Ko ʻEku Hosaná

ʻOku fakamatalaʻi ʻe ha taha ʻo e ngaahi vahe ʻoku ou manako taha ai ʻi he Fuakava Foʻoú ʻo kau ki he hāʻale lāngilangiʻia ʻa Sīsū Kalaisi ki Selusalemá. Naʻe kaila ʻa e kakaí, “Hosana ki he Foha ʻo Tēvtiá: ʻOku monūʻia ia ʻoku haʻu ʻi he huafa ʻo [e ʻEikí]; Hosana ʻi ʻolunga” (Mātiu 21:9). ʻI he taimi kotoa pē ʻoku ou lau ai ʻení, ʻoku ou pehē: Ko e hā leva ʻeku hosaná?

Talu ʻeku tupu mo ʻeku lea tanenu. Ko e taimi ʻe niʻihi naʻá ku fuʻu ongoʻi mā ai mo loto-foʻi koeʻuhí ko e ʻikai ke u lava ʻo fakamatalaʻi lelei ha meʻa ke tatau mo ʻeku fakaʻamú. Kuó u fakaʻamu ke u lea lelei pe ko ʻeku matuʻaki fakalongolongo pē. ʻOku ou hohaʻa maʻu pē ʻi he taimi ʻoku ou lea ai ʻi muʻa ʻi he niʻihi kehé pe ʻi he taimi ʻoku ou lotu leʻolahi aí. Kuo tuʻo lahi ʻeku tautapa fakalongolongo ke maʻu ha faʻa kātaki, nonga, mo maʻu ha tokoni. Ko e taha ʻeni ʻo ʻeku ngaahi hosana fakatāutahá—ʻa ʻeku tangi ki ha fakahaofí.

Pea hangē pē ko e ʻikai liʻaki ʻe Kalaisi ʻa e tautapa ʻa e kakai ʻi Selusalemá, kuo teʻeki ʻaupito ke Ne liʻaki au. Kuo teʻeki ke Ne toʻo atu ʻeku lea tanenú, ka kuó Ne fakamālohia au ʻi ha ngaahi founga naʻe ʻikai ke u ʻamanaki ki ai. Kuó Ne tokoniʻi ke u ongoʻi nonga ʻi he ngaahi momeniti ʻo e loto-hohaʻá mo ʻiloʻiko hoku leʻó, neongo ʻeku leʻoleʻovalé, ka ʻoku feʻunga pē ia kiate Ia.

ʻOku ʻi ai ha meʻa ʻi heʻetau moʻuí takitaha te ne ʻai kitautolu ke tau fai ha lotu. ʻOku ʻi ai e taimi ʻe niʻihi, mahalo te tau ongoʻi ʻoku ʻikai ke tali ʻetau ngaahi tautapá. Ka ʻokú Ne fanongo ki he hosana kotoa pē. Pea ʻi Heʻene taimi mo e founga haohaoá, te Ne tokoniʻi kitautolu.

Naʻe mamahi ʻa Kalaisi ʻi Ketisemani koeʻuhí ko ʻetau ngaahi angahalá peá Ne ongoʻi hotau ngaahi mamahí mo hotau ngaahi faingataʻaʻiá. ʻOku hokohoko atu ʻEne tataki mo fakafiemālieʻi ʻa kinautolu kotoa pē ʻoku tafoki kiate Ia mo e Tamai Hēvaní. Naʻe toe tuʻu foki mei he fonualotó ʻa e Kalaisi tatau pē naʻe mamahi maʻatautolu ʻi Ketisemaní mo e kolosí, ʻo ikunaʻi ʻa e maté kae lava ke tau maʻu ʻa e ʻamanaki leleí. Ko ʻEne Toetuʻú ʻa e tali taupotu taha ki he hosana kotoa pē.