ʻOku ʻIkai Fiemaʻu Ia Ke Ke Taukei

Tā fakatātaaʻi ʻe he Getty Images

Kuo mātā tonu ʻe ha niʻihi tokolahi ʻo kitautolu ha ʻaati fakaʻofoʻofa pe ko ha faʻahinga fakafiefia mo fakakaukau: “Pehēange mai ne u lava ke fai ia, ka ʻoku ʻikai ke u talēnitiʻia.”

Ko e konga lahi ʻo e ngaahi ngāue ʻokú ke saiʻia taha aí naʻe fai ia ʻe he kakai naʻe lahi honau talēniti fakanatulá. Ka te ke ʻohovale ʻi he founga ʻoku faʻa maʻu ai ʻe ha tokotaha angamaheni pē ha fakakaukau naʻe tataki fakalaumālie.

Ko e taha ʻo e ngaahi himi foʻou naʻe toki tukuange mai ʻe he Siasí ko e “Let Easter Anthems Ring,” naʻe faʻu ia ʻe ha mēmipa ʻo e Siasí ko Leli A. Hila. Naʻá ne hoko ko ha tokotaha faʻu tohi mo ha ʻētita fakapalōfesinale (maʻu vahenga malōlō he taimí ni), ka naʻe ʻikai ko ha tokotaha faʻu hiva ia. Naʻe ʻikai foki ko ha taha hiva pe tokotaha tā-meʻa lelei ia.

Ko ha tokotaha pē ia naʻe manako he mūsiká pea naʻá ne maʻu ha fakakaukau naʻe tataki fakalaumālie.

Lolotonga e hoko ʻa Misa Hila ko e talēkita ʻo e kuaea ʻa e uōtí he ngaahi taʻu kuohilí, naʻá ne feinga ke faʻu ha fakalea foʻou ʻo ha foʻi hiva motuʻa naʻá ne maʻu. Naʻá ne fiefia ʻi he aʻusia ko iá peá ne ʻeke ki hano kaungāmeʻa naʻe ngāue ʻi he Siasí pe ʻokú ne ʻilo ha toe faʻahinga hiva naʻe fiemaʻu ki ai ha ngaahi lea foʻou. Naʻá ne fakahā ange kiate ia ha fasi ʻo ha foʻi himi naʻe faʻu ʻi he 1800 tupú.

Naʻe pehē ʻe Misa Hila, “Ne u tangutu hifo mo e mūsika ko iá pea naʻe haʻu pē ki hoku ʻatamaí he taimi pē ko iá ʻa e ngaahi leá: ‘Rise up, ye Saints, rejoice.’ (Tuʻu hake, Kāingalotu, fiefia) Pea naʻá ku ongoʻi ai ʻa e fakalea fakalūkufuá mo e meʻa naʻe fiemaʻu ke ʻi aí—ko ha hiva ʻo e fiefia fekauʻaki mo e Fakamoʻuí.”

Naʻe pulusi e himi ko iá ʻi he Ensign ʻi he 2012. Naʻe veesi ʻe fā pea naʻe fekauʻaki ia mo e Fakalelei ʻa Sīsū Kalaisí. Naʻe pehē ʻe Misa Hila, “Naʻe tokanga lahi ʻa e fakaleá ki he ʻte ke toe mamata ki ho ngaahi ʻofaʻangá; ʻoku ʻi ai ha toetuʻu.’” ʻI hono fanongonongo mai ʻe he Siasí ʻa hono fiemaʻu ha ngaahi himi foʻoú, naʻe kole leva kia Misa Hila ke fakapatonu e fakalea ʻo ʻene himí ʻi he Toetuʻú.

Hili hono liliu ha konga lahi ʻo e fakaleá—neongo naʻe kei tatau pē ʻa e laine kamatá, “Rise up, ye Saints, rejoice,”—ʻoku veesi tolu leva he taimí ni e himi ʻa Misa Hila ʻoku ui ko e “Let Easter Anthems Ring.” Mahalo te mou hivaʻi ia ʻi he houalotu sākalamēnití ʻi he faʻahitaʻu Toetuʻu ko ʻení!

Naʻe tataki fakalaumālie nai ʻa Misa Hila ʻi he taimi naʻá ne hiki ai e ngaahi leá?

Naʻá ne pehē, “ʻOku ou ongoʻi loto-fakatōkilalo ke lea pehē. Ka ko ia. Naʻe ʻi ai ha ngaahi taimi ne u ongoʻi ai ʻa e hū mai ki hoku ʻatamaí e ngaahi leá. ʻOku fakafiemālie mo fakafiefia ia ki he lotó. Pea ʻoku ou faʻa ongoʻi ʻa e fiefia ko iá ʻi he taimi ʻoku ou toe lau ai ha meʻa naʻá ne ueʻi makehe au ʻi he taimi ko iá. ʻOku ʻomi ʻe he meʻa ko iá ʻataʻatā pē ʻa e ngaahi ongo ko ia ʻo e fakamoʻoní. ʻOku meimei hangē pē haʻate toe foua ʻa e meʻa tatau.”

Mahalo ʻe saiʻia ʻa e kakaí ʻi he himí, ka ʻoku hangehangē ko e tokotaha naʻe ʻaonga taha ki ai ʻa e meʻá ni (tā mai e nafá) … ko e tokotaha naʻá ne faʻu iá! ʻOku ʻikai ngata pē ʻi hono faitāpuekina e niʻihi kehé ʻi hono fakaʻaongaʻi hotau ngaahi talēnití mo e ngaahi fakakaukau naʻe tataki fakalaumālié—ka ʻokú ne tāpuekina foki mo kitautolu.