi, mo sakem ol sin blong yufala, mo jenisim laef blong yufala blong mekem se mi save mekem yufala i kam oraet?”
Taem tufala bigfala gel blong mitufala Mackenzie mo Emma, oli smosmol, wan long ol fevret stori blong tufala hem i The Chronicles Narnia: The Lion, the Witch and the Wardrobe. Mifala evriwan i laekem tumas laeon ia, Aslan. Wan long ol naet we mifala i no save fogetem taem mifala i stap ridim buk ia, hem i taem laeon ia i givim laef blong hem from Edmund. Mifala i no fogetem from mitufala mo ol gel i krae taem Wij i kilimded laeon ia long Ston Tebol . Mifala i no fogetem from hop i gohed blong stap nomata long nogud taem ia, kasem taem wan naes samting i hapen. Ol smosmol singaot blong glad i kamaot insaed long smol bedrum ia taem mifala i ridim se Aslan i laef bakegen long ded mo talem, “Sapos [Wij i bin save tru mining blong sakrifaes], … bae hem i [save] se [sapos] wan viktim we i no mekem wan rong, i glad blong [ded] long ples blong hem we i mekem rong, bae [Ston] Tebol i brok, mo ded [bae i lus].”
Jisas Kraes i hilim evri soa. Jisas Kraes i mekem i posibol blong laef bakegen long ded.
Long toktok blong hem long Oktoba 2022 jeneral konfrens, Presiden Russell M. Nelson i tokbaot wan grup we oli mekem tua long wan tempol open haos. Wan yang boe i bin stap long taem ia. Presiden Nelson i tijim se:
“Taem we tua grup i go insaed long rum blong endaomen, boe ia i poen i go long olta, long ples we pipol oli nildaon blong mekem kavenan wetem God, mo talem, ‘O, hemia i naes. Ples ia i ples blong pipol i spel long wokbaot blong olgeta long tempol.’
“… Hem i no save abaot stret koneksen ia bitwin mekem kavenan wetem God long tempol mo gudfala promes ia blong Sevya:
“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.
“Putum yok blong mi long solda blong yufala, mo wok wetem mi; … nao bae yufala i faenem pis long laef blong yufala.
“‘Yufala i mas mekem olsem, wok blong hem i isi nomo’ [Matiu 11:28–30; oli ademap long italik].”
“Pikinini* blong Man, [i] no gat ples blong [Hem i] go slip long hem,” be yet, Hem i invaetem ol disaepol blong Hem, yu mo mi, long tebol blong sakramen blong spel wetem Hem long ples ia. Taem “ol sol we tingting blong olgeta i stap daon, oli nildaon long ol olta,” pis i rul. Ol han blong Sevya oli open i stap; Hem i invaetem yu long tebol blong Hem. Kam wosipim Pikinini blong God long ol tabu olta blong Hem. Long nem blong Jisas Kraes, amen.