ʻOku Fakahaaʻi ʻe he Toetuʻú Hotau Mahuʻinga Moʻoni ʻia Kalaisí

ʻOku tau fakamanatua ʻi he Toetuʻú ʻa e foʻi moʻoni ko ia te tau lava ʻo liliu koeʻuhí ko Kalaisi. ʻI he taimi ʻoku tau fakatomala aí, ʻoku tau fakahaaʻi kiate Ia ʻoku tau fie liliu.

Naʻá ku faʻa loto-foʻi moʻoni ʻi heʻeku ngaahi angahalá mo e fehalaākí. Naʻá ku faʻa lotu pea toe fai pē ʻa e fehalaaki tatau. Naʻá ku ongoʻi kuó u hē. Naʻá ku fakakaukau, “ʻOku ou taau nai ke fakatomala?” Ka naʻá ku fanongo ki he lea ʻa Sisitā Tamala W. Lūnia “ʻOku ʻIkai Fakamafasia Hoʻo Fakatomalá kia Sīsū Kalaisi—ʻOku Fakalahi Ai ʻEne Fiefiá!” Ko ʻene leá ʻa e tali naʻá ku fiemaʻú. ʻI he taimi ʻoku tau ʻi ha tuʻunga maʻulalo ai ʻi heʻetau moʻuí, ʻoku hiki hake mo poupouʻi kitautolu ʻe Kalaisi. Ko e fakatomalá ʻa e founga lelei taha ke fakalakalaka ai ki muʻá.

Naʻe hāʻele mai ʻa Sīsū Kalaisi ki he māmaní ke totongi huhuʻi maʻatautolu. ʻI heʻetau fakatomala mo muimui ki Heʻene sīpingá, ʻoku tau ako ʻa e founga te tau lava ai ʻo toe lelei ange ʻi he kahaʻú.

Lolotonga ʻa e Toetuʻú, ʻoku tau fakamanatua ʻa e ikuna ʻa Kalaisí. Koeʻuhí ko ʻEne feilaulaú, ʻoku ʻikai fiemaʻu ia ke tau ongoʻi loto-foʻi. Te tau lava ʻo feinga ke ofi ange kiate Ia, pea ʻi heʻetau fakatomalá, te tau lava ai ʻo teuteu ki Heʻene Hāʻele ʻAnga Ua Maí. ʻOku mau fakahoko ʻi hoku fonuá ha ngaahi ʻekitivitī ʻe tokoni ke mau manatuʻi ʻa e mahuʻinga ʻo e Toetuʻú. ʻOku ʻomi ʻe he tokotaha kotoa pē ha meʻakai pea ʻoku mau fevahevaheʻaki ʻa e folofolá mo ʻemau ngaahi fakamoʻoní. ʻOku mau hivaʻi ha ngaahi himi makehe fekauʻaki mo e Toetuʻu ʻa Kalaisí. Ko e meʻa mahuʻinga taha ia kiate au ʻi he Toetuʻú.

ʻOku ou manako ʻi he potufolofola Tokāteline mo e Ngaahi Fuakava 93:1: “Ko e moʻoni, ʻoku folofola peheni ʻe he ʻEikí: ʻE hoko ʻo pehē ko e tangata kotoa pē ʻe liʻaki ʻene ngaahi angahalá pea haʻu kiate au, ʻo ui ki hoku hingoá, pea talangofua ki hoku leʻó, mo tauhi ʻeku ngaahi fekaú, te ne mamata ki hoku matá pea ʻiloʻi ʻoku ou ʻi ai.” ʻI he taimi ʻoku tau fakatomala aí, ʻoku ʻomi ʻe Kalaisi ha faingamālie maʻatautolu! Lolotonga ʻa e Toetuʻú, te tau lava ʻo ongoʻi ʻEne ʻofa kiate kitautolú mo ʻiloʻi ʻoku tau mahuʻinga maʻu pē kiate Ia.