Ngaahi Koloa Mahuʻinga Fufuú
Ko Hono Maʻu e Fakalelei ʻa e Fakamoʻuí ʻi he Fuakava Motuʻá
Sio fakalelei ange; ako lahi ange.
Mahalo ʻe fakakaukau ha kakai ʻe niʻihi ʻoku ʻikai lahi ha fakamatala ʻi he Fuakava Motuʻá fekauʻaki mo e Toetuʻú, he naʻe hiki ia kimuʻa hono ʻaloʻi mai ʻo e Fakamoʻuí pea ʻoku ʻikai ha lave ai ki he huafa ʻo Sīsū Kalaisí. Ka ʻoku fakamahinoʻi ʻe he Tohi ʻa Molomoná, naʻe ʻiloʻi mo tui foki ʻa e kakai ʻi he kuonga muʻá ki he Fakamoʻuí (vakai, Sēkope 4:4).
Naʻe akoʻi ki he kakai ʻIsilelí ko e taumuʻa ʻo e fono ʻa Mōsesé ke tataki kinautolu kia Kalaisi. Hangē ko ʻení, ʻi hono fakamoʻui kinautolu mei he ngata huhu koná ʻaki ʻenau sio ki he ngata palasa naʻe fakahinohino ʻe he ʻEikí kia Mōsese ke ne ngaohí, naʻe akoʻi ange ʻe Mōsese ko e fakataipe ʻeni ʻo e Fakamoʻuí, ʻa ia ʻe hāʻele mai ʻo fakahaofi kinautolu mei heʻenau ngaahi angahalá (vakai, Nōmipa 21:7–9; ʻAlamā 33:18–20).
Ka ko e meʻapangó, he ʻoku mole ha konga lahi ʻo e fakamaʻalaʻala ko iá mei he Tohi Tapu ʻa ia ʻoku tau maʻu ʻi he ʻaho ní, koeʻuhí ko ha ngaahi liliu—naʻe fakataumuʻa pē ke hoko pea mo ha fehalaaki—ʻi he ngaahi senituli lahi (vakai, 1 Nīfai 13:23–27).
Ka ʻo kapau te ke fekumi, te ke kei lava pē ʻo maʻu ha ngaahi fakamoʻoni fakafolofola lahi ki he Fakamoʻuí mo ʻEne Fakaleleí ʻi he Fuakava Motuʻá. Tau talanoa leva ki hanau niʻihi!
Sāpate Pāmé, Ketisemani, mo e Faingataʻá
“ʻOku haʻu ho tuʻí kiate koe, ʻoku angalelei ia, pea ʻoku ʻiate ia ʻa e fakamoʻuí; ʻokú ne angavaivai, pea ʻoku heka ki he ʻasí, mo e ʻuhiki ʻo e ʻasí” (Sākalaia 9:9).
Naʻe fakahoko ʻeni ʻi he meʻa ʻoku ʻiloa he taimí ni ko e Sāpate Pāmé, ko e ʻaho ia ʻe fitu kimuʻa ʻi he Toetuʻú, ʻi he hāʻele lāngilangiʻia ʻa Sīsū ki Selusalemá (vakai, Mātiu 21:15).
“Ko e moʻoni kuó ne toʻo kiate ia ʻa ʻetau ngaahi vaivaí, ʻo ne fua ʻetau ngaahi mamahí: ka naʻa tau mahalo kuo tautea mo taaʻi ia mei he ʻOtuá, pea mamahiʻia” (ʻĪsaia 53:4).
Naʻe mamahi ʻa e Fakamoʻuí ʻi Ketisemani koeʻuhí ko e ngaahi angahala kotoa pē—pea ongoʻi ʻa e ngaahi loto-mamahí, mamahí, mahamahakí, mo e ngaahi faingataʻaʻia—ʻa e tokotaha kotoa pē kuo moʻui pe ʻe moʻui ʻi he māmaní. Koeʻuhí ko e meʻá ni, ʻokú Ne ʻafioʻi ai e founga ke fakafiemālieʻi kitautolu ʻi hotau ngaahi faingataʻá (vakai, ʻAlamā 7:11–13; vakai foki, Mātiu 8:17).
“Naʻe fakamālohia, pea naʻe mamahi ia, ka naʻe ʻikai te ne mafaʻa hono fofongá: ʻoku tataki ia ʻo hangē ko e lami ke tāmateʻi, pea hangē ko e sipi ʻoku noa ʻi he ʻao ʻo e tangata kosí, pea naʻe ʻikai mafaʻa hono fofongá” (ʻĪsaia 53:7).
Naʻe fakalongolongo pē ʻa Sīsū ʻi he taimi naʻe fakafehuʻi ai Ia ʻe he taulaʻeiki lahí (vakai, Maʻake 14:60–61).
Ko e Tutukí
“Kuo ʻai au ʻe he fakataha ʻo e ngaahi angakoví: naʻa nau hokaʻi hoku nimá mo hoku vaʻé” (Saame 22:16).
“ʻOku nau tufa hoku ngaahi kofú ʻiate kinautolu, mo fai ʻa e talotalo ki hoku pulupulú” (Saame 22:18).
“Naʻa nau foaki foki kiate au ʻa e ʻahú ko ʻeku meʻakai; pea ʻi heʻeku fie inú naʻa nau tuku mai ʻa e vaimahí ke u inu” (Saame 69:21).
Ko e tautea ʻaki e tutukí ko ha founga angamaheni ia he taimi ko iá, ka naʻe fuʻu fakamamahi ʻaupito ʻa e kau sōtia Lomá ʻi heʻenau manukí mo e fakamamahiʻi ʻo e Fakamoʻuí (vakai, Sione 19:1–3; Mātiu 27:34–35, 48).
Ko e Toetuʻú
“Te ne fakaʻauha ʻaupito ʻa e maté ʻi he mālohi; pea ʻe holoholo ʻe he ʻEiki ko [e ʻOtuá] ʻa e ngaahi loʻimatá mei he mata kotoa pē; pea ko e valoki ʻo hono kakaí te ne toʻo mei he fonua kotoa pē: he kuo folofola pehē ʻa [e ʻEikí]” (ʻĪsaia 25:8).
“He ʻoku ou ʻilo ʻoku moʻui ʻa hoku Huhuʻí, pea ʻe tuʻu ia ʻi māmani ʻi he ʻaho fakamuí: Pea ka ʻosi hoku kilí pea maumau hoku sinó, ka te u mamata ʻi hoku kakanó ki he ʻOtuá” (Siope 19:25–26).
Naʻe toetuʻu ʻa e ʻEiki ko Sīsū Kalaisí. ʻOkú Ne moʻui ʻi he taimí ni! ʻOku fakapapauʻi ʻeni ʻe ha ngaahi potufolofola mo ha ngaahi fakamoʻoni taʻefaʻalaua. ʻIkai ko ia pē, naʻe ʻafioʻi ʻe heʻetau Tamai Hēvaní talu mei he kamataʻangá te tau fiemaʻu ha Fakamoʻui, pea kuó Ne teuteuʻi ʻEne fānaú ke nau tali ʻa e Fakamoʻuí talu mei he kuonga ʻo e Fuakava Motuʻá.