Imong Musika, Imong Manluluwas, ug Iyang Sakripisyo
Ang Pasko sa Pagkabanhaw dili kaayo sama ka daghan og musika sa Pasko, apan aniay pipila ka hunahuna kon unsaon nimo pagpalambo ang imong pagsaulog gamit ang musika.
Sa Huwebes sa gabii, dihang gamay na lang ang oras nga nahabilin sa dili pa siya itugyan ngadto sa mga awtoridad aron kasohan ug ilansang sa krus, si Jesukristo adunay daghang importante nga mga buluhaton. Iyang gipahigayon ang panihapon sa Pagpalabay ug gitudlo ang ordinansa sa sakramento (tan-awa sa Mateo 26:26–28; Lucas 22:19–20). Gihatagan Niya ang Iyang mga disipulo og importante nga mga pagtulun-an. Gihugasan Niya ang ilang mga tiil. Nag-ampo Siya alang kanila. (Tan-awa sa Juan 13–17.)
Apan dihay kataposang butang nga Iyang gihimo ngadto sa Iyang mga disipulo nianang gabhiona sa wala pa moadto sa Tanaman sa Getsemani—usa ka butang nga usahay atong makalimtan.
Mikanta Siya og himno (tan-awa sa Mateo 26:30; Marcos 14:26).
Wala kita mahibalo kon unsa gayod ang gikanta ni Jesus ug sa Iyang mga disipulo, apan naandan na sa mga Judeo ang pagsugod ug pagtapos sa Pagpalabay pinaagi sa pagkanta sa mga himno sa pagdayeg, ilabi na sa Hallel, pipila ka mga salmo nga kantahon sa ingon niana nga mga okasyon (tan-awa sa Mga Salmo 113–118). Kadto nga mga himno (o mga susama niana) tingali adunay espesyal nga kahulogan alang Kaniya niadtong panahona. Sama pananglit, dapit sa kataposan sa Hallel anaa kini nga mga pulong:
“Ang Ginoo maoy naghatag kanakog gahom ug kalig-on; Siya ang akong manluluwas. …
“Ang bato nga gisalikway sa mga magtutukod kay walay hinungdan, nahimo hinuon nga labing importanteng bato. …
“Ang Ginoo mao ang Dios ug maayo siya kanato. Pagdala kamog mga sanga sa kahoy ug sugdi ninyo ang kasaulogan; pagmartsa kamo libot sa halaran. …
“Pasalamati ang Ginoo kay maayo siya ug walay paglubad ang iyang gugma” (Mga Salmo 118:14, 22, 27, 29).
Human sa pagpanganta (kon unsa man gani kadtong gikanta), miadto si Jesus sa tanaman. Maingon ta nga ang musika kabahin sa Iyang kinabuhi ug nga kini adunay talagsaong kahulogan alang Kaniya.
Sa unsang paagi ang musika kabahin sa imong kinabuhi? Unsay kahulogan niini sa imong kinabuhi? Ug unsaon nimo nga mapalambo ang imong paggamit sa musika samtang magsaulog kita sa Pag-ula ug Pagkabanhaw sa Manluluwas?
Musika ug Ikaw
Ang mga tawo kasagaran mosulti nga ang musika makapatandog nila—nga kini makahatag nila og talagsaong pagbati. Tingali nakasinati usab ikaw niini. Pananglitan, nakasulay ka ba nga nangita og usa ka kanta nga gilaoman nimo nga tingali makapausab sa imong buot? O usa ka kanta nga mas makapanindot sa imong maayong buot?
Tingali aduna kay paborito nga musika. Gani, ang imong mga paborito mahimong mausab usahay, depende sa unsay imong interes nianang panahona. Unsay imong ganahan mahitungod sa imong paborito nga musika? Tingali may kalabotan kini kon unsa kaanindot ang tono niini para nimo ug ingon man unsa ang imong mabati ug mahunahunaan kon maminaw ka niini.
Busa, hunahunaa kon unsa ang mapabati ug mapahunahuna nimo sa imong paborito nga musika. Dayon hunahunaa kon unsay mahitabo kon makugihon kang mangita sa labing maayo nga musika sa higayon nga gusto kang mobati og kalipay, kalinaw, gugma, ug paglaom.
Musika ug Pasko sa Pagkabanhaw
Busa, unsa diay ang kalabotan niini ngadto sa Pasko sa Pagkabanhaw? Buyno, aniay tulo ka ideya a paggamit sa musika nga makapalambo sa imong selebrasyon sa maulaon nga sakripisyo ug Pagkabanhaw ni Jesukristo.
1. Mangita og mga Himno sa Sakramento
Si Presidente D. Todd Christofferson, Ikaduhang Magtatambag sa Unang Kapangulohan, miingon nga “kita nagsaulog … sa Pagkabanhaw ni [Jesukristo] atol sa Pasko sa Pagkabanhaw apan sa matag semana usab samtang kita moambit sa mga simbolo sa sakramento sa Iyang Pag-ula.” Nag-ingon usab siya nga ang atong pagsimba naglakip sa “pagkanta sa mga himno (dili lang maminaw apan mokanta sa mga himno).”
Sa usa ka paagi, ang mga himno sa sakramento nga atong kantahon matag semana mao ang mga himno sa Pasko sa Pagkabanhaw. Sa kasagaran ang tono niini may balaanong pagtahod. Kini makatabang kanato sa paghinumdom sa Manluluwas ug sa Iyang sakripisyo ug sa pagbati sa Iyang gugma.
Sa duol-duol na ang Pasko sa Pagkabanhaw, tingali gusto nimong pangitaon ang ubang mga himno sa sakramento. Mahimo nimong basahon ang mga pulong o kantahon ang mga kanta diha sa imong hunahuna. Mahimo nimong kantahon og kusog kon gusto nimo. Mahimo nimong pangitaon ang mga rekording niini diha sa Librarya sa Ebanghelyo.
Kini nga mga himno makatabang nimo nga mobati sa pagkabalaan, pagdayeg, ug pasalamat nga angay natong batonan atol sa Pasko sa Pagkabanhaw.
2. Mokanta og mga Himno sa Pasko sa Pagkabanhaw
Dayon adunay dili kaayo mingaw ug mas makahuloganon nga bahin sa Pasko sa Pagkabanhaw.
Adunay labing minos duha ka masadyaon og tuno nga mga himno mahitungod sa Pasko sa Pagkabanhaw nga imong makanta og kusog ug sa masadyaong paagi sa pagdayeg sa Dios. Sama pananglit, ang inyong mga panagtigom sa sakramento sa duol-duol na ang Pasko sa Pagkabanhaw lagmit maglakip sa “Siya Nabanhaw!” (Mga Himno, nu. 118) o “Kristo Nabanhaw Karon” (Mga Himno, nu. 119).
3. I-adjust ang Imong Pagpaminaw og Musika sa Wala pa ang Pasko sa Pagkabanhaw
Ang Pasko sa Pagkabanhaw dili kaayo sama ka daghan og musika sa Pasko, apan makagamit gihapon ka og musika aron mausab ang pagbati sa imong kapanahonan sa Pasko sa Pagkabanhaw.
Mahimo kang magdugang og mas daghang nakasentro ni Kristo nga musika ngadto sa imong matag adlaw nga pagpaminaw. Ang Simbahan aduna niining musika diha sa Librarya sa Ebanghelyo o sa lainlaing mga serbisyo sa pagsibya pinaagi sa internet—sa mga himno ug ubang matang sa musika. May daghan usab nga maanindot nga nakasentro ni Kristo nga mga piyesa diha klasikal nga tradisyon sa musika gikan sa daghang siglo nga nangagi. Daghang mga tigsulat og musika ang nagsulat og makadasig nga musika mahitungod sa Manluluwas—Bach, Handel, Rimsky-Korsakov, Mahler, ug daghan pa. Pangitaa kini. Sulayi kini. Basin makadasig kini kanimo.
Musika ug ang Manluluwas
Kay nahibalo nga ang Manluluwas mikanta og himno sa wala pa miadto sa Tanaman sa Getsimane, ug kay nahibalo sa unsang paagi ang musika makatandog nimo, tingali naghunahuna ka kon unsa ang Iyang gibati samtang nagkanta Siya. Hinuon, usa ka butang ang segurado: Kon mokanta ka o maminaw og musika mahitungod sa Manluluwas ug sa Iyang maulaong sakripisyo ug Pagkabanhaw, makabati ka og lawom nga kalipay, gugma, kalinaw, ug pasalamat.