Nem Ia We Bae Oli Singaotem Yu Long Hem

Presiden Russell M. Nelson i bin tijim se sapos Lod i bin stap toktok stret long yumi, fas samting bae Hem i mekemsua se yumi andastanem tru aedentiti blong yumi, se yumi pikinini blong God, yumi ol pikinini blong kavenan, mo ol disaepol blong Jisas Kraes. Eni nara nem o taetol bae i putum yumi daon.

Miwan mi bin lanem hemia taem we bigfala boe blong mi i bin kasem fas mobael fon blong hem. Wetem bigfala glad, hem i stat blong putum ol nem blong famli mo fren blong hem i go insaed long kontak lis blong hem. Wan dei mi luk mama blong hem i ring. Long skrin blong fon ia, yu save luk nem we i kamaot se “Mama.” Hem i bin tingting gud blong mekem joes ia—mo mi mas talem, se i wan saen blong respek blong soem se mama i impoten. I nomol se mi wantem save moa. ?wanem nem nao hem i givim long mi?

Mi go tru long ol kontak blong hem, mo tingting se sapos Wendi i “Mama,” i min se mi mi “Papa.” I nogat. Mi lukaotem long nem ia“Dadi.” Nogat. Naoia mi stat blong wari smol. “?Hem i singaotem mi ‘Corey’?” No. Mi tingting laswan se “Mitufala i plei futbol ia—ating hem i putum nem blong mi ‘Pelé.’” Mi wis olsem. Mekem se mi ringim namba blong hem, mo 2 toktok i kamaot long skrin blong hem “Ino Mama”!

Ol brata mo sista, ?wanem nem nao oli stap singaotem yu long hem?

Jisas i singaotem olgeta we oli folem Hem long plante nem: Disaepol. Ol boe mo ol gel. Ol pikinini blong ol profet. Sipsip. Ol fren. Laet ia blong Wol. Ol sent. Wanwan long ol nem ia i karem wan impoten samting we i no save finis mo i poenemaot wan spesel rilesensip wetem Sevya.

Be long medel blong ol nem ia, wan i kamaot moa bitim ol narawan—mo i nem blong Kraes. Long Buk blong Momon, King Benjamin i tijim:

“Mo i no gat wan narafala nem we i save mekem yufala i fri tru long hem. Fasin blong sevem man i no save kam tru long wan narafala nem; from hemia, mi wantem se yufala i tekem long yufala nem blong Kraes. …

Mo bae i kam blong hapen se eni man we i mekem samting ia, bae i gat wan ples blong hem long raet han blong God, from bae hem i save nem ia we bae oli yusum blong singaotem hem; from bae oli singaotem hem long nem blong Kraes.”

Olgeta we oli tekem long olgeta nem blong Kraes, oli kam ol disaepol mo witnes blong Hem. Long buk blong Ol Wok, yumi ridim se afta we Jisas Kraes i laef bakegen, ol witnes we God i bin jusum olgeta, Hem i komandem olgeta blong prijim mo testifae se olgeta we oli biliv long Jisas, oli baptaes mo kasem Tabu Spirit, bae Hem i tekemaot ol sin blong olgeta. Olgeta we oli kasem ol tabu odinens ia oli kam tugeta wetem Jos, kam ol disaepol, mo oli singaotem olgeta ol Kristin Man. Buk blong Momon i tokbaot tu olgeta ia we oli biliv long Kraes olsem ol Kristin Man mo olgeta we oli kipim ol kavenan “ol pikinini blong Kraes, ol boe mo ol gel blong Hem.”

?I minim wanem blong oli singaotem yu long nem blong Kraes? I minim blong stap mekem mo kipim ol kavenan, oltaem stap tingbaot Hem, stap kipim ol komanmen blong Hem, mo stap “glad … blong stap olsem ol witnes blong God blong ol taem mo long evri samting.” I minim blong stanap wetem ol profet mo ol aposol taem oli stap tekem mesej blong Kraes truaot long wol—wetem doktrin, ol kavenan, mo ol odinens we i go wetem. I minim tu blong stap givim seves long ol narawan, blong karemaot safaring, blong stap wan laet mo givim hop blong Kraes long evriwan. I tru se hemia i wan longfala rod we i tekem ful laef. Profet Josef Smit i bin tijim se “yumi tingting long hemia olsem wan stesen we i nogat man i save kasem kwik.”

From rod ia blong kam wan disaepol i tekem taem mo wok blong bildim, “tijing folem tijing, rul folem rul,” mo i isi blong lus long medel blong ol taetol we wol i givim long yumi. Hemia i soem nomo blong sot taem hamas oli impoten mo bae oli nomo save mekem olgetawan nomo. Fasin blong pemaot man mo ol samting blong taem we i no save finis i kam nomo long, mo, tru long Tabu Mesaea .” From samting ia, blong stap folem kaonsel blong profet se i stret taem mo i waes blong mekem fasin blong stap wan disaepol wan praeoriti, speseli long wan taem we plante voes mo paoa i wantem win. Hemia i stap long hat blong kaonsel blong King Benjamin taem hem i se: “Tingbaot blong holem nem [blong Kraes] mo raetem oltaem long hat blong yufala, blong mekem se oli no faenem yufala long lef han blong God, be blong yufala i harem mo save voes we bae i singaotem yufala, mo tu, nem ia we bae hem i singaotem yufala long hem.”

Mi luk hemia insaed long famli blong miwan. Bigfala apuman blong mi Martin Gassner i jenis fulwan wantaem from wan hambol branj presiden i bin ansarem kol blong Sevya. Long 1909 long Jemani, i no bin isi long taem ia, mo i bin had long saed blong mane. Martin i bin wok olsem wan welda long wan faktri blong mekem ol paep. Hemwan i admitim se eni mane we hem i kasem long taem we oli pem hem, bae hem i spendem kolosap evriwan long drink, smok, mo blong pem drink blong ol fren blong hem long lokol ba. Waef blong hem i wonem hem se sapos hem i no jenis bae hem i ronwe long hem.

Wan dei, wan wok fren blong hem i mitim hem long rod i go long ba wetem wan pepa long han blong hem. Hem i faenem buklet ia mo talem long Martin se hem i filim defren afta we i ridim se Was wissen Sie von den Mormonen?, we oli transletem se ?Wanem nao yu save abaot ol Momon? Mi sua se taetol ia i jenis.

I gat wan adres we oli printim biaen long buklet we i klia inaf blong save wea jos ia i stap long hem. Jos ia i bin stap longwe smol, be wanem we oli bin ridim i tajem olgeta mekem se oli plan blong go long tren long Sandei ia blong faenemaot moa. Taem oli kam, oli faenem se adres ia i no bin jos we oli stap lukaotem, be wan hom blong mekem finerol. Martin i stop smol—from i tru, wan jos long wan fineral haos, i tumas ia nao blong tu samting long wan sem ples.

Be antap long stori haos ia, i gat wan smol grup blong ol Sent. Wan man i invaetem tufala blong atendem wan testemoni miting. Spirit i bin tajem Martin mo wetem ol simpol mo ones testemoni we hem i harem, i mekem hem i serem testemoni blong hem. Mo i bin long taem ia, long ples ia we i nogud tumas, we hem i se hem i bin save finis se hemia i tru.

Afta long miting ia, man ia i bin talemaot se hem i branj presiden mo i askem sapos bae tufala i kambak bakegen. Martin i eksplenem se hem i stap longwe mo no gat inaf mane blong travel i kam evri wik. Afta branj presiden i talem, “Folem mi.”

Oli wokbaot smol i go kolosap long wan faktri we wan fren blong branj presiden i wok long hem. Afta long wan sotfala storian, oli bin givim wok long Martin mo fren blong hem. Afta branj presiden i tekem tufala i go long wan bilding mo arenjem haos blong famli blong tufala.

Evri samting ia i hapen long 2 aoa nomo. Martin mo famli blong hem oli muv i kam long wik afta. Sikis manis afta, oli kasem baptaes. Man ia we long wan taem oli bin luk hem olsem wan drong man i kam blong soem strong fiing long niufala fet ia blong hem, we i mekem se ol pipol blong taon ia oli stat blong singaotem hem “pris” be i no long wan gud wei.

Be abaot branj presiden, mi no save talem nem blong hem—from i bin longtaem, mo nogat man i save tingbaot hem. Be mi singaotem hem wan disaepol, wan ambasada, wan Kristin man, wan gud man Sameria, mo wan fren. Mifala i save filim paoa blong hem yet, 116 yia afta, mo tedei mi stanap from fasin ia blong wan branj presiden blong stap olsem wan disaepol.

I gat wan toktok we i talem se yu save kaontem ol sid we oli stap insaed long wan apol, be yu no save kaontem ol apol we oli kamaot long wan sid.” Sid ia we branj presiden i planem, i givim plante plante frut. Smol we hem i save, se 48 yia afta, sam long ol jeneresen blong Martin famli long tugeta saed blong vel, bae oli sil long Bern Switzerland Tempol.

Ating bae yumi neva harem ol bigfala toktok be yumi luk long ol kwaet, aksen mo wok we i stap hapen long ol laef blong ol nomol pipol we oli traem blong stap olsem Jisas, mo go raon blong stap mekem gud samting. Wanem we branj presiden ia i bin mekem, i no bin wan pat blong jeklis. Hem i laef folem gospel nomo olsem we oli tokbaot long buk blong Alma: “Oli no sendembak olgeta … we oli hanggri, o olgeta we oli tosta, o olgeta we oli sik, … from hemia oli glad blong givim samting long evriwan, ol olfala mo ol yangfala, … ol man mo ol woman.” Mo wan poen we yumi mas luksave, oli no bin sendemaot eniwan “nomata oli no blong jos o oli stap long jos.”

Olgeta we oli tekem nem blong Kraes long olgetawan, oli luksave olsem we Profet Josef Smit i bin tijim se “wan man we i fulap long lav blong God, i no glad nomo blong blesem famli blong hem, be i go raon long ful wol, i wantem tumas blong blesem ful famli blong man.”

Hemia nao olsem wanem Jisas i laef. I tru se Hem i bin mekem plante samting we ol disaepol blong Hem oli no save raetemdaon evri samting. Aposol Jon i rekodem, “Nao i gat plante narafala samting we Jisas i mekem. Mo sapos ol man oli raetemdaon ol samting ya evriwan long ol buk, mi mi ting se bambae i no gat i naf rum long wol ya blong holem ol buk ya.”

Letem yumi traehad blong folem eksampol blong Kraes, blong stap mekem gud mo mekem fasin blong stap wan disaepol wan praeoriti long ful laef, from taem yumi mit wetem ol narawan, bae oli save filim lav blong God mo filim save paoa blong Tabu Spirit. Afta nao yumi save joenem bigfala apu man mo milian long ol nara man mo woman we oli bin talemaot, olsem disaepol Andrew i bin talem,“Ei, mifala i faenem Mesaea finis.”

Long en, wol bae i no talemaot huia yu. Be blong gat fasin blong stap wan disaepol, bae oli luksave tru ol odinens we yumi kasem, ol kavenan we yumi kipim, mo lav we yumi soem long God mo neba taem yumi stap mekem gud samting. Olsem we Presiden Nelson i bin tijim, i tru se yumi ol pikinini blong God, ol pikinini blong kavenan, ol disaepol blong Jisas Kraes.

Mi testifae se Jisas Kraes i stap laef mo Hem i pemaot yumi. Hem nao i talem: “Mi stap singaot yufala long nem blong yufala; yufala i man blong mi.” Long nem blong Jisas Kraes, amen.