Ang Akong Hagit sa Semana Santa

Dihang ang akong titser sa seminary midapit namo sa pagtuon og lima ka ngalan o mga tawag ni Jesukristo atol sa Semana Santa sa miaging tuig, nadasig ko.

Nagpili ko og mga ngalan nga tun-an ug mibasa sa mga kasulatan nga may kalabotan niini. Dayon gipangita nako ang mga ngalan diha sa online aron makakat-on sa makasaysayanon nga konteksto niini.

Usa sa mga ngalan nga akong gitun-an mao ang “Panday,” kay si Jesus tingali nakakat-on niini nga trabaho gikan ni Jose. Nakat-onan nako nga ang mga panday may kalambigitan ngadto sa pagpahiuli ug pag-ayo—sama kon unsaon ni Kristo nga makapahiuli ug makaayo kanato. Kana nga ideya balik-balik nga mabasahan sa ubang mga ngalan.

Pananglitan, samtang akong gipangita ang “Prinsipe sa Kalinaw,” akong nadiskobrehan nga ang Hebreohanon nga pulong sa kalinaw, shalom, nangahulogan nga pagkaayo, panaghiusa, kaayohan, ug pagpahiuli. Gibati nako nga hingpit kining nagpahayag kon sa unsang paagi, nga pinaagi sa Iyang maulaon nga sakripisyo ug sa atong paghinulsol, si Kristo miayo sa atong pagkahimulag gikan sa Langitnong Amahan nga nahitabo tungod sa atong mga sala. Tungod sa mga panghitabo sa Pasko sa Pagkabanhaw, ang atong Prinsipe sa Kalinaw magauban kanato ug moayo kanato.

Niining panahona, nag-atubang ko og mga hagit ug mibati nga wala koy tawo nga kadangpang. Mipalayo ko sa akong relasyon ni Jesukristo kay naghunahuna ko nga kinahanglan nakong tabangan ang akong kaugalingon. Apan kini nga pagtuon nakatabang nako nga makaamgo nga ang akong mga problema dili lamang akong kaugalingon nga palas-anon. Anaa si Kristo aron mopas-an sa palas-anon. Sa dihang ako Siyang gitugotan nga motabang nako, mibati ko og kalinaw. Nahibalo ko nga si Jesukristo makapahiuli sa tanang bahin sa akong kinabuhi kon ako Siyang tugotan.

Samtang mogahin ka og panahon sa pagtuon sa kinabuhi ug sa mga hiyas ni Jesukristo, ikaw makaamgo nga kanunay Siya nga anaa para kanimo. Dihang mipili ko sa paggahin og panahon uban Kaniya ug mas nagtuon og dugang aron mas makaila Kaniya, akong nakita ang akong kaugalingong bili diha sa Iyang mga mata. Akong gibati ang Iyang gugma sa matag ngalan nga akong gitun-an.