Fakaʻilekitulōnika Pē: Haʻu, ʻo Muimui ʻIate Au
ʻI he Taimi ʻOku Ngali Faingataʻa Ange Ai Hoʻo Moʻuí ʻi Hono Fakahoko ʻa e Meʻa ʻOku Totonú
Ko ha lēsoni ʻeni meia Siosefa ʻi he Fuakava Motuʻá fekauʻaki mo e founga ke hokohoko atu ai hono fai ʻo e meʻa ʻoku totonú neongo kapau ʻoku hangē ʻokú ne fakaholomui koé.
Naʻe ngali taʻepau ʻa e ngaahi meʻá kia Siosefa ʻi he taimi naʻe fakatau pōpula ai ia ʻe hono ngaahi tokouá pea ʻave ki ʻIsipité. Ka naʻe ʻiate ia ʻa e ʻEikí, pea hili ha taimi siʻi naʻe tāpuekina ia ʻe he ʻEikí ke ne hoko ko e tamaioʻeiki falalaʻanga taha ʻi he fale ʻo hono ʻeikí, ko Potifā. Ko ia naʻe lelei ʻaupito ʻa e ngāue ʻa Siosefá ʻi he hili iá—kae ʻoua kuo fakamālohiʻi ia ke ne fai ha fili.
ʻI ha ʻaho ʻe taha, naʻe talaange ʻe he uaifi ʻo Potifaá kia Siosefa naʻá ne fiemaʻu ke feohi fakasekisuale mo ia (vakai, Sēnesi 39:7). Naʻe talaange ʻe Siosefa ʻikai. Naʻá ne fakamanatu kiate ia ʻa e tuʻunga ʻo e falala naʻá ne maʻú; naʻe ʻikai ke ne loto ke maumauʻi ʻa e falala ko iá. Kae mahuʻinga angé, naʻá ne talaange ki ai ʻa e ʻuhinga mahuʻinga naʻe ʻikai ai ke ne lava ʻo fakahoko ʻení: “ʻE fēfē ʻeku fai ʻa e hala lahí ni, ke u halaia ai ki he ʻOtuá?” (Sēnesi 39:9).
Naʻe tuʻu maʻu ʻa Siosefa ʻi heʻene tukupā ke talangofua ki he ngaahi fekau ʻa e ʻOtuá. Naʻá ne fai ʻa e meʻa totonú.
Ka ʻoku ngalingali naʻe ʻikai tali ʻe he uaifi ʻo Potifaá ʻa e tali ʻikaí. Naʻá ne toutou kole pē ʻa e meʻa tatau ʻi he ʻaho ki he ʻaho. Naʻe ʻikai fai ia ʻe Siosefa. Naʻá ne feinga ke fakaʻehiʻehi meiate ia. Naʻá ne toe fai pē ʻa e meʻa totonú.
Pea ʻi ha ʻaho ʻe taha naʻá ne [mali ʻo Potifaá] puke ia ʻaki ha konga hono valá ʻo ne fai ʻa e fiemaʻu tatau. Naʻe homo ʻa Siosefa mei he vala ko iá peá ne hola. Naʻá ne toe fai pē ʻa e meʻa totonú.
Ko ia, naʻe hoko ia ke ne ʻita mo loto-mamahi ai. Naʻá ne loi fekauʻaki mo Siosefa peá ne pehē naʻe fakamālohiʻi ia ʻe Siosefa. Naʻá ne fakaʻaongaʻi ʻa e konga valá ke fakamoʻoniʻi ʻaki ʻene tukuakiʻi loí.
Naʻe tui ʻa Potifā ki hono uaifí, pea lī ʻa Siosefa ki he fale fakapōpulá. Koeʻuhí pē he naʻá ne vilitaki ke fai ʻa e meʻa totonú.
ʻOku Totonu Maʻu Pē ʻa e Meʻa Totonú
Te ke pehē naʻe kamata ke fakafehuʻia ʻe Siosefa hili ha kiʻi taimi, pe ʻoku totonu maʻu pē nai ke fai ʻa e meʻa ʻoku totonú. Naʻe hangē naʻe iku maʻu pē ia ki haʻane faingataʻaʻia lahi ange. Ka naʻá ne hokohoko atu pē ke falala ki he ʻOtuá mo tauhi ʻEne ngaahi fekaú.
Mahalo ʻe ʻi ai ha ngaahi taimi ʻi hoʻo moʻuí ʻe hangē ʻokú ke faingataʻaʻia ai ʻi hono fai ʻo e meʻa totonú. Hangē ko ʻení, mahalo te ke fifili:
-
“ʻOku hangē ia ʻi he taimi ʻe niʻihi ʻoku kākā ʻa e tokotaha kotoa pē ʻi he akó tuku kehe pē au. ʻOku hanga nai ʻe he faitotonú ʻo tuku au ki mui?”
-
“ʻOku hanga ʻe he fakafisi ke inu kofí, tií, pe kava mālohí ʻo ʻai ha kakai ʻe niʻihi ke nau fakakaukau ʻoku ou faikehe. ʻOku ʻaonga nai hono tauhi ʻo e Lea ʻo e Potó ki he fakamāvahevahe fakasōsialé?”
-
“Koeʻuhí ʻoku ou totongi vahehongofulu, ʻoku ʻikai ke u faʻa lava ai ʻi he taimi ʻe niʻihi ʻo kumi ʻa e ngaahi meʻa ʻoku ou fiemaʻú. ʻOku fuʻu fiemaʻu nai ke u totongi vahehongofulu?”
Ka ʻoku lelei maʻu pē hono fakahoko ʻa e meʻa ʻoku totonú. ʻOku ʻaonga maʻu pē ʻa e talangofua ki he Tamai Hēvaní mo Sīsū Kalaisí. Manatuʻi pē ʻa Siosefa. ʻIo, naʻá ne faingataʻaʻia ʻi ha ngaahi nunuʻa ʻe niʻihi ʻo hono fai ʻo e meʻa ʻoku totonú—ko ha ngaahi nunuʻa mamafa moʻoni. Ka ʻi hono fakaʻosí, naʻe hoko ʻa e tauhi moʻoni ki he ʻOtuá ko ha tāpuaki lahi kiate ia—mo e tokotaha kotoa pē.
Koeʻuhí naʻe kei faivelenga pē ʻa Siosefa, naʻe faifai peá ne ʻi ha tuʻunga ke hoko ko e tokotaha falalaʻanga taha ʻi he fakamaauʻanga ʻo Feló. Naʻe fakafou ʻi he mālohi ʻo e ʻOtuá, ʻa ʻene lava ʻo mamata ki ha honge taʻu ʻe fitú, pea naʻá ne poupouʻi ʻa Felo ke tokonaki ha meʻakai feʻunga ke nau moʻui ai. Naʻe ʻuhinga ʻeni naʻe lava foki ke tokoni ʻa ʻIsipite ki he ngaahi fonua kehe naʻe uesia ʻe he hongé.
Naʻe haʻu foki ʻa e ngaahi tokoua ʻo Siosefá ki ʻIsipite ke maʻu ha meʻakai maʻa honau fāmilí, pea faifai pē pea fakahā ʻe Siosefa ia kiate kinautolu. Naʻa nau fakatomala ʻi he meʻa naʻa nau fai kiate iá, ka naʻe pehē ange ʻe Siosefa, “ʻOua naʻa mou mamahi, … he naʻe fekau au ʻe he ʻOtuá, ke u muʻomuʻa ʻiate kimoutolu ke fakahaofi hoʻomou moʻuí.” (Sēnesi 45:5).
Naʻe ako ʻe Siosefa “ʻoku fengāueʻaki fakataha ʻa e ngaahi meʻa kotoa pē ke lelei ai ʻakinautolu ʻoku ʻofa ki he ʻOtuá” (Loma 8:28). Naʻá ne ʻiloʻi ko hono fai ʻo e meʻa ʻoku totonú ko e meʻa totonú maʻu pē ia—ʻo tatau ai pē kapau ʻoku ngali kovi ange ia ʻi he taimí ni.
He ʻikai ke ke sio maʻu pē ki he ngaahi lelei ʻo hono fakahoko ʻa e meʻa ʻoku totonú ʻi he taimi pē ko iá. Mahalo he ʻikai te ke sio ʻi he taimi ʻe niʻihi ki ha ngaahi lelei fakatuʻasino ʻi he moʻuí ni. Ka ʻi he hokohoko atu hoʻo ʻofa ki he ʻOtuá mo falala mo tauhi faivelenga kiate Iá, te Ne tāpuekina fakalaumālie maʻu pē koe mo poupouʻi koe ʻi ho ngaahi faingataʻaʻiá (vakai, ʻAlamā 36:3).