Lod I Stap Muvum Hariap Wok blong Hem

Charles Dickens we oli save gud long hem i stat raetem wan buk A Tale of Two Cities wetem tras se “i bin ol bes taem, mo i bin ol taem we i nogud tumas.” Long wan wei, hemia i tru long dei blong yumi.

Yumi stap long wan trabol taem, taem we “ful wol [i] muvmuv olbaot.” Woning blong Presiden Russell M. Nelson se blong stap ol man blong mekem pis olsem ol man blong folem Jisas Kraes, we Elda Gary E. Stevenson i bin tokbaot gud long moning ia. Hemia i wan impoten pat blong developem yuniti, pis, mo hiling blong “ol taem we i nogud tumas.”

Yumi stap laef tu long “ol bes taem,” we hemia nao bae mi tokbaot. Fas toktok blong Lod long saed blong Doktrin mo Ol Kavenan, seksen 1, i talemaot se, ful gospel ia “bae oli talemaot … kasem evri en blong wol.” I tru se Lod i stap muvum hariap wok blong Hem long taem blong yumi. Yumi sud talem bigfala tangkyu from muv ia, we i stap hapen nomata long ol taem ia blong jalenj. Yumi laef long wan dei we ol man blong folem Lod oli gat spesel janis ia blong harem voes blong Hem mo ansa wetem wan hat mo maen we i open. Ol memba blong Jos Ia blong Jisas Kraes blong Ol Lata-dei Sent, we oli komitim olgeta long Sevya mo ol komanmen blong Hem, oli faenem stamba tingting mo moa pis blong olgetawan

Long ol defren taem long histri blong Jos, namba blong olgeta we oli kam insaed long kavenan rod i bin go antap bigwan. Hemia i bin hapen long wan taem bitwin 1837 mo 1850. Sam fas Aposol blong Jos Ia blong Lod we i kambak, oli bin stap mekem misinari wok long Yunaeted Kingdom. Risal blong ol misinari wok ia i mekem taosen man i joenem Jos, mo long 1850, i gat moa memba blong Jos we i laef, long Yunaeted Kingdom bitim long Yunaeted Stet. Long taem ia, Lod i lidim ol Sent ia blong go tugeta long Yuta. Bigfala grup blong pipol i muvaot, sam oli kasem sapot tru lon we Pepetuol Emigret Fand i givim.

Mi laekem tumas wan stori abaot wan bigfala namba blong ol konvet blong Inglan mo Wels long 1852 blong go long Sol Lek Vali. Fas Presidensi i bin mitim grup ia long ples we Brigham Young i luk Sol Lek Vale blong fas taem mo Ban blong miusik blong Kapten Pitt nao i lidim olgeta. Deseret News i tokbaot olgeta olsem “wan kristin ban [we insaed i gat] ol sista mo ol pikinini, oli wokbaot, san i bonem olgeta mo weta i spolem gud olgeta, be oli no harem nogud; hat blong olgeta i laet mo glad, we i soem gud nomo long fes blong olgeta se oli hapi tumas.”

Taem oli “pasem ples we oli bildim tempol long hem, … taosen blong ol man, woman mo ol pikinini, we oli kam olbaot long siti mo kam tugeta blong yunaet long naesfala welkam so ia.” Presiden Brigham Young i toktok long olgeta: “Bae God blong Isrel i blesem yufala. … Mifala i no stop blong prea from yufala; taosen man i bin prea from yufala, dei afta dei, long Hem we i komandem yumi blong karem Isrel i kam tugeta, sevem ol pikinini blong ol man tru long prijing blong gospel, mo rere long olgeta from kaming blong Mesaea.”

Wetem gudfala spirit blong taem ia, letem mi talem gud bakegen long evri niu konvet mo olgeta we oli stap kambak long Jos blong Lod: Mifala i lavem yufala; mifala i nidim yufala; Lod i nidim yufala. Bae mifala i no welkamem yufala wetem wan ban blong maj, be mifala i prea se ol blesing blong heven bae i stap wetem yufala taem yufala i stap traehad blong kam antap long kavenan rod we i lid i go long God Papa mo long Jisas Kraes long selestial kingdom.

I gat klia pruf se fet long Jisas Kraes i stap kam antap bigwan long dei blong yumi. Long Jos Ia blong Jisas Kraes blong Ol Lata-dei Sent, i bin gat wan bigfala namba blong ol konvet mo big namba blong olgeta we oli tekpat. Long 36 manis i pas, kolosap 900,000 konvet oli bin joenem Jos. Ol konvet ia i tekem kolosap 5 pesen blong totol Jos membasip. Mifala i welkamem ol niu memba wetem open han mo bigfala tangkyu from rod we yufala i bin jusum.

Ol 900,000 konvet ia long las 36 manis i bitim totol membasip blong Jos long 110 Aniveseri long 1940, we i jes gat ova 860,000 memba nomo. Hem i yia we mi, Presiden Jeffrey R. Holland, mo Elda Dieter F. Uchtdorf i bin bon long hem.

Ol gudfala niu konvet ia, oli kam long evri pat blong wol. Long fas sikis manis blong yia ia, namba blong ol konvet i bin go antap moa long 20 pesen ova long las yia long Yurop, Afrika, Asia, Pasifik, mo Latin Amerika. Long Not Amerika yumi luk i go antap long 17 pesen. Wok blong Lod i gohed blong muv fored long ol wei we i gat paoa. Ol hae namba ia, i soem klia witnes se gospel i stap tajem ol hat mo stap jenisim ol laef long evri ples.

Long dei blong yumi, ol spesel konvet ia oli nomo kam tugeta long wan ples nomo. From fet mo konsekresen blong ol memba blong Jos, ol risos i stap nomo blong sapotem ol kongregesen—wetem ol bilding blong ol japel mo tempol—truaot long ful wol. Wetem ol prishud ki we yumi nidim mo ol risos we i stap, ol odinens blong sevem man oli stap naoia long plante ples long wol.

Nomata wea ples yumi stap long hem, ol memba tedei oli nidim blong welkamem handred taosen long ol niu memba olsem we yumi bin mekem wetem ol Inglis mo Wells Sent we mi tokbaot long eli histri blong jos. Mi laekem tumas toktok blong Elda Gerrit W. Gong long sesen ia we i tokbaot se i nogat man i sud sidaon hemwan long saed blong spirit o long saed blong tingting.

Tabu wok blong yumi hem i blong akseptem mo welkamem ol niu memba mo olgeta we oli kambak. Olsem we Lod i muvum hariap wok blong Hem, yumi sud lavem, lukaotem gud, mo givim seves long olgeta we oli akseptem gospel blong Hem. Yumi save help blong bildim wan pipol blong Saeon, we yumi gat “wan hat mo wan maen, mo oli bin stap [laef] long stret mo gud fasin.” Blong stap wan wetem Lod, yumi mas stap wan fastaem bifo Lod. Evri memba, nomata wanem deit oli baptaes long hem, oli gat semmak responsabiliti blong welkamem ol narawan.

Kaonsel blong mi i go long ol memba blong Jos i blong putum ol han blong yumi raon long ol spesel pipol ia we oli jusum, we oli bin akseptem gospel blong Jisas Kraes.

Presiden Gordon B. Hinckley i bin tijim yumi se ol niu konvet oli nidim “wan fren, wan responsabiliti, mo blong oli fidim hem wetem gudfala toktok blong God.’ (Moronae 6:4).” Yumi save stap olsem ol fren blong ol niu konvet ia blong mekemsua se oli no ol ges nomo be oli pat. Yumi save helpem olgeta blong andastanem se oli ol disaepol blong Jisas Kraes we oli save givhan long ol narawan mo akseptem ol koling blong save givim seves. Ol konvet we oli yangfala, oli sud tingting blong go long wan fultaem misin. Evriwan i sud traehad blong laef folem wan laef we i olsem hemia blong Kraes.

Plante oli sakrifaes bigwan blong joenem Jos mo oli rili nidim lav mo sapot blong ol dia Sent.

Long yufala we i niu o we yu stap kambak long fet ia, i gat ol jalenj we bae yu fesem. Gat fasin blong save wet longtaem wetem yuwan. Ol misinari oli bin tijim yu ol doktrin we yumi nidim mo eksplenem ol kavenan mo odinens blong kingdom we i stap long skripja mo insaed long Prijim Gospel blong Mi

Blong stap kasem ol odinens mo kavenan mo blong stap laef folem ol komanmen, hem i impoten. Lukluk long ol kavenan i impoten from fasin ia blong kam olsem wan god. Gospel i mekem fasin blong kam olsem wan god i posibol we i nidim blong mekem mo kipim ol tabu kavenan wetem God. Ol kavenan yumi mekem insaed long tempol i no kavremap baptaes, konfemesen, mo taem oli givim Melkesedek Prishud blong ol man. Blong olgeta we oli ded, wanwan long ol odinens blong sevem man, oli mekem nomo long tempol. Folem stret fasin, stap rere long yuwan blong go long tempol, i sud stap olsem fas gol.

Bae samtaem yu filim se yu no gud inaf long wanem we yu save. Save long gospel i wan bigfala blesing we yumi kasem smolsmol folem taem, be i no wan odinens blong sevem man. Gospel i no wan wei blong testem save. Be, olsem Presiden Russell M. Nelson i bin promes se: “Taem yufala i stap stadi long Buk blong Momon wetem prea, evri dei, bambae yufala i save mekem ol moa gud desisen—evri dei.. … Taem yufala i tingting hevi long wanem yufala i stap stadi long hem, bae ol windo blong heven oli open, mo bae yufala i kasem ol ansa long kwestin blong yufala, mo daereksen blong laef blong yufalawan.”

Antap long hemia, long evri yia Jos Kurikulom i jenisim ol Sandei miting lesen we i kavremap OlTesteman, NiuTesteman, Buk blong Momon, mo Doktrin mo Ol Kavenan. Folem taem, bae yu filim se yu gat moa tras taem save blong yu long gospel i gro. Stadi skripja evri taem bae i blesem mo fulumap gud laef blong yu taem i stap jenisim bigwan laef blong yu long gospel blong Jisas Kraes.

Blong stap lanem klin doktrin blong Jisas Kraes, i wan longfala rod blong tekem, tugeta blong andastanem doktrin mo blong laef folem wan laef olsem blong Kraes. Ol impoten kavenan i givim wan fasin blong wok we yumi tokbaot olsem rod blong kavenan. Ol prinsipol ia, Presiden Nelson i bin tijim wetem moa paoa. Evri memba,speseli ol niuwan mo olgeta we oli stap kambak, bae oli kasem blesing tru long stadi mo folem ol mesej blong profet abaot ol kavenan mo rod blong kavenan.

Sapos yu putum wan gol blong stap klin inaf blong kasem wanwan kavenan we i nidim blong kam olsem wan god, bae yu stap long rod we i lidim yu i go long selestial kingdom. Tempol mo ol odinens blong tempol i sud stap olsem fokas blong yumi. Plante long ol kavenan oli stap blong wanwan man. Wan kavenan, mared we i no save finis, i abaot yunaetem ol wok blong yu wetem wan kompanion. Gol blong yumi i blong faenem Kompanion ia we i no save finis.

Be, yu no mas harem nogud sapos mared we i no save finis i no gat long taem ia. Ol profet i bin tijim se i no gat wan blesing we Papa long Heven i holemtaet aot long ol fetful memba we oli kipim ol komanmen. Wan Buk blong Momon profet, King Benjamin, i se: “olgeta we oli obei ol komanmen blong God … Lod i blesem olgeta long evri samting, … mo spos [oli] fetful kasem en … oli save stap wetem God long wan ples blong hapi we i neva gat en.”

Bae yu faenem, sapos yu no save yet, se ol memba oli no stret gud evriwan. Doktrin i talemaot klia se long laef blong yumi long wol ia, bae yumi mekem mistek. Yumi laef long wan wol we i no stret evriwan mo i wik, be i no selestial wol. Laef ia i wan taem blong tes, wetem plante janis blong sakem sin mo pruvum yumiwan.

Yumi evriwan i filim se yumi no inaf taem yumi traehad blong kam olsem Jisas Kraes. Atonmen blong Hem i letem yumi blong sakem sin evri dei taem yumi foldaon. Olsem Nifae, wan nara Buk blong Momon profet i talem: “[Yumi] mas wokbaot fored wetem strong bilif long Kraes wetem wan stret mo klin hop, mo wan lav blong God mo blong evri man. From samting ia, sapos yufala i gohed strong, mo stap kakae gud long toktok blong Kraes, mo stap strong kasem en, luk, olsem ia nao Papa i talem: Bae yufala i kasem laef we i no save finis.”

Taem yumi lukluk long ol jalenj blong yumi tedei, yumi mas tingbaot se Sevya, long taem blong ministri blong Hem long wol ia, Hem tu i laef long wan taem blong wo mo wan trabol taem. Hem i no lukluk long ol jalenj blong politik long taem ia; be long stret mo gud fasin blong ol Sent.

Blong stap folem Sevya mo doktrin wetem tijing blong Hem i neva bin isi long wan wol we oltaem i gat fulap noes. I no bin isi long Sevya long wan wol we i stap go lus long taem blong ministri blong Hem, mo i no isi blong ol lida mo ol memba blong yumi long stat, mo i no isi blong yumi. Laki, se ol profet we oli stap laef, oli givhan long nid blong yumi speseli long dei blong yumi. Presiden Dallin H. Oaks, bae i gohed blong tekem rod ia wetem ful paoa long saed blong spirit.

Mi testifae se doktrin blong Jos blong Jisas Kraes hem i no save finis mo i tru. Mi givim stret mo tru witnes blong mi se Jisas Kraes i laef, mo from Atonmen blong Hem, bae yumi save stap wan wetem Hem. Long tabu nem blong Jisas Kraes, amen.