Human sa Imong mga Sayop—Bisan niadtong mga Bati

Si Apostol Pedro usa ka makapadani nga tawo sa Bag-ong Tugon. Siya may pagtuo ug kaisog nga molakaw sa tubig padulong ni Jesus, apan sa pipila lamang ka gutlo gitugotan niya ang iyang kahadlok nga mobuntog niya ug misugod sa pagkaunlod, nangayo og tabang sa Ginoo (tan-awa sa Mateo 14:28–31). Samtang wala kita mahibalo sa tanang mga detalye sa kinabuhi ni Pedro, nahibalo kita sa usa ka higayon nga mihilak siya sa hilabihang kaguol.

Mga pipila lamang ka oras sa wala pa giaresto si Jesus, nanagna Siya nga si Pedro molimod Kaniya sa tulo ka higayon sa dili pa motuktogaok ang manok og ikaduha. Si Pedro midumili sa pagtuo sa maong propesiya ug “mipasalig gayod, bisan pag patyon ako uban kanimo, dili ko gayod ikaw ilimod” (Marcos 14:31).

Siyempre, ang propesiya sa Manluluwas natinuod. Tungod sa kakuyaw ug kahadlok nga nagpalibot sa pag-aresto sa Manluluwas, ang kaisog ni Pedro nahanaw. Human milimod og ikaduha nga nakaila siya sa Manluluwas, ug kay gipugos na usab sa ikatulong higayon, si Pedro “misugod sa pagpamalikas ug sa pagpanumpa, nga nag-ingon, wala lagi ako makaila nianang tawhana nga inyong gihisgotan” (Marcos 14:71).

Sa dihang mituktogaok ang manok sa ikaduhang higayon ug si Pedro nakahinumdom sa propesiya sa Manluluwas, “siya … mihilak sa hilabihang kaguol” (Mateo 26:75).

Apan dili kana ang kataposan sa iyang istorya!

Sa tanan nga atong nahibaloan diha sa mga kasulatan, ang kahadlok ni Pedro wala na gayod molabaw pa sa iyang pagpamatuod ni Jesukristo. Maisogon siyang mipamatuod mahitungod sa Manluluwas sa matag higayon, bisan pa sa iyang kaugalingong risgo sa pagbuhat niini. Hinumdomi, si Pedro nagtudlo sa mga tawo nga bag-ohay lamang milansang ni Jesukristo sa krus! Ang kapeligro tinuod.

Sa dihang giayo ni Pedro ang usa ka tawo nga bakol sukad pa sa pagkatawo, nagsugo kaniya nga nag-ingon, “Sa ngalan ni Jesukristo nga Nazaretnon, tindog ug lakaw” (Mga Buhat 3:6), giaresto siya uban ni Juan ug gipangutana kon giunsa niya paghimo niini nga milagro.

Si Pedro maisogon nga mitubag, “Angay gayod nga kamong tanan masayod ug ang tanang katawhan sa Israel nga kining tawhana nga nagtindog dinhi sa inyong atubangan hingpit nga naayo pinaagi sa gahom sa ngalan ni Jesukristo nga Nazaretnon—kadtong inyong gilansang sa krus ug unya gibanhaw sa Dios.

“Kini ang bato nga gisalikway ninyong mga magtutukod og balay nahimo hinuon nga labing mahinungdanong bato. Ang kaluwasan makaplagan lamang diha kaniya kay dinhi sa kalibotan wala nay laing ngalan nga gihatag sa Dios ngadto sa katawhan nga maoy makaluwas kanato” (Mga Buhat 4:10–12).

Pagkamaisogon nga tubag! Ug klaro nga ebidensiya sa iyang mga kombiksiyon.

Ang matag usa kanato makasala niining kinabuhia. Bisan pa sa labing maayong paningkamot, masipyat kita sa atong mga pangadoy ug mga intensiyon sa matag karon ug unya. Sama sa gitudlo ni Presidente Jeffrey R. Holland, Presidente sa Korum sa Napulog Duha ka Apostoles, sa usa ka higayon, “Gawas lang sa Iyang bugtong hingpit nga Anak, ang dili hingpit nga mga tawo mao ang gikatambayayong sa Dios.”

Ang imong espirituwal nga bili dili masukod o malimitahan sa imong mga sayop—bisan niadtong mga dagkong sayop! Tungod kay naghinulsol siya ug si Kristo mipasaylo kaniya, ang paglimod ni Pedro kang Kristo wala makapugong sa iyang pagpamatuod, pagtudlo ug pagkabig gamit ang dakong gahom. Ang mga kasulatan napuno sa mga ehemplo sa ubang mga disipulo nga nakasala, mihinulsol, ug mipadayon inubanan sa pagtuo ni Kristo.

Si Satanas kanunay nga mosulay sa pagdani nimo nga ang imong kasal-anan nagkadaghan na ug dili na ikaw makahimo sa pagbuntog niini. Ayaw paminawa ang iyang mga bakak!

Si Sister Tamara W. Runia, Unang Magtatambag sa Kinatibuk-ang Kapanagulohan sa Young Women, mitudlo: “Kinahanglan nimo kini nga masabtan, mao nga isulti nako og kusog kini nga mga pulong: Dili ikaw ang tingog sa imong ulo o ang mga sayop nga imong nahimo. Tingali kinahanglan nimo nga isulti kana og kusog usab. Ingna si Satanas, ‘Dili karon.’ Papahawaa siya.

“Batia kanang pagbira, ang diosnong kasubo nga mopabalik kanimo ngadto sa imong Manluluwas, ug tan-awa ang Iyang grasya nga mosulod sa imong kinabuhi ug sa mga kinabuhi niadtong imong gimahal. Mosaad ako nga sa higayon nga kita kusganon nga modala og masulub-on nga kasingkasing ngadto Kaniya, anaa dayon Siya.”

Niining kapanahonan sa Pasko sa Pagkabanhaw, samtang ikaw mas hingpit nga mamanlandong sa Pag-ula sa Manluluwas, hinumdomi nga ang abilidad sa paghinulsol ug pagsulay pag-usab maoy usa sa labing dagko nga mga gasa nga imong madawat sukad. Tungod ni Jesukristo, ang imong labing ngil-ad nga mga sayop mapasaylo ug dayon malabay sama sa bug-at nga mga kadena.

“Ang Manluluwas mao ang mahangtoron nga mas hayag kaysa kangitngit sa kaulaw,” mitudlo si Sister Runia.

Tungod ni Jesukristo, ang paglaom kanunay nga masilawon nga modan-ag sa unahan samtang magpadayon ka nga makatutok Kaniya.