Fabio P.

Faitā ʻa Ashlee Larsen

ʻOku mau faʻa fakataha mo homau fāmilí kotoa ʻi he Toetuʻú, meimei ko e toko 30 ki he 40. ʻI heʻeku kei siʻí, naʻá ku hanganaki fiefia atu ki he kato ʻoku ʻi ai e fuaʻimoá mo e sokoletí. Pea naʻe fakalata ʻaupito ia. Ka ʻi he ngaahi ʻahó ni, ʻoku ou tokanga taha ange ki he ʻuhinga ʻo e Toetuʻú.

ʻI he lotú, ʻoku lahi ʻemau talanoa fekauʻaki mo e Toetuʻú. Pea ʻi heʻeku ako folofolá, ʻoku ou tokanga lahi ange ki he meʻa naʻe hoko ʻi he Toetuʻú. ʻOku ou fakakaukau kia Sīsū Kalaisi mo e meʻa naʻá Ne fai maʻatautolú, pea ʻoku ou ongoʻi ha fehokotaki mālohi ange mo Ia.

Ko e potufolofola ʻoku ou manako aí ko e 3 Nīfai 15:9. ʻOku pehē ai, “Vakai, ko au ʻa e fonó, pea mo e māmá. Sio kiate au, pea kātaki ki he ngataʻangá, pea te mou moʻui; he ko ia ia ʻokú ne kātaki ki he ngataʻangá te u foaki kiate ia ʻa e moʻui taʻengatá.”

Kapau te u feinga maʻu pē ke fili ki he totonú ʻi heʻeku moʻuí, ʻo hangē ko ia ʻoku ou fai he taimi ní, te u lava ʻo foki kiate Ia pea maʻu ʻa e moʻui taʻengatá.