Unsay Atong Makat-onan gikan sa mga Israelita?

Ang Ginoo mihatag sa mga Israelita og dili kasagaran nga mga instruksiyon alang sa ilang kalan-on sa Kasaulogan sa Pagpalabay: “Inigkaon ninyo niini kinahanglan nga magbakos kamo, magsul-ob sa inyong sandalyas ug magkupot sa inyong sungkod ug dalia ninyo pagkaon” (Exodo 12:11).

Nganong gisugo man sila nga “magdali” og kaon? Hapit na ba sila mobiya sa Ehipto? Wala bay dakong panahon sa pagkaon?

Tingali makahunahuna ka og simbolikanhong mga rason. Nakakita na ka og mga sambingay mahitungod sa “magbakos” sa laing mga dapit sa kasulatan (sama pananglit, tan-awa sa Doktrina ug mga Pakigsaad 27:15–18). Birahon sa mga tawo ang ilang kupo ug ibakos kini sa ilang hawak aron maandam na nga modagan. Ang usa sa mga kahulogan niini mao nga dili gayod ka mahibalo kon kanus-a magkinahanglan ang Ginoo nimo, mao nga angay ka nga mangandam sa tanang panahon.

Pinaagi sa pagsugo sa mga Israelita nga magdali og kaon sa kalan-on alang sa Kasaulogan sa Pagpalabay, tingali ang Ginoo nagpahinumdom nila nga mangandam alang sa Iyang pagluwas. Hinumdomi unsay Iyang isulti sa kadugayan mahitungod sa Ikaduhang Pag-anhi: “Busa pagbantay kamo kay wala kamo masayod kon unsang adlawa moanhi ang inyong Ginoo” (Mateo 24:42). Kinahanglan kitang maandam! Ug sama sa mga Isarelita, makatan-aw kita ngadto sa atong buhing propeta alang sa giya.

Ang mga Israelita nahimong gawasnon! Ang Ginoo miluwas kanila gikan sa mga Ehiptohanon pinaagi sa pagtunga sa Pulang Dagat—usa ka milagro nga dili masaypan.

Agig tubag, ang mga Israelita nagsaulog! Mikanta sila og awit nga nagdayeg ug nagpasalamat sa Ginoo (tan-awa sa Exodo 15:1–19). Si Miriam ug ang ubang mga babaye misayaw ug mipatugtog og mga tamborin (tan-awa sa Exodo 15:20–21).

Adunay mga butang nga gilaoman sa Ginoo nga atong pakitaan og pagtahod ug pagkaseryoso. Adunay mga sitwasyon diin ang katawa ug selebrasyon dili angay. Apan wala kana magpasabot nga ang usa ka disipulo kinahanglan nga seryoso sa tanang panahon! Ang ebanghelyo usa ka “tingog sa kalipay” (Doktrina ug mga Pakigsaad 128:19). Ang mga kasulatan puno sa mga instruksiyon sa pagsadya:

“Kon ikaw malipayon, dayga ang Ginoo pinaagi sa pagkanta, pinaagi sa musika, pinaagi sa pagsayaw, ug pinaagi sa pag-ampo sa pagdayeg ug pagpasalamat” (Doktrina ug mga Pakigsaad 136:28).

Managkalipay kamo [sa Ginoo], Oh kamong mga matarong: Kay sa mga matul-id matahom ang pagdayeg” (Mga Salmo 33:1).

“Paglipay ug pagmaya, kamong mga matarong: ug singgit sa kalipay, kamong tanan nga nagtuman sa iyang sugo” (Mga Salmo 32:11).

Pagsaulog nga gawasnon sa mga milagro nga gihimo sa Dios sa imong kinabuhi!

Dihang miadto si Moises sa bungtod aron makigsulti sa Ginoo, nawala siya og 40 ka adlaw (tan-awa sa Exodo 24:18). Ang mga Israelita, kinsa nakakita sa kahibulongan nga mga milagro apan naglambo pa sa ilang pagtuo, nahadlok nga dili na mobalik si Moises. Mirebelde sila batok sa Dios ug mihangyo kang Aaron nga buhatan sila og bulawan nga nating baka aron makasimba sila niini imbes sa Ginoo (tan-awa sa Exodo 32).

Sa laing mga pagkasulti, sa dihang miabot ang kalisdanan, nalisang sila, mibiya sa Dios, ug mibalik ngadto sa ilang makasasala nga mga paagi.

Kitang tanan adunay mga higayon sa mga pagduda. Usahay tingali dili kaayo klaro unsa ang gusto sa Ginoo nga atong buhaton. Usahay mag-ampo kita aron makadawat og mga tubag apan mawad-an og pasensiya kon dili kini moabot dayon.

Busa, unsa man ang atong buhaton? Padayon natong huptan ang atong pagtuo. Mogunit kita og maayo sa unsay ato nang nahibaloan samtang maghulat nga makakat-on pa og dugang.

Tingali dili ka matintal sa paghimo og dios-dios nga simbahon kon mawad-an ka og kadasig. Apan kana diayng tintasyon sa pagbuhat og mga butang nga magdala og diha-diha nga katagbawan imbes nga malungtaron nga kalipay?

Ayaw pagkahulog niana nga laang! Paabota ang Ginoo kutob sa mahimo. Pilia nga mosalig Kaniya. Siya kanunay nga motuman sa Iyang mga saad.