Sulod sa Iyang mga Paril

Namahayag ang Ginoo, “Gikulit ko ang imong ngalan diha sa akong mga palad; ang imong mga paril kanunay kong gibantayan” (Isaias 49:16).

Ang hugpong sa pulong nga Gikulit ko ang imong ngalan diha sa akong mga palad kanunay nga naglig-on sa akong pagsalig sa maulaon nga sakripisyo sa Manluluwas. Nagpahinumdom kini kanako sa Iyang labihan kaandam ug tinguha sa pagtabang ug pag-ayo kanako. Ang mga pulong nga ang imong mga paril kanunay kong gibantayan kausa nakapahimo kanako nga mas tutokan ang mga paril nga akong gitukod—pagduhaduha, kahadlok, o sala—nga maoy nagpugong kanako sa hingpit nga pagsinati sa Iyang gugma, kaysa diha sa Manluluwas Mismo, kinsa puno sa gugma.

Dihang ang akong anak nga babaye mipakigbahin sa iyang gugma alang niini nga kasulatan, ang akong panglantaw nausab. Nakakaplag siya og kalinaw, kahupayan, ug kalig-on sa ideya nga si Kristo nagtukod og paril sa kasegurohan alang kanato. Pinaagi sa iyang panabot, mas nasabtan nako ang gahom sa mga pakigsaad. Samtang maghimo kita ug motuman niini, atong gipili ang pagpuyo sulod sa Iyang mga paril sa kasegurohan, kalinaw, ug pagpang-ayo.

Moduol kita sa hingpit ngadto ni Jesukristo ug atong hibaloan hingpit nga kalipay ug seguridad nga makapuyo sulod sa mga paril sa Iyang pakigsaad.