Te U Lava ʻo Fakaafeʻi e Tokotaha Kotoa

Tā fakatātā ʻa Katelyn Budge

ʻOku ou manavasiʻi ke vahevahe ʻa e ongoongoleleí mo hoku ngaahi kaungāmeʻá ka ʻoku ou fiefia mo nekeneka foki. ʻOku mau fakahoko ʻi he taʻu kotoa pē ha kumi fuaʻimoa fufū ʻi homau ʻapí ʻi he Toetuʻú. ʻOku mau fakaafeʻi ʻa e kau faifekaú mo homau ngaahi kaungāmeʻa ʻoku ʻikai ke nau kau ki he Siasí.

‘Oku ou faʻa fakaafeʻi foki hoku ngaahi kaungāmeʻá ke haʻu ki he lotú pe ki he ngaahi ʻekitivitī ʻa e toʻu tupú. Ko e kaungāmeʻa pē ʻe taha naʻe haʻu ki he ʻekitivitií, ka kuo teʻeki ke haʻu ha taha ki he lotú. Ka ʻoku ou kei fakaafeʻi pē kinautolu ke nau lava ʻo ofi ange ki he ʻOtuá pea toe nofo mo Ia. ʻOku ou fiefia ke tokoni ki he niʻihi kehé ʻaki hono fakaafeʻi ke nau haʻu kia Kalaisi.

Ko Sīsū Kalaisi ʻa hotau Fakamoʻuí mo e Huhuʻí, ko e Lami ʻa e ʻOtuá, pea mo e Tauhisipi Leleí. ʻOku ou ʻilo te tau lava ʻo toe nofo mo e ʻOtuá ʻo kapau te tau muimui kiate Ia.