Sēkope H.

Naʻe mālōlō ʻeku kui tangatá ʻi he taimi naʻá ku maʻu ai ʻa e Lakanga Taulaʻeiki Faka-Melekisētekí. Naʻe ʻi ai maʻu pē ʻeku kui tangatá ke tokoniʻi au, pea ʻi he ʻaho ko iá, naʻe ʻikai lava ke ʻi he siakalé ʻeku kui tangatá—ko e fuofua taimi ia ʻi heʻeku moʻuí kotoa, ʻi ha ʻaho naʻe makehe kiate au.

Ka ʻi he lolotonga ʻo e ouaú, naʻá ku ongoʻi moʻoni ʻa e Laumālié. Naʻá ku ongoʻi ha ʻofa mei heʻeku tamaí mo e kakai kehe naʻe ʻi aí, kae pehē foki mei heʻeku kui tangatá. Naʻá ku ongoʻi houngaʻia ʻi heʻenau ngaahi fakamoʻoní. Ko ha ʻaho makehe moʻoni ia pea mo ha mōmeniti ongo fakaeloto kiate au fakafoʻituitui.

Ke maʻu ha fehokotaki ʻiate au mo e Laumālie Māʻoniʻoní, ʻoku fiemaʻu ke u fakaʻatā Ia ki loto. Ko e meʻa ʻe taha ʻoku ou feinga ke faí ko hono lau fakaʻaho ʻa e vahe ʻe taha ʻo e Tohi ʻa Molomoná.

Naʻe ʻi ai ha ngaahi taimi naʻá ku tokanga lahi ange ai ki he akó pe ngāué kae ʻikai ko hono lau ʻa e folofolá pe ʻalu ki he seminelí. Naʻe faingataʻa ʻaupito ʻa e ngaahi taimi ko iá. Ka ʻi he taimi kotoa pē, naʻá ku kamata ke toe lau ai ʻa e folofolá. Naʻá ku pehē loto pē, “ʻAi foki, kuo pau ke ke feinga pē.” Kuo pau ke u fai ia, he kapau ʻoku ʻikai ke u lau ʻa e folofolá, ʻoku ou ongoʻi ʻoku ʻi ai ʻa e meʻa ʻoku mole meiate au.

ʻI ʻAosituliá, ko e ngaahi ʻaho mālōlō mei he akó ʻoku lele ia mei he kamataʻanga ʻo Siulaí ki he ʻuluaki uike ʻo Sepitemá, pea ʻi he lolotonga ʻo e taimi ko ʻení, ʻoku ʻikai fai ha semineli ia. Ka naʻe fakamanatu mai ʻe he KFT ke u lau ʻa e folofolá. Te ke lava ʻo lau ʻi he ʻaho kotoa pē, naʻa mo ha veesi pē ʻe taha pe vahe ʻe taha.

Fakaʻatā ha taimi maʻá e ʻOtuá pea mo Sīsū Kalaisi. Te ke ako fekauʻaki mo Kinaua ʻi he folofolá. Kapau ʻokú ke faingataʻaʻia ʻi he laukongá, fakaʻaongaʻi pē ha miniti ʻe 10 ʻi he ʻaho, naʻa mo ha kiʻi mālōlō ʻi he akó pe ʻi he ngāué, pea ʻe tāpuekina koe.

Kuo liliu moʻoni au ʻe hono lau ʻo e folofolá.