Ko ha Fononga ki he Temipalé

Tā fakatātā ʻa Katelyn Budge

Naʻe ʻi ai ha taimi naʻe ʻikai ke u ʻalu ai ki he temipalé ʻi ha taʻu ʻe ono nai. Ko e ngaahi taʻu faingataʻa taha ʻeni ʻo ʻeku moʻuí koeʻuhí he naʻe mālōlō foki ʻeku fineʻeikí ʻi he vahaʻataimi ko ʻení. Naʻá ku fie ʻalu ki he temipalé, ka naʻe meimei houa ia ʻe taha mei ʻapi, pea naʻe ʻikai haʻaku paʻanga ki he fefonongaʻakí pea ʻikai ha taha ke ne ʻave au.

Ka ʻi he taʻu kuo ʻosí naʻe uiuiʻi au ke u hoko ko e palesiteni ʻo e kalasi ʻa e Kau Finemuí. ʻI he taimi naʻe kole mai ai heʻeku taki ʻi he Kau Finemuí ke u tokoni ʻi hono palani ʻo e ngaahi ʻekitivitī ki he taʻú, naʻá ku talaange ko e ʻuluaki meʻa ʻoku totonu ke mau faí ko ʻemau ō fakakalasi ki he temipalé. ʻI heʻeku fakahā ʻeni ki he kau finemuí, naʻa nau fuʻu fiefia ʻaupito! Ko e toki fuofua taimi ʻeni ki ha tokolahi taha ʻo kinautolu ke nau ō ai ki he temipalé. Naʻá ku lotu mo ʻaukai lahi ʻi heʻemau teuteu ki he fonongá. Naʻe ʻikai ke u loto ke hoko ha fehalaaki.

Naʻá ku ongoʻi hono toʻo atu e ngaahi faingataʻaʻia fakatuʻasino, fakaeloto, mo fakalaumālié ʻi he temipalé. Naʻá ku palōmesi ke toe lahi ange ʻeku ʻalu ki he temipalé. Ko ha aʻusia fakaʻofoʻofa mo ha tāpuaki ia. Naʻá ku fiefia lahi ʻi heʻeku kau atu mo hoku kaungā toʻu tupú ki he ngāue maʻongoʻonga ʻa ʻetau Tamai Hēvaní.

ʻOku ou ʻilo ko e temipalé ko e fale māʻoniʻoni ia ʻo e ʻEikí, ʻa ia ʻoku fakahoko ai e ngaahi ouau toputapú. Te tau lava ʻo tangi ai ki he Tamai Hēvaní ʻi he lotu, pea te Ne fakatonutonu ʻa e ngaahi meʻá ʻi he taimi pē ʻAʻana, fakafonu kitautolu ʻaki ʻa e ʻofá, mo ʻomi kiate kitautolu ʻa e nonga ʻoku taʻengatá. ʻOku ou ʻilo ko e taimi ʻoku tau tafoki ai kia Kalaisí, te tau mamata ki he ngaahi mana ʻoku tau fiemaʻú. Ko e fānau ʻofeina kitautolu ʻa ʻetau Tamai Hēvaní, pea ʻoku ʻi ai Haʻane ngāue maʻongoʻonga ke tau fai—ʻa ia ko hono tānaki ʻo ʻIsileli ʻi he ongo tafaʻaki fakatouʻosi ʻo e veilí.