Ko ha Toetuʻu ʻOku Fakatefito ʻi he Fakamoʻuí

Naʻá ku fakatau mai foki ha puha lahi ʻo e fanga kiʻi fakatātā ʻo Sīsū Kalaisí ki he Toetuʻú. Naʻá ku ʻuluaki fakakaukau ke fufuuʻi kotoa kinautolu ʻi hoku ʻapiakó. Ka ʻi he taimi naʻe sio ai ʻa e kakai ʻi he ʻapiakó ki he puhá, naʻa nau kole e fanga kiʻi fakatātaá. Naʻe kamata ke kole mai foki mo e kau faiakó. Pea naʻe aʻu pē ki he fānau ko ia naʻe ʻikai ke u teitei fakakaukau te nau fiemaʻu ha kiʻi fakatātā ʻo Sīsuú, naʻa nau kole mai ha fakatātā. Ko ia ne u tufa atu ia ki he taha kotoa pē naʻá ku fetaulaki mo iá.

Naʻe ʻikai ilifia ʻa e Fakamoʻuí ke talanoa ki ha taha, ʻo aʻu pē ki he kakai naʻe liʻekina taha ʻi Hono sosaietí. Naʻá Ne kaungāmeʻa mo kinautolu. Naʻá Ne feohi mo kinautolu. Naʻá Ne maʻu meʻatokoni fakataha mo kinautolu. Naʻe akoʻi au ʻi hono tufa ʻo e fanga kiʻi fakatātaá ke u anga fakakaumeʻa ange, ʻo hangē pē ko e Fakamoʻuí. Naʻá ne toe akoʻi foki au ʻoku tatau ai pē pe ko hai koe, tatau ai pē pe ko e hā e meʻa ʻokú ke pehē kuó ke faí, ka ʻoku ʻi ai maʻu pē ha feituʻu maʻa Sīsū Kalaisi ʻi hoʻo moʻuí.

Kuó u fifili ʻi heʻeku moʻuí kotoa, pe te u maʻu fēfē nai ʻa e Fakalelei ʻa e Fakamoʻuí? Ka ʻi he Toetuʻu ko ʻení, naʻá ku ako kapau te u fai ha ngaahi liliu ʻi heʻeku moʻuí ke u hoko ʻo hangē ange ko e Fakamoʻuí, ʻoku ngāue leva ʻEne ʻaloʻofa fakaleleí ʻi heʻeku moʻuí. Pea kapau te u feinga ʻi he ʻaho takitaha ke liliu ʻa e fanga kiʻi meʻa īkí, ʻe kamata leva ke u hoko ʻo lelei ange.

ʻI ha ngaahi taʻu siʻi ʻo ʻeku moʻuí, naʻá ku fefaʻuhi mo hono fakaʻaongaʻi ʻo e ponokalafí. Hili ha lēsoni ʻi he seminelí, naʻe ueʻi au ke u talanoa ki heʻeku pīsopé. Naʻe faingofua ange ke kamata ikunaʻi ʻeku faingataʻaʻiá ʻi he faifai peá u talaange ki heʻeku pīsopé mo ʻeku ongomātuʻá, koeʻuhí he ʻoku faingataʻa ʻaupito ke foua toko taha pē ia.

Naʻe kamata ke u feinga ke lotu mo lau ʻeku folofolá ʻi he ʻaho takitaha, peá u feinga ke u angaʻofa ange ʻi he akó. Naʻe tokoni ia kiate au he naʻá ku tokanga lahi ange ki he Fakamoʻuí ʻi heʻeku ngaahi angahalá. Naʻá ku tafoki lahi ange kiate Ia kae ʻikai ki hoku tūkunga ʻi he kuohilí.

Kuó u ikunaʻi ʻeku fefaʻuhi mo e ponokalafí ʻo fakafou ʻi he Fakalelei ʻa Sīsū Kalaisí. Kuó u hoko lahi ange ki he tuʻunga ʻoku fiemaʻu ʻe he ʻOtuá ke u aʻusiá. ʻOku ou lava ʻeni ʻo tāpuakiʻi ʻa e sākalamēnití koeʻuhí ʻoku liliu mo fakamaʻa au ʻe he Fakamoʻuí. ʻOku ou houngaʻia ʻi heʻeku moʻui taau ke fakaʻaongaʻi ʻa e lakanga fakataulaʻeikí ke faitāpuekina e moʻui ʻa kinautolu ʻoku mau feohí.

ʻI he lolotonga ʻo e semineli ʻo e taʻu ní, naʻá ku aʻusia ha meʻa fakaʻofoʻofa moʻoni ʻi heʻemau talanoa fekauʻaki mo e feilaulau ʻa e Fakamoʻuí. Naʻá ku fakakaukau, naʻá Ne mei lava pē ʻo taʻofi ʻEne faingataʻaʻiá ʻi ha faʻahinga taimi pē. Ka naʻá ku toe fakakaukauloto atu ki Heʻene fakakaukau, “ʻIkai, ʻoku fiemaʻu pē ke u fakahoko ʻeni. ʻOku fiemaʻu ke u fai ʻeni maʻa Peni. ʻOkú ne fiemaʻu ʻeni.” Kiate aú, naʻe fakafehokotaki moʻoni ʻe he fakakaukau ko iá hoku vā fetuʻutaki mo e Fakamoʻuí ki he Toetuʻú.

ʻI he Toetuʻu hokó, mahalo te u toe ngāue pē ki ha fakatātā piliki ʻe taha ʻo Sīsū. ʻOku ou loto moʻoni ke tufa ha fanga kiʻi fakatātā lahi ange. Ka ʻe tatau ai pē, te u fakakaukau ki he mamahi ʻa Kalaisí mo ʻEne Fakalelei maʻakú. Koeʻuhí ko Ia, te u lava ʻo fakatomala mei heʻeku ngaahi angahalá pea foki kiate Ia mo e Tamai Hēvaní ʻi ha ʻaho.

ʻOku ou ʻilo naʻe moʻui pea pekia ʻa e Fakamoʻuí maʻatautolu takitaha pea ʻokú Ne ʻafioʻi kitautolu mo e meʻa ʻoku tau fiemaʻú. Kapau te tau feinga moʻoni, te tau lava ʻo maʻu Hono mālohi ʻo e fakafiemālié mo e liliú, pea te tau lava ʻo hoko ko ha kakai lelei ange.