Ang Kadaogan sa Atong Manluluwas

Sa akong calling isip Apostol, nakabiyahe ko og labihan kadaghan ug may kahigayonan nga makahimamat og mga bata, kabatan-onan, ug mga hamtong sa tibuok kalibotan. Adunay mga gutlo sa labihang kalipay sa kinabuhi, apan ang usa ka butang nga personal nakong nakita ug gibati sa kahiladman sa akong kasingkasing mao nga agig dugang sa kalipay ug kamaya, ang kinabuhi adunay mga gutlo sa kasakit ug pag-antos.

Akong gibati nga nagkaanam ako kaduol ngadto sa gugma sa Manluluwas ug sa walay kataposang mga panalangin nga gisaad kanato pinaagi sa Iyang Pag-ula. Sa atong mga pagsulay, ang Manluluwas mohupay, o motabang, kanato (tan-awa sa Alma 7:12). Wala Niya kita pugngi sa lisod nga mga kasinatian sa kinabuhi, apan Iya kitang gipanalipdan gikan sa walay kataposang pag-antos ug pagkahilayo gikan sa Langitnong Amahan. Iyang gitugot nga kita, pinaagi sa Iyang dili hitupngan nga pag-antos, adunay posibilidad sa pag-angkon og hingpit nga kamaya ug mahangtoron nga kalipay sa presensiya sa Dios.

Dili ako makahimo, sa bisan unsang mga pulong nga akong nahibaloan, sa paghulagway sa mga pagbati sa akong kasingkasing kon unsa man kaha ang anaa sa kasingkasing sa Manluluwas, hunahuna, lawas, ug kalag sa Iyang sagrado nga mga gutlo sa labihan kalisod nga pag-antos alang sa mga sala ug kasakit sa tanang katawhan.

Nagsugod kini dihang si Jesus miadto “sa usa ka dapit nga ginganlag Getsemani” (Mateo 26:36). Giingnan Niya ang Iyang mga disipulo, ‘Hilabihan ang akong kasubo, nga halos ikamatay ko” (Mateo 26:38). Dayon nag-ampo Siya sa tulo ka higayon sa Iyang Amahan nga isaylo kining kopa gikan Kaniya. Apan miingon Siya, “gani, dili sumala sa akong pagbuot kondili sa imo.” “Matuman ang imong pagbuot” (Mateo 26:39, 42, 44).

Bisan walay sala, giinom ni Jesus ang pait nga kopa. Gipas-an Niya sa Iyang kaugalingon ang atong tanan nga sala ug nag-antos lapas sa atong mortal nga pagsabot aron kon kita moduol ngadto Kaniya ug maghinulsol, ang atong mga sala ug mga palas-anon matangtang gikan kanato (tan-awa sa 2 Mga Taga-Corinto 5:21). Gibuhat Niya ang walay si bisan kinsa nga makahimo aron kita matugotan nga makabalik sa presensiya sa atong Amahan.

Human sa pag-antos didto sa Getsemani, nagpadayon ang Iyang pagsalikwaos—ang pagbudhi nga gihimo sa usa nga Iyang gikauban, ang pagpasipala gikan sa dili makataronganong mga tigmando, ang kahapdos sa labod sa Iyang lawas tungod sa pagbunal, ang koronang mga tunok nga gipataop sa Iyang ulo sa bangis ug walay kaluoyng mga sundalo (tan-awa sa Juan 18:12; Marcos 15:16–20), ug ang bug-at nga krus nga gipas-an diha sa nangapaslot nga unod sa Iyang bukobuko samtang nagpadulong sa Golgota (tan-awa sa Juan 19:16–17).

Didto sa krus, ang labihan nga paghingutas nga gibati didto sa Getsemani gibati na usab. Si Jesukristo, ang Anak sa Dios, nag-inusarang mipas-an sa balaanong sugo sa Iyang Amahan nga itugyan ang Iyang kinabuhi. Ang mga sundalo ug ang mga tigmando dili makakuha niini gikan Kaniya. Agig pagtahod ug pagpaubos, giduko ni Jesus ang Iyang ulo ug miingon, “Natapos na” (Juan 19:30).

Uban sa Iyang natuman nga balaang misyon, Siya karon mao ang una sa tibuok kasaysayan sa tawo nga mobangon gikan sa lubnganan ngadto sa pagka-imortal.

Gibugto ni Jesukristo ang mga kadena ug ang mga gapos sa walay kataposang pagkaulipon sa kamatayon alang sa matag tawo kinsa nabuhi o mabuhi dinhi sa yuta. Iyang gibuntog ang tanan natong lisod buntogon nga kaaway; ang kaaway nga kamatayon hangtod sa hangtod nabuntog.

Si Presidente Russell M. Nelson miingon: “Gidala ni Jesukristo diha sa Iyang Kaugalingon ang inyong mga sala, inyong mga kasakit, inyong mga kaguol, ug inyong mga kahuyang. Dili kinahanglan nga kamo mag-inusara sa pagpas-an niini! Siya mopasaylo kaninyo kon kamo maghinulsol. Siya mopanalangin kaninyo sa unsay inyong gikinahanglan. Siya moayo sa inyong nasamdan nga kalag.”

Isip usa sa naorden nga Iyang mga Apostol, ako nakasinati sa espiritwal ug personal nga mga gutlo nga nagdala ngari kanako og segurado ug piho nga saksi nga Siya buhi. Niining Pasko sa Pagkabanhaw, unta kini nga mga pulong malumo nga magpabilin sa sulod sa atong mga hunahuna ug mga kasingkasing: “Ginoo di ko kalimtan, Nimo gipakamatyan,” samtang mag-ambahan kita sa pagkanta sa, “Siya nabanhaw! Siya nabanhaw! … Nabuntog kamatayon; kay katawhan gawasnon. Kristo ang madaugon.”