Ko e hā e meʻa ʻoku tau ʻilo fekauʻaki mo Lepeka, ko e uaifi ʻo ʻAisaké?

Ko Lepeka ʻi he Vaikelí, tā fakatātaaʻi ʻe Michael Deas

Ko ha ngaahi meʻa ʻeni ʻoku tau ʻilo fekauʻaki mo Lepeka:

Naʻá ne angamaʻa mo hoihoifua. Vakai, Sēnesi 24:16.

Naʻá ne angaʻofa mo faivelenga. Naʻe fononga mamaʻo e tamaioʻeiki ʻa ʻĒpalahamé ke kumi ha taha maʻá e foha ʻo ʻĒpalahame ko ʻAisaké ke na mali ʻi he fuakavá. Naʻá ne kiʻi mālōló ʻi ha vaikeli ʻo lotua ko e fefine ko ia te ne fakainua ia mo ʻene fanga kāmeli ʻe toko 10 ko e tokotaha ia kuo fili ʻe he ʻOtuá ke mali mo ʻAisaké. Naʻe fai eni ʻe Lepeka. (Vakai, Sēnesi 24:1–28.)

Naʻá ne maʻu ha tui lahi. ʻI he taimi naʻe ʻeke ange ai kiate ia ʻi he ʻaho hono hokó pe te ne fie foki mo e tamaioʻeiki ʻa ʻĒpalahamé, naʻe pehē ange ʻe Lepeka te ne loto ki ai. Naʻá ne maʻu ha tui ki he ʻEikí, ʻa ia naʻá Ne tataki iá. (Vakai, Sēnesi 24:50–58.) ʻIkai ngata aí, naʻe laka hake ʻi he taʻu ʻe 20 mo e ʻikai haʻane fānau, ka naʻá ne maʻu pē ha ʻamanaki lelei ʻi heʻene ngaahi fuakavá (vakai, Sēnesi 25:20, 26).

Naʻá ne maʻu ha fakahā maʻa hono fāmilí. ʻI he taimi naʻe feitamaʻi ai ʻe Lepeka ha ongo māhangá, naʻe folofola ange ʻa e ʻEikí kiate ia, “ʻE tauhi ʻe he ʻuluakí ʻa e kimuí” (Sēnesi 25:23). Naʻá ne mamata kimui ange ki hono fakasītuʻaʻi ʻe ʻĪsoa ko e māhanga lahí ʻa e faleʻi ʻa e ʻEikí mo taʻefakaʻapaʻapa ki hono ʻinasi tukufakaholó pea mo e founga ne faivelenga ai ʻa Sēkope ko e māhanga siʻisiʻí. Naʻá ne tokoni ke maʻu ʻe Sēkope ʻa e tāpuaki ʻo e ʻuluaki fohá peá ne fakatokanga kiate ia ʻoku loto hono taʻoketé ke tamateʻi ia. (Vakai, Sēnesi 27.)