Suporta Pinaagi sa Nawala nga mga Oportunidad

Niadtong miaging bulan, napili ko nga moapil sa usa ka exchange program sa Germany sulod sa duha ka semana. Naghinam-hinam ko kaayo sa oportunidad: Giandam nako ang akong mga dokumento ug ang bidyo aron mag-aplay alang sa scholarship, ug gisultihan nako ang akong pamilya bahin sa biyahe. Sa dihang andam na ang tanan, ang program coordinator mipahibalo nga nausab na ang minimum nga edad sa pag-apil, ug wala nako makaadto.

Paglabay sa duha ka semana, ang usa ka oportunidad miabot nga moadto sa Estados Unidos para sa usa ka exchange, apan dako ra kaayo ang gastohon, ug dili namo kini makaya. Paglabay sa usa ka semana, nakahigayon ko sa pag-aplay alang sa laing programa, apan, dili usab namo kini makaya.

Gibati nako nga walay pulos kay wala ko nakaapil sa bisan hain niadto nga mga programa. Matag higayon nga mawad-an kog oportunidad, motungha gihapon ang lain, ug kini nagpuno kanako sa paglaom nga naa pa koy bag-ong higayon. Apan sa kataposan, mawala ra usab kanako ang sunod nga oportunidad.

Niana nga panahon, gibati nako nga dili ako angay niadtong mga oportunidad ug mao kana ang hinungdan nga wala kini molampos.

Kanunay gyod ko gisuportahan sa akong mama sa mga higayon nga ingon ana. Kanunay niya akong gidasig, bisan pa man og naa pod siyay kaugalingong mga kalisdanan. Mapasalamaton kaayo ko sa iyang suporta ug sa kalinaw nga gihatag sa Langitnong Amahan kanako.

Nasayod ko nga buhaton ni Satanas ang tanan aron mapugngan ang atong pag-uswag; gusto niya nga kita mahimong miserable, sama kaniya. Apan kinahanglan kitang magpabilin nga lig-on bisan pa sa mga pagsulay sa atong pagtuo. Kon kita mag-atubang og lisod nga mga sitwasyon, ang Langitnong Amahan ug si Jesukristo kanunay nga anaa.