Unsay kahulogan sa “ayaw kamo kaibog”?

Ang pagpangibog “mao ang pagkasina sa usa ka tawo o ang pagbaton og sobra nga tinguha sa usa ka butang.” Ang kataposan sa Napulo ka Sugo mao ang sugo sa dili pagpangibog sa bisan unsang butang nga gipanag-iya sa laing tawo (tan-awa sa Exodo 20:17).

Ang Ginoo naghatag na og sugo nga dili mangawat (tan-awa sa Exodo 20:15)—buot ipasabot, dili mokuha sa bisan unsang butang nga gipanag-iya sa laing tawo. Apan pinaagi sa ikanapulo nga sugo, ang Ginoo nagpahibalo usab kanato nga Siya “motan-aw sa kasingkasing” (1 Samuel 16:7) ug dili lamang sa atong gipakitang mga buhat.

Ang atong mga tinguha mahinungdanon kay ang “mga tinguha ang momando sa atong mga prayoridad, ang mga prayoridad mohulma sa atong mga pagpili, ug ang mga pagpili motino sa atong mga binuhatan.” Tungod niini, ang atong mga tinguha makatabang usab sa paghulma sa atong kalipay. Ug ang Ginoo gusto nga kita magmalipayon. Kana ang usa ka rason nga Iya kitang gisugo nga dili mangibog.

“Ang pagpangibog … makadaot sa kalag. Mopuno kini sa atong mga hunahuna ug mohimo kanato nga kanunay nga dili malipayon ug dili makontento. Kasagaran kini nga modala nato ngadto sa ubang mga sala ug ngadto sa pagpangutang.”