Unsaon Nako Pagkuha og Kusog gikan sa Gugma sa Manluluwas?

Labaw pa sa dili hitupngan nga gasa sa kaluwasan, ang Manluluwas naghatag sa Iyang grasya sa pag-ayo kanato sa mga gutlo sa kasubo, pagsulay, ug kahuyang. Si Kristo nakahibalo gayod sa mga kalisod nga atong nasinati dinhi sa mortalidad. Siya nakasabot sa tanan nga kapait, paghingutas, ug pisikal nga kasakit, ingon man usab sa emosyonal ug espirituwal nga mga hagit nga atong giatubang. Ang Manluluwas kanunay nga andam sa pagtabang kanato diha sa hilom nga mga pakigbisog sa kinabuhi.

Nagtanyag Siya og pahulay alang sa gikapoy nga kasingkasing, kusog alang sa gitental nga kalag, ug kahupayan alang sa nabungkag nga espiritu. Posible kini tungod kay Siya personal nga nakasinati ug giantos Niya ang kasakit sa atong mga kahuyang ug mga kakulangan (tan-awa sa Alma 7:11–12).

Tungod niining tanan nga hinungdan, ang Manluluwas makahatag kanato og kapahulayan gikan sa atong bug-at nga mga palas-anon, moayo sa atong mga samad ug mga kasubo, ug motanyag og kaluwasan ug kahimayaan didto sa Gingharian sa Ginoo.

Laing espesyal nga panalangin nga moabot gikan sa pagsinati sa gugma sa Manluluwas sa atong kinabuhi mao ang pagdugang sa atong paglaom diha Kaniya ug diha sa plano sa katubsanan nga Iyang gitanyag kanato pinaagi sa Iyang mahimayaong sakripisyo sa pag-ula. Ang paglaom nga gitanyag sa Manluluwas mao ang kahayag nga naggiya kanato latas sa kangitngit. Kini ang kasegurohan nga bisan unsa pa ka bug-at o kalisod ang atong panaw, posible gihapon ang kalinaw, pagkaayo, ug pagkaulian.

Pinaagi sa mga kasinatian sa mortalidad, ang Dios nag-umol kanato ngadto sa kinsa Siya nahibalo nga kita mahimo. Ang mga pagsulay makapahimo kanato nga mapainubsanon, makatabang kanato nga motubo sa espirituhanong paagi, ug makapahinumdom kanato nga kinahanglan nato ang tabang sa Ginoo. Ang mga pagsulay makatabang kanato nga makat-on sa pagpasalamat sa mga oras sa kalinaw. Ug labing importante, kini naghatag kanato og mga oportunidad sa pagpakita sa Ginoo ug sa atong kaugalingon nga kita magmatinud-anon.

Siyempre, mas sayon unta ang kinabuhi kon walay mga pagsulay. Apan dili kita makakat-on og daghan o molambo. Kon atong hinumdoman kining balaan nga panglantaw, kita makakaplag og kahupayan ug nabag-o nga pagsalig ug kusog diha sa gugma sa Manluluwas aron atubangon ang kinabuhi ug ang mga hagit niini.

Mosalig kita sa Manluluwas aron matabangan kita nga molambo ug makakaplag og kalinaw sa atong panaw sa tibuok kinabuhi. Diha sa samang espiritu, mosalig kita sa kapasidad sa Manluluwas sa pagdawat kanato ug sa pagdawat sa mga oportunidad alang sa paglambo nga gitanyag sa atong mortal nga panaw.

Nagtuo ko nga usa sa labing tiunay nga paagi aron makakuha og kusog gikan sa gugma sa Manluluwas samtang atong giatubang ang mga komplikasyon sa modernong kalibotan mao ang pagdawat sa Iyang pagdapit sa pagduol Kaniya (tan-awa sa Mateo 11:28–29).

Minahal kong mga higala, ang tinud-anay nga pagduol ngadto ni Jesus ug sa pagdangop Kaniya diha sa matag hunahuna (tan-awa sa Doktrina ug mga Pakigsaad 6:36), kinahanglan kita nga magsugod pinaagi sa pagkat-on og dugang mahitungod sa Iyang kinabuhi ug sa makaayo nga gahom nga Iyang gitanyag.

Kini modala kanato sa pagsentro sa atong mga kinabuhi diha Kaniya. Samtang si Jesukristo mahimong sentro sa atong kinabuhi, unsa ang atong gitinguha ug sa unsang paagi kita nagtinguha niini mausab sa kahangtoran. Kini magdala ug tinuod nga espirituwal nga pagbag-o diha sa atong mga kasingkasing, mag-usab sa atong kinaiya aron dili na kita magtinguha sa pagbuhat og daotan, apan maningkamot sa pagbuhat og maayo sa kanunay (tan-awa ang Mosiah 5:2).

Iyang usabon ang atong paggamit sa atong oras ug mga kapanguhaan, unsa atong gibasa, gitan-aw, gipaminaw, ug gipakigbahin. Usbon pa gani niya ang atong pagtratar sa usag usa ug ang atong pagtubag sa mga inhustisya.

Ang dalan sa pagsabot sa Manluluwas ug sa Iyang gugma indibidwal, nga adunay kaugalingong mga positibo ug negatibo. Apan kini nga panaw sa kataposan modala kanato ngadto sa kaputli, kalinaw, panglantaw, ug katuyoan sa atong kinabuhi.

Dad-on kamo Niya sa paagi nga unsa kamo karon, ug samtang moduol kamo Kaniya ug magkat-on gikan Kaniya, mahimo ninyo kini ug mahimo kamo nga mas mahisama Kaniya. Ayaw kalimti nga kitang tanan natawo nga adunay liso sa pagkabalaan sa atong mga espiritu. Tungod kay kita espirituhanong mga anak sa Dios, kini nga liso sa espirituhanong paagi nagkonektar kanato ngadto sa Dios. Pinaagi niining koneksyon, atong mabati ang gugma nga naggikan sa Dios pinaagi sa Iyang Anak, si Jesukristo, ug sa Iyang maloloy-on nga Pag-ula.

Mopamatuod ko nga si Jesus mao ang Kristo, ang Manluluwas sa kalibotan, ang bantogan nga Mananambal sa atong mga kalag. Nasayod ko nga Siya buhi ug nga ang Iyang gugma walay kataposan ug tinuod. Uban sa Iyang mga bukton nga kanunayng gituy-od, Siya nagtawag sa matag usa kanato, nga nag-ingon, “Duol kanako uban ang mapaubsanong kasingkasing.”

Isip usa nga gitawag nga mahimong Apostol ni Jesukristo dinhi sa yuta, ako nag-ampo nga unta inyong isalikway ang tanan nga makababag kaninyo sa pagbati sa gugma sa atong Langitnong Amahan ug sa Iyang Hinigugmang Anak. Hinaot nga mamaayo kamo pinaagi sa makaayong gahom sa Manluluwas. Nag-ampo ko nga ang inyong pagtuo Kaniya motubo ug nga ang Iyang balaan nga gahom mas makita sa inyong kinabuhi, sa inyong panimalay ug sa inyong kasingkasing. Ayaw kalimti nga ang mahigugmaong mga bukton sa Manluluwas gituy-od nganha kaninyo sa pagsubang sa matag bag-ong adlaw, samtang ang Iyang pagdapit nagpabilin nga sama: “Duol kamo kanako.”