Gikan sa Pag-inusara ngadto sa Pagbarog nga Magkauban
Nakat-onan ni Tyler nga, bisan og nag-atubang og kalisdanan ug pagpanghukom, atong mapasanag ang atong kahayag ug mapakita ang sama kang Kristo nga gugma ngadto sa uban.
Mga litrato pinaagi ni Leslie Nilsson
Si Tyler ug ang iyang mga higala gikan sa ubang mga tinuohan nakakita og managsama nga interes samtang nagtinabangay sila sa pagsunod ni Jesukristo.
Unsaon nimo sa pagpakighigala ngadto sa mga estranghero kinsa duna nay daang mga ideya mahitungod kanimo ug sa imong mga gituohan? Ilabi na kon ang pipila niadto nga mga ideya dili maoy labing maayo o gani tinuod? Si Tyler, edad 16, nangutana sa iyang kaugalingon sa susamang mga pangutana.
Human namalhin gikan sa Utah, USA— usa ka dapit nga mas daghan ang populasyon nga mga miyembro sa Ang Simbahan ni Jesukristo sa mga Santos sa Ulahing mga Adlaw—didto sa Oklahoma, USA, namatikdan niya nga ang pagpakighigala niadtong nagtan-aw kaniya nga lahi gikan kanila magkinahanglan pa gayod og taas nga panahon ug paningkamot.
Pagka-buotan
“Ang mga tawo sa sinugdanan dili kaayo maayo,” pasabot ni Tyler. “Maayo sila kon mag-atubang ko, apan inigtalikod nila nga wala na ako hisgotan ko nila. ‘Ang bag-o nga batang babaye usa ka Mormon, ug dili siya moinom og kape,’ o ‘Buotan kaayo siya; morag pakaaron-ingnon ra na.’”
Niadtong unang mga adlaw, ang tanan nga nahibaloang buhaton ni Tyler mao ang padayon nga pagbinuotan ug padayong magsunod sa iyang mga gituohan. Sa hinahinay, dihang ang uban nakaila na niya, niana nagsugod ang pagkahimo sa tanang kalainan.
“Nakahimamat ko og maayong mga higala sa team sa volleyball, nga nakatabang nako nga makahigala sa tibuok ting-init. Dihang nakahigala na ko og daghan ug nakapakita sa mga tawo kon si kinsa ko, ang mga tawo nagsugod sa pagsalig kanako. Ang mga tawo nagsugod sa pagkaila kanako ug nga ako tinuod nga buotan.”
Pagpangita og Komon nga Giuyonan
Samtang ang mga tawo nagkaanam og kaila kon si kinsa gayod siya, nagsugod sila sa pagpangutana og sinserong mga pangutana mahitungod sa iyang mga gituohan.
“Duna koy taas nga oras sa klase diin ang tanan nangutana kanako mahitungod sa akong mga gituohan,” miingon si Tyler. “Nakuryoso lamang sila tungod kay nagtuo sila nga ang atong mga gituohan lahi kaayo,”
Apan wala itugot ni Tyler nga ang maong mga butang makapasuko niya. “Gitubag lang nako sila sa matinuoron nga paagi. Abi ninyo—gitubag nako sila sa labing maayo nakong mahimo.”
Ang pipila sa iyang pagpakigsulti naingon og sama niini:
“Dili ka Kristiyano.”
“Dili, Kristiyano ako. Mituo ko ni Jesukristo.”
“Ah, duna moy lahi nga basahon. Unsa kana nga basahon? Mahitungod sa unsa man kana?”
“Lain kini nga testamento ni Jesukristo, dihang Siya miadto sa mga taga-Amerika.”
“Ha? Si Kristo miadto sa mga taga-Amerika?”
“Oo!”
“Ah, mobasa ba ka og Biblia? Seguradong wala ka magbasa sa Biblia.”
“Mobasa ko! King James nga Bersiyon ang akong gibasa.”
“O, mao ba? Ako sab!”
Tungod kay kadaghanan sa bag-o niyang mga higala ug mga klasmeyt mga Kristiyano usab, nakita ni Tyler nga sila dunay komon nga gituohan ug gisugdan niya kini diha. “Ang labing komon nga butang mao nga tanan kita mituo ni Jesukristo. Tanan kita naningkamot nga mahisama kang Kristo ug mahimo nga Iyang mga disipulo,” miingon siya.
Dili lamang nga si Tyler ug ang iyang mga higala nagkauyon sa ilang gituohan sa Manluluwas, apan nagtinabangay sila aron mahimong nga labing maayo nga ilang mahimo sa ilang kaugalingon. “Tanan kami naningkamot nga mahimong mas maayong mga tawo, nga mao ra gyod ang pagkahimong Kristohanon. Nagtinabangay kami sa usag-usa.” Ang bag-o niyang mga higala karon gani molaban na ni Tyler ug mihangop sa iyang relihiyosong mga kalainan! Mao usab ang iyang gihimo ngadto kanila.
Si Tyler (sa tunga) nakakat-on nga ang iyang mga higala gikan sa ubang mga tinuohan ganahan usab nga mopakigbahin sa kahayag ni Kristo.
Pagtinabangay sa Usag-usa nga Molambo
Sa unsang paagi si Tyler ug ang iyang mga higala nagtinabangay sa ilang managlahi nga relihiyosong mga gituohan? Pinaagi sa paghimog maayong mga butang, sama sa gihimo sa Manluluwas (tan-awa sa Mga Buhat 10:38).
“Usa ka higayon nagsulat kami og daghang mugbo nga mga sulat nga dunay mga bersikulo sa Biblia ug gipamutang kini sa mga sakyanan sa mga tawo. Gisulatan namo og ‘si Jesus nahigugma kanimo’ ug mga sulat nga ingon niana. Naningkamot kami nga mahimong buotan ug motabang sa mga tawo nga anaa sa kalisod.”
“Naningkamot ako nga mahimong maayo tungod kay ingon niana si Kristo: maayo nga tawo. Ang akong mga higala naningkamot usab nga mahimong mas maayo nga tawo.”
Nasayod si Tyler nga tungod kay miyembro siya sa Ang Simbahan ni Jesukristo sa mga Santos sa Ulahing mga Adlaw, nasayod siya nga dali ra siyang mamatikdan kay siya lahi. Nasayod usab siya kon unsay pagbati nga maguol ug talikdan.
“Naningkamot lang ko nga mahimong ako. Pahiyoman nako ang tanan, ug buotan ko ngadto sa tanan. Bisan sa mga tawo nga lahi kaayo kanako sa eskwelahan—ila akong higala. Maglakaw ko sa biranda, ug kon makita nako sila, timbayaon nako sila ug mangutana kon kumusta ang ilang adlaw. Ang yanong mga lihok sa kabuotan ug serbisyo ngadto sa ubang tawo maoy akong paagi sa pagpangulo pinaagi sa ehemplo,” miingon siya.
“Tanan kita naningkamot nga mahimong mas maayong mga tawo, nga mao ra gyod ang pagkahimong Kristohanon,” miingon si Tyler.
Pagpasanag sa Iyang Kahayag
Gipuy-an ni Tyler ang iyang pagpamatuod pinaagi sa paghimo niining kabahin sa iyang inadlaw nga mga kalihokan ug mga pakig-uban sa mga tawo. “Nasayod ko nga gihigugma ako ni Kristo sa personal gayod. Nakita nako Siya sa akong matag adlaw nga pagpakabuhi. Kon mosulti ang mga tawo og mga pagdayeg kanako o mosulti og nindot, nasayod ko nga Siya kadto ang nagsulti kanako sa butang nga akong gikinahanglan nianang adlawa.”
“Nasayod ko nga ang Langitnong Amahan nakadungog sa tanan nakong pag-ampo, ug nga Siya nakahibalo sa akong mga hunahuna ug mga intensiyon. Kon maningkamot ako nga mahisama Kaniya, maghimo kini kanako nga mas maayo nga tawo.
“Ug nganong di man ta magmahimong usa ka mas maayo nga tawo?”