Ang Imong Relasyon ngadto Kanimo
Ang paagi kon giunsa nimo paghunahuna ug pagtratar sa imong kaugalingon tinuod nga mahinungdanon.
Mga paghulagway pinaagi ni Townen Jones
Kon maghunahuna ka mahitungod sa mga relasyon, tingali maghunahuna ka sa imong mga interaksiyon ngadto sa imong mga ginikanan, mga igsoon, mga higala, mga klasmeyt, o sa mga tawo sa simbahan. Apan adunay laing importante nga relasyon nga usahay mataligam-an.
Si Presidente Dieter F. Uchtdorf, kanhi–Ikaduhang Magtatambag sa Unang Kapangulohan, miingon nga kita adunay importante nga mga relasyon “sa atong Dios, sa atong mga pamilya, sa atong isigkatawo, ug sa atong kaugalingon.” Ang paagi kon giunsa nimo paghunahuna—ug pagtratar ang imong kaugalingon—makahimo og dakong kalainan!
Ania ang ubang mga paagi nga imong matukod ug mapalig-on ang imong relasyon ngadto kanimo.
Susiha ang Imong Kaugalingon
Ikonsiderar ang paggahin og gamayng panahon sa paghangyo sa Langitnong Amahan nga tabangan ka aron makita nimo kon unsa gayod ang imong kahimtang karon. Tingali maayo kaayo ang kinabuhi, o tingali makaamgo ka nga ang kinabuhi dili kaayo sama ka maayo kay sa imong ganahan. Ang paggahin og panahon sa pag-eksamin sa imong sosyal nga pagpakig-interaksiyon, pisikal nga kahimtang, espirituwalidad, ug ubang mga bahin sa imong kinabuhi makatabang nimo sa paghibalo sa mga bahin nga gusto nimong usbon o palamboon.
Pagbutang og Maayong mga Utlanan
Sa imong mga relasyon, importante ang pagpahibalo sa uban kon unsa ang mga kinaiya nga imong dawaton—aron makatakda og mga utlanan. Tingali mobati ka og kakiwaw sa permiro, apan ang pagpahibalo sa mga tawo sa mga sumbanan sa Ginoo nga imong gisunod, kon unsay makahimo nimong dili komportable, unsa ang dili nimo mahimo karon, ug kon unsaon ka pagtratar makatabang og dako.
Niining paagiha, nagpakita ka og respeto sa imong kaugalingon ug sa imong kaugalingong kaayohan. Makatabang usab kini kanimo sa pag-atiman sa imong mga panginahanglan ug sa pagpalambo og mas maayo, mas himsog, ug mas balanse nga relasyon ngadto sa uban. Sa samang higayon, ang pagdawat og mga oportunidad nga makatabang nimo sa paglambo ug pagtubo—sama sa paghatag og pakigpulong sa simbahan—makapalig-on nimo ug sa imong pagsalig sa kaugalingon.
Paggahin og Panahon sa mga Butang nga Ganahan Nimo
Dili makiugalingon ang pagseguro nga kanunay ka nga himsog ug maulian sa kadasig taliwala sa tanan nimo nga mga responsibilidad. Ang pagbasa og maayong basahon, pagtan-aw sa imong paborito nga salida, paggahin og panahon sa pagsuroy, o pag-apil sa musika, sayaw, mga sport, o art makahatag nimo og bag-ong kusog aron makaatiman sa mga panginahanglanon sa kinabuhi ingon man bag-ong kusog nga makatabang ug makaserbisyo sa uban.
Pagkonektar ngadto sa Langit
Labing importante sa tanan, makabaton ka og mas maayong relasyon sa imong kaugalingon kon magpalambo ka og tinuod ug malungtarong relasyon ngadto sa imong Langitnong Amahan. Makapaduol ka Kaniya pinaagi sa pag-ampo, pagtuon sa kasulatan, paggahin og panahon sa templo, ug ubang mga paagi. Samtang buhaton ninyo kini, miingon si Presidente Uchtdorf “[makat-onan ninyo] ang pagtan-aw sa inyong kaugalingon sama sa pagtan-aw sa Langitnong Amahan kaninyo—isip Iyang bililhon nga mga anak nga adunay balaang potensyal.”
Ang pagtan-aw sa imong kaugalingon niining paagiha makatabang nimo sa pagtratar sa imong kaugalingon nga adunay mas dakong pailob, kabuotan, pagtahod, ug pagpasaylo. Makakaplag ka og kalig-on sa kahiladman aron mausab, makahimo og mas maayo matag adlaw, ug maningkamot aron makahimo sa tanan nga nahibaloan sa Langitnong Amahan nga imong makab-ot.