Haʻu, ʻo Muimui ʻIate Au
Ko ʻEtau Laka Atú—ʻa e Sākalamēnití
ʻOku ʻi ai ha meʻa ʻoku faitatau ai ʻa e Laka Atu he kuonga muʻá mo ʻetau sākalamēniti fakauiké.
ʻŪ tā fakatātā ʻa Alyssa Tallent
Kimuʻa pea mavahe ʻa e kau ʻIsilelí he kuonga muʻá mei heʻenau nofo pōpula ʻi ʻIsipité, naʻe kole ange ke nau talangofua ki ha ngaahi fakahinohino pau mei he ʻEikí koeʻuhí ke fakahaofi pe fakalaka ʻiate kinautolu ʻa e ʻāngelo fakaʻauhá (vakai, ʻEkesōtosi 12). Hili ʻenau mavahe mei ʻIsipité, naʻe fakahoko ʻe he kau ʻIsilelí ha kātoanga kai ʻi he taʻu takitaha, naʻe ui ko e Laka Atú, ko hono fakamanatu e founga naʻe fakahaofi ai ʻe he ʻEikí Hono kakai ʻo e fuakavá.
Lolotonga e uike fakaʻosi ʻo e moʻui fakamatelie ʻa Sīsū Kalaisí, naʻá Ne kau atu ki ha maʻu meʻatokoni ʻo e Laka Atú. ʻOku tau ui e maʻu meʻatokoni ko iá ʻi he taimí ni ko e ʻOhomohe Fakaʻosí. Naʻe fakaʻaongaʻi ʻe he Fakamoʻuí ʻa e meʻa ko iá ke fakafeʻiloaki ʻaki e ouau ʻo e sākalamēnití, ʻa ia ʻoku tau kau ki ai ʻi he uike kotoa pē. (Vakai, Mātiu 26:26–28; Luke 22:19–20; Tokāteline mo e Ngaahi Fuakava 20:77, 79.)
Ko ha ongo foʻi fakakaukau angamaheni ʻeni ʻi he vahaʻa ʻo e ʻuluaki Laka Atú, ko e ʻOhomohe Fakaʻosi ʻa e ʻEikí, mo e sākalamēniti ʻo e ʻaho ní ʻe lava ʻo tokoni ke tau manatuʻi ai hono fakahaofi kitautolu ʻe he Fakamoʻuí.
Ko e Maá
Laka Atú: Naʻe kai mā taʻe-fakatupu e kau ʻIsilelí ʻi ha ʻaho ʻe fitu (ʻa ia ko ha mā ʻoku vave ange hono ngaohí pea ʻe tuai ange ʻene mafú mo koví).
ʻOhomohe Fakaʻosí: Naʻe tāpuakiʻi mo pakipaki ʻe Sīsū Kalaisi ʻa e mā taʻe-fakatupu ʻo e Laka Atú, peá Ne foaki ia ki he kau ākongá. Naʻá Ne folofola ange ke nau kai ia ko e fakamanatu ki Hono sinó, ʻa ia naʻá Ne ʻafioʻi ʻe vavé ni pē hano maumauʻi pea mate ka te Ne toe tuʻu hake.
Sākalamēnití: ʻOku tau kai ʻa e maá ko e fakamanatu ki he sino ʻo Sīsū Kalaisí.
Ko Sīsū Kalaisi ʻa e Mā ʻo e Moʻuí Koeʻuhí ko ʻEne Toetuʻú, te tau toetuʻu kotoa mo ha sino haohaoa, ʻikai faʻa ʻauha, mo taʻe-faʻa-mate. ʻOkú Ne fakahaofi kitautolu mei he maté.
Ko e Taʻataʻa ʻo e Lamí
Laka Atú: Ko e lami ʻo e Laka Atú naʻe ʻikai hano mele, ko ha lami tangata ia ʻoku taʻu taha. Naʻe tāmateʻi ia, pea tānaki hono totó ʻi ha poulu. Naʻe unu ʻa e ʻīsopé (ko ha ʻakau iiki) ʻi he poulú pea naʻe fakaʻaongaʻi ia ki hono vali e totó ʻi he kaumatapā ʻo e falé. Ko e fakaʻilonga ʻeni ki tuʻa ʻo hono ʻiloʻi e kakai fuakava ʻa e ʻEikí ke fakalaka atu ai e ʻāngelo fakaʻauhá kae lava ke fakatauʻatāinaʻi kinautolu mei he nofo pōpula ʻi ʻIsipité.
Ko e ʻOhomohe Fakaʻosí: Naʻe fakaʻaongaʻi ʻe Sīsū Kalaisi ʻa e uainé ke fakafofongaʻi Hono taʻataʻá. Naʻá Ne folofola ki Heʻene kau ākongá ke nau inu ia ko e fakamanatu ʻo Hono taʻataʻá, ʻa ia ʻe lilingi koeʻuhí ko kinautolu ki hono fakamolemoleʻi ʻo e ngaahi angahalá pea ko ha konga ia ʻo ha fuakava foʻou.
Sākalamēnití: ʻOku tau inu e vaí ko hono fakamanatu e taʻataʻa ʻo Sīsū Kalaisí.
Ko Sīsū Kalaisi ʻa e Lami ʻa e ʻOtuá. Naʻe lilingi Hono taʻataʻá ʻi Heʻene mamahi koeʻuhí ko ʻetau ngaahi angahalá mo e ngaahi vaivaí. ʻOku fakamaʻa kitautolu ʻe Hono taʻataʻá—mo ʻEne feilaulaú. ʻOkú Ne fakahaofi kitautolu mei he angahalá.