Fakamanatua ʻo e Toetuʻú

1. Fuaʻimoa ʻo e Toetuʻú

Fuaʻimoa, fuaʻimoa, fuaʻimoa. ʻI he funga ʻo e māmaní, ʻoku teuteuʻi, fekumi, tekaʻi, fahi, mo kai e fuaʻimoa ʻo e Toetuʻú. ʻI Siamane mo ʻAosituliá, ʻoku tautau e fuaʻimoa ʻo e Toetuʻú ʻi he ʻuluʻakaú (Ostereierbaum). ʻI Mekisikoú, ʻoku fakaava e fuaʻimoá ʻo toʻo ia ki tuʻa kae fakafonu ʻaki e confetti (cascarones) pea toki fahiʻi ia ʻi ʻolunga ʻi ha foʻi ʻulu ʻo ha taha.

Ko hono moʻoní, ʻoku tokolahi ha kakai ʻoku nau fakaʻaongaʻi ʻa e fuaʻimoá ke fakamanatua ʻaki e Toetuʻú kae ʻikai ke tokanga taha ki he Fakamoʻuí. Ko hotau fatongia ia ʻotautolu ke tau tokanga taha ki he Fakamoʻuí ʻi heʻetau ngaahi tukufakaholo ʻo e Toetuʻú. ʻE lava ke hoko ʻa e fuaʻimoá ko ha fakataipe ʻo ha moʻui foʻou, ko ha fehokotaki vave ki he toetuʻú. Kuo fakaʻaongaʻi e vali lanu kulokulá ʻi ha ngaahi anga fakafonua ʻe niʻihi ke ne fakafofongaʻi e feilaulau ʻa e Fakamoʻuí. Pea ko e taimi ʻoku fahiʻi ai ha fuaʻimoa, ʻe lava ke fakamanatu mai ʻe he ngeʻesi fuaʻimoá ʻa e ngeʻesi fonualotó pea mo e Fakamoʻui kuo Toe Tuʻú. Kapau kuo teʻeki ai ke ke fakafehokotaki hoʻo ngaahi tukufakaholo ʻo e Toetuʻú kiate Ia, ko e taimi leva ʻeni ke kamata aí!

2. Afi ʻo e Toetuʻú

Ko e tafu ko ia ha afi kakahá ko ha tukufakaholo angamaheni ia ʻo e Toetuʻú, tautautefito ki Siamane, Netaleni, Koloēsia, mo Finilani.

ʻE lava ke fakamanatu mai ʻe he afi ʻi he taimi Toetuʻú ke tau sio ki he Fakamoʻuí, ʻa ia ʻokú Ne ʻomi ʻa e māmá mo e māfaná ki he māmaní he ko hono moʻoní, ko Ia ʻa e Maama ʻo Māmaní (vakai, Sione 8:12).

3. ʻŪ Meʻatokoni Makehe

ʻI he funga ʻo e māmaní ʻi he taimi Toetuʻú, ʻoku toutou kai ai ha meʻakai fakataipe ʻe ua: ko e lamí mo e maá.

ʻE lava ke tuhu ʻa e lamí ki he Lami ʻa e ʻOtuá—ʻa e Fakamoʻuí Tonu. ʻE lava ke fakamanatu mai ʻe he maá kiate kitautolu ʻa Sīsū Kalaisi, ʻa ia ko e Mā ʻo e Moʻuí (vakai, Sione 6:35).

4. Lālanga ʻo e Laʻi Pāmé

ʻI ha ngaahi fonua ʻe niʻihi, hangē ko ʻĪtali, Sipeini, ʻOtu Filipainí, Mekisikou, ʻIsipite, mo ʻItiopeá, ʻoku fī ʻe he kakaí ha lauʻi paame pe ngaahi ʻakau kehe ʻi he Sāpate Pāmé.

Ko e Sāpate Pāmé ko e Sāpate ia kimuʻa he Toetuʻú pea ʻoku fakamanatua ai e hāʻele lāngilangiʻia ʻa Sīsū ki Selusalemá, ʻi he taimi naʻe fola ai ʻe he kakaí ʻa e lauʻi pāmé ʻi Hono ʻaó.

5. Fakapuna Lofa

ʻI Pēmiutá, ʻoku fakapuna lofa fakalanulanu ʻa e kakaí ʻi he taimi Toetuʻú!

Ko e tukufakaholo ko ʻení ko ha fakamanatu fakafiefia ia ʻo e Toetuʻu ʻa e Fakamoʻuí pea mo e founga naʻá Ne hāʻele hake ai ki he langí.

6. Moihū ʻi he Lotú

ʻOua naʻa ngalo ʻa e taha ʻo e ngaahi tukufakaholo mahuʻinga taha ʻo e Toetuʻú—ʻa e ʻalu ki he lotú! ʻOku tau ō ki he Lotú ʻi he Sāpate Toetuʻú ke maʻu e sākalamēnití mo manatua e Fakamoʻuí. (Kapau ʻoku fakahoko e konifelenisi lahí ʻi he Toetuʻú, te tau lava ʻo manatu kiate Ia ʻaki ʻetau fakafanongo—pea toe maʻu ʻa e sākalamēnití ʻi he uike hono hokó.)

ʻI heʻetau tauhi ʻetau ngaahi fuakavá mo fakafoʻou kinautolu ʻi he sākalamēnití, ʻoku tāpuekina kitautolu ke tau maʻu maʻu pē ʻa e Laumālié. ʻE lava ke tokoni ʻeni ke tau fehokotaki ai foki mo e Fakamoʻuí ʻi he Toetuʻú pea ʻi he ʻaho kotoa pē.