Olgeta we Oli Man Blong Mekem Pis Oli Save Harem Gud

Tingting wetem mi se yu wan yangfala long Kapaneam, kolosap long Solwota blong Galili, long taem blong ministri blong Jisas Kraes. Toktok i go raon abaot wan rabae—wan tija—we mesej blong Hem i pulum plante man. Ol neba oli plan blong go long wan hil we i lukluk i go daon long solwota blong harem Hem.

Yu joenem ol nara man mo wokbaot long ol rod blong Galili we i fulap long das. Taem yu kasem, bigfala grup i kam tugeta blong harem Jisas ia we i wan sapraes long yu. Sam oli talem kwaet nomo se “Mesaea.”

Yu lisin. Ol toktok blong Hem i tajem hat blong yu. Long longfala rod i gobak hom, yu jusum blong no storian be stap kwaet.

Yu tingting hevi long plante samting—ol samting we i moa bitim loa blong Moses. Hem i tokbaot blong tanem narasaed fes mo blong lavem ol enemi blong yu. Hem i promes se, “Olgeta we oli man blong mekem pis oli save harem gud, from we God bambae i talem se, ‘Yufala i pikinini blong mi.”

Long ril laef blong yu, taem yu filim se ol dei blong yu i hevi wetem hadtaem—no sua mo filim fraet—filim se i no gat pis.

Yu spid; mo taem yu kasem hom, yu sotwin. Famli blong yu i kam tugeta; papa blong yu i askem, “Talem long mifala wanem yu bin harem mo filim.”

Yu serem se Hem i invaetem yu blong letem laet blong yu i saen long fored blong ol pipol ia, blong lukaotem stret mo gud fasin nomata sapos oli mekem nogud long yu. Voes blong yu i seksek taem yu ripitim se, “Olgeta we oli man blong mekem pis oli save harem gud, from we God bambae i talem se, ‘Yufala i pikinini blong mi.”

Yu askem, “?I tru se mi save kam wan man blong mekem pis taem wol i fulap wetem plante noes, taem hat blong mi i fulap wetem fraet, mo taem i no gat pis nating?”

Papa i lukluk kwik mama mo ansarem gud yu, “Yes. Yumi stat fastaem long stamba ples—long ol hat blong yumi. Afta long ol hom mo famli blong yumi. Taem yumi statem olsem, fasin blong mekem pis i save stat blong go olbaot long ol rod mo vilej blong yumi.”

Muv i go long 2,000 yia. No nid blong tingting long hem—hemia i taem blong yumi. Nomata se ol hadtaem we ol yang jeneresen blong tedei oli filim i defren long wan yang man long taem blong Galili—divisen, seperesen blong relijin, fasin blong givimbak, fasin blong kros, ol agens insaed sosol media—tugeta jeneresen ia i fesem ol fasin blong raorao mo fos.

Tangkyu se ol yang man mo woman blong yumi oli gat ol taem semmak olsem taem Jisas i stap tij antap long hil: seminari, ol konfrens blong FSY, mo Kam Folem Mi. Long ples ia oli gohed blong kasem invitesen long Lod: blong letem laet blong olgeta i saen long fored blong ol pipol ia, blong lukaotem stret mo gud fasin nomata sapos oli mekem nogud long olgeta, mo blong lavem ol enemi blong olgeta.

Oli bin kasem ol toktok blong leftemap tingting we i kam long ol profet blong Restoresen we oli stap laef tedei: “I nidim ol man blong mekem pis.” No agri long wan tingting wetem respek. Mekem fasin blong fogiv mo lav i tekem ples blong fasin blong raorao mo hae tingting. Bildim ol brij blong wok tugeta mo andastaning, be i no ol wol blong lukluk nogud wan o seraotem man. Mo semmak promes ia: “Olgeta we oli man blong mekem pis oli save harem gud, from we God bambae i talem se, ‘Yufala i pikinini blong mi.”

Hat blong ol jeneresen we oli stap kam antap tedei i fulap wetem wan testemoni blong Jisas Kraes mo wan hop blong fiuja. Olgeta tu oli askem, “?I tru se mi save kam wan man blong mekem pis taem wol i fulap wetem plante noes, taem hat blong mi i fulap wetem fraet, mo taem i no gat pis nating?”

Ansa ia i kamaot strong bakegen se, yes! Yumi akseptem ol toktok blong Sevya: “Mi mi putum pis blong mi wetem yufala. Mi nomo mi givim pis ya long yufala. … Yufala i no letem tingting blong yufala i trabol, yufala i no fraet.”

Tedei, fasin blong mekem pis i stat fastaem long stamba ples—long ol hat blong yumi. Afta long ol hom mo long ol famli. Taem yumi statem olsem, fasin blong mekem pis i save stat blong go olbaot long ol neba mo ol komuniti.”

Letem yumi lukluk moa long ol tri ples ia we wan Lata-dei Sent blong tedei i stap “mekem pis.”

Faswan hem i insaed long hat blong yumi. Wan samting long ministri blong Kraes i soem hao ol pikinini oli bin kam kolosap long Hem. I givim yumi wan tingting Lukluk long wan hat blong pikinini we i klin gud, i no mekem nogud mo mekem pis, i save stap olsem wan insperesen blong ol hat blong yumi. Hemia hao ol Praemeri pikinini oli ansa “?I olsem wanem blong stap wan we i mekem pis?”

!Mi serem ol ansa blong olgeta we i kamaot stret long hat blong olgeta! Luk i se, “Helpem ol naraman oltaem.” Grace i bin serem hao i impoten blong fogivim wanwan long olgeta, nomata yu filim se i no rong blong yu. Anna i se, “mi bin luk wan we i nogat fren blong pleplei wetem, mekem se mi go pleplei wetem hem.” Lindy i luklukbak se blong stap wan man blong mekem pis, hem i blong helpem ol narafala man. “Afta yu gohed blong pasem i go. Mo bae i gogohed olsem.” Liam i se, “Yu no mas go had wetem ol pipol, iven sapos olgeta oli go had long yu.” London i se, “Sapos wan i jikim yu o go had long yu, yu talem nomo, ‘Plis stop.’” Trevor i tingting mo se, “Sapos i gat wan raon kato nomo i stap mo yufala evriwan i wantem, yu serem.”

Ol ansa blong ol pikinini ia, i pruvum long mi se yumi evriwan i bon wetem tabu filing blong stap kaen mo gat lav mo sore. Gospel blong Jisas Kraes i kea mo joenem ol tabu filing ia wetem fasin ia blong mekem pis long ol hat blong yumi, mo blesem yumi long laef ia mo nekis laef.

Nambatu, i blong bildim fasin blong mekem pis long ol hom blong yumi taem yumi yusum paten blong Lod blong jenisim ol rilesensip wetem wanwan long yumi: fasin blong winim tingting blong man, fasin blong gat longfala tingting, fasin we i kaen mo no stap flas mo fasin blong gat tru lav.

Hemia wan stori wetem insperesen we i soem hao wan famli i mekem pis long wan famli mata, taem oli stap yusum ol prinsipol ia.

Ol pikinini long famli ia oli traehad wetem rilesensip blong olgeta wetem wan adalt we plante taem fasin blong hem i strong, i luklukdaon long man, mo i sot kat. Ol pikinini, oli filim soa mo kros mo stat blong tingting se sapos nomo oli mekem semmak olsem we adalt ia i mekem long olgeta.

Wan naet famli ia i toktok tugeta abaot wanem i stap hapen mo hao i stap spolem olgeta. Afta wan tingting i kam—i no wan ansa nomo, be wan tes.

Blong no givim wan ansa o ansa strong, ol pikinini bae oli mekem wan samting we i defren: bae oli ansa wetem kaen fasin. I no bin hapen gud, be wan open kaen hat wetem ol gudfala toktok mo gud tingting i bin hapen, nomata hao oli tritim nogud olgeta. Evriwan i bin agri blong putum wan taem blong traem hemia, afta bae oli go tugeta blong luklukbak.

Nomata se i gat sam we oli no sua blong fastaem, oli komitim olgeta blong folem plan ia wetem gudfala hat.

Wanem i hapen afta i intresting tumas.

Ol strong fasin ia i stat blong jenis i kam moa kaen. Ol smael i riplesem fasin blong singaot strong. Adalt ia we long wan taem i bin had mo strong, i stat blong jenis. Ol pikinini, wetem paoa we oli gat, oli jusum blong lid wetem lav, mo faenem glad long jenis ia. Jenis ia i bin wan bigwan we i mekem se plan blong luklukbak ia i nomo nidim. Kaen fasin i bin mekem kwaet wok blong hem.

Long taem ia tru rilesen blong frensip i bin stat, mo i leftemap evriwan. Blong stap man blong mekem pis, yumi fogivim ol nara man mo bildimap olgeta be i no blong pulum olgeta i godaon.

Nambatri, fasin blong mekem pis insaed ol komuniti blong yumi. Long wan yia blong trabol long taem blong WWII, Elda John A. Widtsoe i tijim: “Wan wei ia nomo blong bildim wan komuniti we i gat pis, i blong bildimap ol man mo ol woman we oli lavem mo stap mekem pis. Wanwan man mo woman, tru long doktrin ia blong Kraes … i stap holem, long han blong hem, pis ia blong [ful] wol.”

Stori ia i soemaot gud tijing ia.

Sam yia i pas, tu man—wan lida blong Muslim mo wan Kristin pasta blong Naejeria—tufala i bin stanap long saed blong rod folem ol raorao oli gat bitwin ol relijin. Wanwan long olgeta i bin safa bigwan. Be afta, tru long hiling paoa blong fogivnes, tufala i jusum blong wokbaot long wan rod tugeta.

Lida Muhammad Ashafa mo Pasta James Wuye oli bin kam fren, mo i neva hapen olsem be tufala i wok tugeta from pis. Tufala i bin stanemap wan senta we evri relijin i kam tugeta blong mekem pis. Naoia tufala i tijim ol nara man blong riplesem fasin blong no laekem wan wetem hop. Olsem tu taem kandidet we oli bin givim long hem, Nobel Peace Praes, i no longtaem afta tufala i bin kasem fas awod ia long wol blong Commonwealth Pis praes.

Ol enemi blong bifo ia, naoia oli wokbaot saed saed blong bildimbak wanem we i brok, mo stap olsem ol witnes se invitesen blong Sevya blong stap man blong mekem pis i no posibol nomo—be i fulap wetem paoa.

Taem yumi kam blong save glori blong God, afta nao bae yumi “no gat wan tingting blong givim kil long wanwan long yumi, be blong stap long pis.” Insaed long kongregesen mo komuniti blong yumi, bae yumi jusum blong lukluk yumi wanwan olsem ol pikinini blong God.

Blong talem i sot, mi givim wan invitesen. Blong mekem pis, i nidim aksen—i minim wanem ia, long wanwan long yumi, stat tumoro? ?Yu tingting long wan plan blong wan wik, we i gat tri step blong man blong mekem pis?

1. 1. Fasin blong raorao-son we hom i fri: Taem raorao i stat, stop mo stat bakegen wetem ol gud toktok mo aksen.

2. 2. Bildim sosol media brij: Bifo yu mekem wan post, o ansabak, o mekem komen onlaen, askem Hemia bae i bildim wan brij? Sapos no, stop. Yu no sendem. Be, yu serem gud samting. Putum pis blong i riplesem fasin blong no laekem man.

3. 3. Fiksim mo joenem bakegen: Wanwan famli memba i save tingbaot wan we i nogat gud rilesensip wetem blong i save talem sori, givhan, fiksim mo joen tugeta bakegen.

I bin sam manis nao we filing ia i bin kam strong long mi abaot mesej ia: “Olgeta we Oli Man Blong Mekem Pis Oli Save Harem Gud.” Blong endem toktok blong mi, bae mi serem ol filing we i stap long hat blong mi blong sam taem nao.

Fasin blong mekem pis i wan fasin blong Kraes. Samtaem yumi luk ol man blong mekem pis olsem ol man olbaot o oli no strong—long plante wei. Be yet, blong stap wan man blong mekem pis, i no wan we i no strong, be blong i strong long wan wei we wol bae i no andastanem. Fasin blong mekem pis i nidim karej mo save blong stretem samting be i no nidim blong agensem bilif o tingting blong wan. Fasin blong mekem pis, hem i blong lid wetem wan open hat, be i no wetem wan maen we i sat. Hem i blong mekem wanwan i kam tugeta wetem ol han we i open, be i no wetem ol han blong faet. Fasin blong mekem pis i no wan niu samting olsem fresnius we i kamaot long niuspepa. Jisas Kraes Hemwan i bin tijim, tugeta insaed long Baebol mo long Buk blong Momon. Fasin blong mekem pis, ol profet blong yumi tedei oli bin tijim long stat blong Restoresen iven kam kasem tedei.

Yumi finisim ol tabu wok blong yumi olsem ol pikinini blong wan Papa long Heven we i gat lav, taem yumi traem blong kam ol man blong mekem pis. Mi testifae abaot Jisas Kraes, we i Prins blong Pis, Pikinini blong God we i laef, long nem blong Jisas Kraes, amen.