Usa sa usa ka Milyon

Paghulagway pinaagi ni Katelyn Budge

Usa ako sa usa ka milyon—ang akong dayagnos sa Cleidocranial dysplasia nagklaro niana.

Ang cleiodocranial dysplasia nag-apekto sa paglambo sa bukog ug sa mga ngipon. Niagi na ko og lima ka pagpaopera: tulo alang sa abnormal nga kurbada sa akong bukog sa bukobuko ug duha alang sa pagtarong sa problema sa akong bat-ang nga anaa na sukad sa akong pagkahimugso.

Wala ko kasabot nganong gitugot sa Langitnong Amahan nga ako magsagubang og labihan nga kasakit ug moadto kanunay sa kwarto nga operahanan. Sa kataposan nga pag-opera kanako, 23 ka adlaw ko sa ospital, ug ang kasakit hilabihan. Bisan sa mga pagtambal, dili nako ikapahulay ang akong lawas. Nag-ampo ko sa Langitnong Amahan sa pagtabang kanako.

Nakadawat ko og impresyon gikan sa Espiritu Santo nga ang akong kasakit usa ka gamay kaayong pahinumdom sa unsay giantos ni Jesukristo alang kanako. Ang paghunahuna mahitungod sa gugma ni Jesukristo mipuno ngari kanako og kalig-on diin ako wala magtuo nga aduna ako.

Nasayod ko nga bisan og ang mga butang mura og lisod, uban sa gamay nga pagtuo ug lig-on nga pagpamatuod, makaangkon kita og kalinaw ug kalig-on samtang naningkamot kita sa pagkab-ot sa mga tumong nga anaa kanato. Gihigugma ako sa Dios, si Jesukristo mitugyan sa Iyang kinabuhi alang kanako, ug mitugot Siya nga kita mas molig-on human sa matag sakit kaayo nga kasinatian.