Ang Pagpili nga Mokanta

Paghulagway pinaagi ni Katelyn Budge

Kanunay akong malipay nga mosimba, apan dunay usa ka butang nga dili gyod nako ganahan: ang pagkanta og mga himno.

Bisan giunsa ako sa pag-awhag sa akong mga ginikanan, dili lang gyod ko ganahan. Gani gipalista ko nila alang sa choir sa stake conference, nanghinaot nga makatabang kini. Apan wala gihapon ko mokanta—gilihok lang nako ang akong mga ngabil aron mora kog ning-apil.

Dayon miabot ang panahon nga nakausab sa tanan.

Atol sa April 2025 nga kinatibuk-ang komperensiya, si Presidente D. Todd Christofferson mihatag og pakigpulong nga nakatandog kaayo kanako. Miingon siya, “Nagsimba kita pinaagi sa pagkanta sa mga himno (dili lang maminaw apan mokanta sa mga himno).”

Kadto nga mga pulong midulot sa akong kasingkasing. Wala gyod ko maghunahuna sa pagkanta og mga himno isip usa ka buhat sa pagsimba kaniadto. Sa kalit, akong gimahayan katong mga panahon nga akong gipili nga maghilom kay sa pagkanta. Diha dayon mihimo ko og pasalig—dili lang sa pagkanta sukad niadto, apan sa pag-awhag sa uban sa pagkanta usab, pinaagi sa pagpakigbahin sa akong kasinatian.

Ang among bishop kanunay nga nag-awhag kanamong kabatan-onan sa pagtan-aw sa mga pakigpulong sa kinatibuk-ang komperensiya, nag-ingon nga kini makagiya kanamo sa among inadlaw nga kinabuhi. Wala gyod ko sa tinuod makasabot niana hangtod niini nga pakigpulong. Karon akong nakita unsa ka gamhanan ug personal ang mga mensahe.

Kini nga kasinatian nakapalig-on sa akong pagpamatuod. Akong nakat-onan nga bisan og ingon ana kayano ang usa ka butang sama sa pagkanta og usa ka himno kini magdala kanato paduol sa Langitnong Amahan.