5 ka Kasulatan sa Daang Tugon nga Labihan ka Mahinungdanon Karon
Mga liboan ka tuig na kini, apan kini nga mga bersikulo dili kinaraan—mahinungdanon lang gihapon kini dili igsapayan sa panahon.
Mga Paghulagway pinaagi ni Melissa Manwill Kashiwagi
Niining nagkabahinbahin nga panahon, tingali ang usa ka butang nga mauyonan natong tanan mao ang, sa makasaysayanon nga mga termino sa kalibotan, ang 3,000 ka tuig taas kaayo nga panahon.
Ug nianang dugay na kaayo nga panahon, ang mga propeta sa Dios nagtudlo og mga kamatuoran nga mahinungdanon gihapon kaayo karon—gani tingali labihan ka mahinungdanon.
Ania ang lima ka kasulatan gikan sa Daang Tugon nga haom nianang bag-o lang nahisgotan. Samtang maghunahuna ka kon unsay nanghitabo sa kalibotan karon—o tingali diha sa kaugalingon nimong eskwelahan o panimalay—tan-awa unsa ang kaalam niini nga mga pulong gikan sa karaang kapanahonan, ang tingali aduna alang sa taga ika-21 ka siglo.
1 “Higugmaon mo ang Ginoo nga imong Dios sa bug-os mong kasingkasing, ug sa bug-os mong kalag, ug sa bug-os mong gahom” (Deuteronomio 6:5).
Mura og pamilyar kini. Mao kini ang unsay giingon ni Jesukristo nga “una ug dakong sugo sa kasugoan” sa balaod (tan-awa sa Mateo 22:37–38). Ug adunay rason nganong mao kini ang una. Ang pagpaningkamot sa paghigugma sa Dios—ug ang paghigugma Kaniya sa imong tanan gayod—magpahimutang sa pundasyon diin ang usa ka kinabuhi nga malipayon ug may katuyoan matukod.
Ang atong Langitnong Amahan nahigugma kanato. Ang paghigugma Kaniya—ug sa Iyang Hinigugma nga Anak, si Jesukristo—magkaanam ka natural ngari kanato, Iyang mga anak, samtang kita makaila Kaniya. Atong mapakita kini nga gugma pinaagi sa pagsunod sa Iyang mga sugo (tan-awa sa Juan 14:15).
2 “Dili ka magdumot sa imong igsoon nga lalake diha sa imong kasingkasing. … Dili ka … magdumot … , kondili hinoon higugmaon mo ang imong isigkatawo ingon sa imong kaugalingon” (Levitico 19:17–18).
Usab—mura og pamilyar kini. Kini nga kasulatan sa Levitico naglangkob sa unsay giingon sa Manluluwas nga mao ang ikaduhang dako nga sugo sa balaod—paghigugma sa atong mga silingan (tan-awa sa Mateo 22:37–39).
Dili lang kay sa unsay atong gibuhat o wala buhata ngadto sa uban ang mahinungdanon—bisan pa man og kana gayod mahinungdanon kaayo. Apan unsay atong gihunahuna ug gibati kanunay nga mahinungdanon sa Ginoo. Ang pagdumot ug ang kayugot kinahanglan nga walay luna sa atong kasingkasing. Malipayon kini nga paagi sa pagpakabuhi, ug magdala kini og mga panalangin ngari kanato ug sa uban.
3 “Pagabuklaron mo ang imong kamot [ngadto] sa imong igsoon, sa nagkinahanglan kanimo, ug sa imong kabus ug nanginahanglan” (Deuteronomio 15:11).
Kini nga sugo ingon og usa ka matang sa sumpay sa “paghigugma sa imong silingan.” Ug usab, mao kini ang usa nga wala gayod mahanaw. Gibalikbalik na kini sa mga propeta sa tanang kapanahonan. Aduna nay managlahing mga programa ug mga pamaagi nga gihatag sa Ginoo sa Iyang katawhan sa tanang kapanahonan alang sa pagtabang sa mga kabos ug nanginahanglan. (Sama pananglit, karon aduna kitay mga halad sa puasa, welfare ug kinaugalingong paningkamot nga mga programa, pagpangalagad, ug uban pang mga tabang.) Apan ang nag-unang mga pagtulun-an kanunay nga parehas ra gihapon: pagtabang sa mga kabos ug nanginahanglan (tan-awa sa Mateo 25:34–40).
4 “Alaot kanila nga nagangalan sa daotan nga maayo, ug sa maayo nga daotan; nga nagabutang sa kangitngit nga ilis sa kahayag, ug sa kahayag nga ilis sa kangitngit; nga nagabutang sa mapait nga ilis sa matam-is, ug sa matam-is nga ilis sa mapait” (Isaias 5:20).
Si Satanas mao ang orihinal nga agalon sa pagbali sa kamatuoran. Kana mao nga, siya maningkamot sa paghimo sa mga butang nga mas maayong paminawon o mahimong ngil-ad kaayo kay sa unsa gayod kini sa tinuod aron mohaom sa iyang mga katuyoan. Ug ang iyang mga katuyoan kanunay nga gitumong sa paghimo sa mga tawo aron dili motuo sa Dios ug sa Iyang plano ug sa pagsupak sa mga sugo sa Dios. Siyempre, kanunay nga adunay mga tawo nga andam mosunod sa plano sa kaaway ug mosulay sa pag-ilis sa maayo nga mahimong daotan ug sa daotan nga mahimong maayo.
Aron malikayan kini nga kalibog, mahugtanon kitang nagkupot sa pulong sa Dios diha sa mga kasulatan ug gikan sa modernong mga propeta ug apostoles, ug naningkamot kita sa pagsunod sa Espiritu.
5 “Ang [Dios] nahamuot sa [kamaluluy-on]. … Siya magabaton pag-usab og kaluoy kanato … isalibay mo ang tanan nilang mga sala ngadto sa kahiladman sa dagat” (Miqueas 7:18–19).
Ang pipila nga nakabasa sa Daang Tugon nag-ingon nga ang Dios ingon og mas bangis ug mas mabalak-on sa hustisya ug kapungot didto. Apan Siya mao gihapon nga Dios nga atong gisimba karon. Siya hingpit nga makiangayon ug manggiluy-on. Mahimuot Siya sa kamanggiluy-on, sa tinuod lang. Gusto siya nga mopasaylo kanato, mao nga gusto Siya nga kita maghinulsol. Wala siya mangita og paagi sa paghimaraot kanato apan sa kanunay nagtanyag og tabang kanato ug modala kanato pauli.
Nagahangop kita sa manggiluy-on nga kinaiyahan sa Dios pinaagi sa paghangop sa paghinulsol isip usa ka makapalipay ug makapalingkawas nga oportunidad. Atong gidawat ang maulaon nga sakripisyo ni Jesukristo ug nagtinguha sa grasya ug kapasayloan nga gihimo Niya nga posible.